罷奶

一直都唔係好逼到弟弟飲奶, 次次飲剩小小就推開奶樽, 雖然佢係好鍾意飲奶, 但唔知點解飲到尾尾就唔飲

星期一晚

9:00 pm 同小慈一齊飲夜奶, 弟弟唔知咩事一見到支奶就推開仲走埋, 捉佢番黎餵奶就狂喊掙扎, 好曳啊~~  平時飲剩小小都算, 今次係一啖都未飲就話唔飲?!?  於是我就處理佢, 要佢收聲飲奶奶, 點知斷斷續續咁喊左 15 分鐘, 見到支奶就從新再喊過, 我開始扯火, 我同小慈講: 

"弟弟好曳媽媽要教佢, 跟工人姐姐去擦牙洗面訓覺!"  

小慈見勢息唔對講左一聲 "知道媽媽" 就乖乖擦牙上床瞓覺, 完全冇扭我要我陪佢睇圖書!  望番弟弟佢仲喊緊喎!  我擺支奶係佢面前示意要佢飲, 佢竟然出手推跌支奶奶, 話佢曳曳再喊大聲 d, 喊到企起身想走, 我航住佢唔俾走, 佢就手指指指住廚房方向口中唸唸有詞, 我估佢既意思係想去工人姐姐度求救, 我唔出聲望住佢喊, 弟弟又好似耍我咁突然又指住電視機講 banana, 又指住梳化 d 公仔逐隻叫名, 好似想分散我注意力咁, 我唔 show 佢又俾支奶佢睇, 佢又喊過, 一直僵持左 40 分鐘, 弟弟喊到由企變坐再變企, 喊到口都震晒舉起手想我抱佢, 但我唔郁 (心痛到我死死下架其實但我要忍住), 再縮埋牆角越來越遠好似想避開我咁, 仲喊到盅眼瞓....  就係呢個時候爸爸出現, 佢一手抱起弟弟, 弟弟喊到對眼腫晒未睇清楚邊個抱佢就極力掙扎!!  爸爸用佢低沈雄厚既聲音 NO 佢一野先打開眼, 見到爸爸呢個救兵即笑, 仲係梳化攞左隻 Elmo 攬住錫一啖, 同爸爸講 "Elmo" 要爸爸又錫一啖跟住攬住 Elmo 係爸爸既懷抱中瞓左, 前後過程只係 30 秒至 1 分鐘 @o@  唔識教呀~~~  我唔識教呀~~~  弟弟比小慈更硬頸, 更固執, 更加寧死不屈!!!  逼都逼唔到, 同佢硬碰硬今次係我輸左既, 我估唔到 1 歲 4 個月既弟弟已經咁硬頸會避開我仲唔睬我, 小慈以前更倔強都一定要我錫番佢先當無事, 弟弟竟然係喊到瞓左都唔理我!!!!

星期二大清早

仲諗緊弟弟會唔會怕左我呢個魔鬼媽媽仲嬲緊我呢?  原來係唔會既, 佢照樣飲完奶奶都係推開房門搵我錫我拉我起身, 不過支奶都係飲剩 40ml, 唔知佢咩事, 冇飲夜晚支奶半夜都冇餓醒??  唯有吩咐工人姐姐如果今日再出現同一情況就通知我啦, 吩咐埋姐姐 d 奶沖凍 d 俾佢, 又俾牙仔水佢飲俾牙膠佢咬, 可能出牙痛

星期二晚

我同秋放工出左去, 返到黎兩隻 B 都瞓晒, 問番工人姐姐弟弟今日既情況, 佢話弟弟朝早支奶飲剩 40ml, 5:30 pm 支奶一啖都唔飲, 夜晚 9:00 pm 支奶又係一攞出黎就喊, 冇飲到...  咩事呀?  咩事罷奶呀?!  工人姐姐補充話弟弟食粥仔係冇問題, 肯食仲好鍾意食曲奇餅同埋牙仔餅, 咁即係關 d 牙事?  工人姐姐話弟弟唔肯擦牙, 摸到佢兩邊牙肉紅腫仲好似損左咁, 牙肉腫既位置係第 2 隻大牙!!  真係出牙!!  本來出緊 1 隻大牙 2 隻側門牙, 而家仲谷多 2 隻大牙, 即是一次出 5 隻?!?  駛唔駛咁趕呀, 仔!  唉~~  仲要牙肉損左, 痛死死呀~~

