弟弟怕沙記

小慈家姐 4 歲生日, 帶 1 歲 4 個月既弟弟一齊去沙灘玩沙, 落車見到個海灘好興奮, 弟弟手指指大聲呼叫, 點知一放佢係沙度行就即刻面容扭曲!!!  只係肯企係蓆上面, 手指指嘴蔑蔑

夾硬拖佢出去你睇弟弟既表情!

企係度唔郁係冇事既

但呢位坐唔定既小朋友點會甘心企係度?  想玩, 但玩玩下又要喊

小慈仲要整古佢堆 d 沙係佢腳仔上面, 喊到眼淚口水一面都係

唔覺意郁左一小步 or 手掌掂到 d 沙就好似掂到毒藥咁喊到七彩!  去片~~

https://youtu.be/dk2mGsLs2zg

有 d 唔理解平時咁貪玩既小明點解會怕沙?  小慈當年第 1 次去沙灘只係 1 歲 1 個月仲細過弟弟, 小慈個時係一見到個海就衝左出去, 有浪湧埋心口先嚇一嚇, 邊有好似弟弟咁嘈之巴閉?!  所以我地由得小明喊, 睇得出佢唔係真係驚個隻喊樣, 只係唔鍾意 d 沙, 可能奄尖嫌污漕....  唔得呀!!  男仔黎架麻!  唔准咁姿整呀!  果然唔理佢唔理佢, 佢又真係好 d 喎!  終於肯笑~~

半自動 bubble 機造出大量 bubbles, 正呀!!

令佢改變既都係小慈!!  為左搶小慈個桶, 弟弟行到好似踩死蟻咁終於踏出左佢既第一步

https://youtu.be/Xj21lTs1SIY

行開一次知道唔死得就肯繼續行, 不過跌親都係咋嬌, 對手唔肯掂 d 沙又點起身呢? 真係 bear 一聲 @.@  玩到天黑其實只係玩左個幾鐘頭, 浪費左差不多 30 分鐘釘死係沙灘既弟弟真係太慢熱, 我地執野準備走佢先熱完身開始玩到慶起, 攞住 2 個桶起勢咁走, 先回復番真正大膽既佢, 自己行出去玩水!  

要抱起佢先可以離開沙灘, 點知行唔夠 2 步弟弟就掙扎要落地, 仲出埋英文講 "walk~~ walk~~" 示意要自己落地行, 真係笑爆嘴  :DDDD

好啦, 呢個夏天多 d 帶你去沙灘蒲啦 ^^