今日大清早

弟弟今朝支奶又係一啖都唔飲, 尋晚已經冇飲, 而家又唔飲係唔係玩絕食呀?!  我望住弟弟, 問佢點解唔飲奶奶呀?  弟弟講左一大堆太空話我聽, 跟住手指指要我俾枱面上既蔬菜乾佢食....  唉~~ 是但啦, 你想食咩就食咩啦, 既然姐姐話你肯食粥, 就全日俾粥你食!  衰仔都逼唔黎架勒, 但要飲水, 唔可以滴水不沾, 於是我去廚房開支 150ml 既果汁俾佢飲, 用 combi 水杯, 弟弟一見到即刻衝埋黎搶, 仲唔駛 1 分鐘飲晒 @.@  即是識口渴?!  用飲管就唔痛?!  即刻吩咐工人姐姐晏少少用水樽俾奶奶弟弟飲, 睇下佢肯唔肯先, 令人好擔心呀衰仔!!

今晚

工人姐姐報告弟弟全日冇飲過奶, 用水樽裝奶奶絕對扼唔到佢, 飲一啖就連樽都掉埋, 不過全日就食左 1 餐麥皮 + 2 餐粥 + 1 餐飯, 心情都唔錯, 夜晚我同弟弟講飲奶奶, 講之麻, 佢已經即刻嗚咽, 周圍行來行去坐立不安, 見到工人姐姐攞支奶出黎仲即喊, 走埋黎我度嗲, 我話要飲奶奶呀弟弟, 即走, 走去姐姐度又有支奶, 走去我度我又鵝佢, 於是, 弟弟係撲左埋去爸爸度唔郁, 爸爸即刻受寵若驚!!  尋晚已經做左一次救人英雄, 今晚唔知弟弟係記得定係咩又搵佢, 雖然嬲嬲地, 不過見佢咁既反應真係好好笑!  算啦, 唔想逼佢, 於是同弟弟講安靜喇, 去瞓覺啦, good night... 

奇蹟地弟弟即刻收聲, bye bye 手都出埋咁拖住姐姐入房瞓, 真係 bear 一聲 @.@

幼潛第 2 期 1, 2 堂

幼兒潛能訓練課程第 2 期上星期已經開班, 但因為幼兒學校大裝修, 於是要移私去職業訓練中心上堂, 環境當然冇幼兒學校咁好啦, 不過導師都係張姨姨同埋 Gi Gi 姐姐, 上堂時間改為 12:30 pm, 我已經監弟弟瞓醒一覺先黎, 時間 perfect!  今次有一半新同學, 一半舊同學, 大家都好乖, 係得弟弟瞓醒覺精力充沛完全唔肯坐定定 @.@

遊戲 1 -- 唱午安歌

歌詞配合動作教小朋友點頭及手指指, 促進身體協調及平衡力, 過度興奮既弟弟誓不低頭, 一聽到首歌唱完就舉手大叫 "YEAH~~~~" 真係俾佢笑死 :DD

遊戲 2 -- 疊大杯疊細杯

請小朋友將一套 3-5 個既細杯杯套入大杯杯裡面, 發展大小概念

遊戲 3 -- 大肌肉遊戲

請小朋友雙手 or 單手羅住紙盒, 踏上一級大積木再落番黎, 將紙盒運去終點疊高

第二堂

遊戲 1 -- 扭樽蓋

先用玩具螺絲學習扭一下放手再扭一下, 再俾大膠樽佢地扭樽蓋, 成功後俾個再細 d 既樽如洗頭水試用裝佢地扭, 扭開樽蓋內藏小珠, 請小朋友放入樽內, 弟弟好有心機放珠仔

遊戲 2 -- 玩粟粉

冇錯, 係用屋企既鷹粟粉開水煮滾再放暖咁俾小朋友摸, 俾佢地嘗試接觸唔同既質感, 感受下滑嘟嘟, 黐笠笠既感覺, 冇時間整粟粉可以俾 d 煮左既意粉 / 通心粉都得, 有時出街又可以就地取材俾 d 冰佢地玩下, 感受下冷熱都係幾好既感官刺激!  初初玩都仲 ok, 不過一掂到 d 粟粉就即刻抹番落自己條褲, 攪到我要捉住佢 @.@

再要弟弟摸就開始敷衍了事

你睇佢個樣幾牽強, 大叫 NO 仲走左去添呀!  今日弟弟都係精力旺盛既一個, 圈住地墊不停跑圈, 捉都捉唔住

反而小慈就玩到好 high

遊戲 3 -- 障礙賽

請小朋友嘗試慢慢跨越離地 1 吋既欄杆, 再經過不同質感既地墊如地毯 / 木板 / 軟膠

張姨姨話小朋友學識行 4 個月就會識提起腳跨過障礙物, 話口未完弟弟已經跨過左, 嚇親張姨姨呢!  估唔到弟弟係全班最遲一個識行, 而家竟然係最早既一個識得提腿 ^^

弟弟 16 個月大

1 歲 4 個月既弟弟又有進步 ^^

- 每朝 7:30am 飲完支奶就會 "媽媽媽媽" 咁叫住推門入黎搵我, 準過鬧鐘!

- 分得開爸爸媽媽, 不過好有性格地, 我叫佢叫媽媽係唔睬我, 睇圖書見到貝兒就叫佢做呀媽 @.@ 

- 學識 Knock Knock 敲門

- 聽到我講 "走喇" 自己會去鞋架攞鞋仔示意我幫佢著, 跟住去拉大門個門柄 

- 由廳去房 or 由房出廳, 弟弟都會好有交帶咁同我地講 Bye Bye 先會行

- 睇到我訓話小慈時會好緊張雙手抽住自己肚腩 d 衫, 神色凝重咁聽埋一份

- 見到小慈喊會用手摸小慈個頭表示安慰 (超乖)

- 自己喊係會擘大個口靜音 5-8 秒, 谷到塊面紅晒嘴唇變紫色咁先喊出聲 @.@

- 講 "No" 時係好重語氣同埋好用力咁 fing 頭, 爸爸話好 man 呀!

- 鍾意玩公仔, 跌左公仔落地會錫番佢地仲會攬住搖搖下咁噯佢地

- 想要一樣野會指住, 然後嘰哩咕嚕七情上面咁示意想要, 再拉人去幫佢

- 可以坐定定玩半個鐘以上玩具, 最鍾意玩 Pooh 茶煲 / Elmo 醫生玩具 / 木砌火車

- 認得 Winnie the Pooh 識講 "Pooh Pooh", Piglet 就叫做 "Pig"

- 認得及識講 back pack, Minnie, (ba)nana, Papa (Jelly)

- 識講 Up & Down, bath,  抱抱, 爬, 抹抹抹 (嘴), Oh No, 唉呀~~

- 一首歌聽完係會大叫 "Yeah~~~~"

- 玩完豬仔車 / 搖小馬 要落地時, 會伸隻手出黎好似老佛爺咁要人參扶 :DDDD

小慈: "弟弟好傻架, 咩野見到成日都笑~~"

無錯, 弟弟係真係成日都笑, 令到望住佢既人都會笑埋一份, 個個四萬咁口 ^^

Face Album

千呼萬喚等到頸都長, 小明既靚靚 studio 相簿出世!!!   

1 歲時既弟弟同而家已經唔同左樣, d 攣毛冇晒

大家應該睇唔到, 呢頁入面寫左 3 句說話我覺得好岩聽:

Mother has three desires

One is your daddy has gainful work

Second is the family members are all healthy

Third is you grow up happily ^^

We Love You So Much, Young Man!!!

My Sweet Birthday

今日係我既生日, 又係星期一, 於是我同秋一齊攞假黎個 long weekend ^^  每年我既生日因為係春分都勢必落雨, 今年竟然天朗氣清仲有太陽, 只係遇上史上首次沙塵暴, 塵封香港, 空氣污染指數仲錄得 500 !!  爆晒標, 不過都無損我地去沙灘既雅慶~~

我同秋秋已經 5 年冇拍拖去沙灘, 自己都好耐冇影過單人照

偷得浮生半日閒, 今日成個沙灘都冇人

沙灘 d 沙涼涼地好舒服

呢位仁兄周圍行想做咩呢?

以為秋秋寫 Happy Birthday 點知寫左呢句

老就老土少少, 但我非常之受落~~ 霖晒  ^8^

執左幾粒南北杏同珊瑚礁俾我做生日禮物

夜晚去西貢食海鮮, 係電視見得多都係第 1 次幫襯

點少得 my favorite 芝士焗龍蝦 :P

仲去埋滿記食糖水

真係飽到行唔郁, 好滿足

屋企仲有我對乖仔乖女等緊我

我愛我的家!!  幸福的家!!  生日更蒙福!!  感謝神!!

小慈識用筷子

小慈一直都係用緊 3 個圈既學習筷子, 今晚無情情攞左我地對筷子話想試下, 點知真係識渣, 手勢岩晒仲要夾到條菜, 開心到佢話以後唔駛用 Thomas 筷子喎! 

事實證明學習筷子真係有 D 用, 而家學成了!

3 歲 11 個月

弟弟第一次剪頭髮

當我餵弟弟食粥仔時, 我發現佢 d 頭髮原來已經好長, 仲插眼添 @.@

見唔見前面個幾條好長呀?

見佢可以坐定定食野, 我就決定一邊餵粥, 一邊同佢剪頭髮

本來只係想剪佢前面 d 陰, 但見佢 d 頭髮都插耳仔, 一不做二不休, 成個頭剪晒!

男仔頭原來好難剪啊!  再加上佢郁黎郁去, 聽到較剪聲就望, 攪到我差 d 縮唔切!

第 1 次剪算係咁啦 :P

之後仲發現弟弟已經出左第 9 隻牙喇!! 

佢擘到個口好大先見到佢左邊第一臼齒已經出左一半, 好大隻大牙呀!!  我非常愚笨咁伸隻手指入去弟弟個口度想摸清楚時, 弟弟就好唔客氣咁咬住我唔放 @.@

好痛啊~~~ >.<

大大小小遊迪士尼

收到消息音樂班老師病左, 於是星期六突然變得好得閒, 同班靚媽傾開不如一齊去迪士尼玩啦, 點知一呼百應, 有時真係約都冇岩!  於是大大小小一行 16 人去迪士尼喇~~

今日天晴溫暖, 好舒服

上星期先去完迪士尼今日又去, 小慈開心到暈~~

拉住條尾就知小慈岩岩睇完 Golden Mickey

小慈近來愛上左泰山, 每次去迪士尼都一定要去樹屋探佢

用力踩呀!  新發明黎架!

排 45 分鐘先有得玩馳車天地, 你睇小慈幾有型

巧巧大小慈 5 日, 兩個女孩子好岩玩

小慈 17 個月

小慈 3 歲 11 個月, 我個女大個左好多 ^^

睇完煙花一齊去深井食燒鵝, 一班小朋友玩到熟晒

開心!

心平氣和教兒樂

幫弟弟報名參加幼潛, 今次亦都非常幸運地被抽中可以參加, 課堂有 11 堂, 10 堂係俾弟弟上, 1 堂係要家長去聽既講座, 好認真架!  有識教仔既家長先會有乖既小朋友, 要一齊學架  :)

上一次講座既題目係 "牙牙學言", 教大家訓練小朋友講說話既最好方法就係陪小朋友玩玩具, 而玩具入面最好既就係同佢地 "玩煮飯仔" -- 形容詞 / 動詞 / 量詞 / 名詞咩都有, 係一個非常好既教材!  講者仲提醒我地, 如果個小朋友淨係鍾意玩波玩車其他野唔玩咁點算呀?  佢講得好好, 小朋友一定鍾意人地陪佢玩既, 所以你陪佢玩既時候就同佢玩第二樣野, 由得佢自己玩車玩波, 咁就可以引佢玩其他玩具!  Good method, 我一定會記住!

今晚呢個講者叫 Shirley 鄭燕萍, 佢係一個有碩士既社工, 專責認知治療, 未做社工之前係一個有十幾廿年經驗既幼兒園老師, 專門輔導有問題既小朋友家長, 係家長!  佢舉左一個例子:

有個媽媽個 b 早產, 個 b 出世得 0.32kg, 唔駛驚, 都養得大不過就好細粒, 好瘦, 佢呀媽同呢個 b 所到之處, 所有人尤其是婆婆一定會話 "陰公羅~~ 叫你媽俾多 d 飯你食啦, 瘦成咁!!"  係唔係好耳熟能詳呢?  (我都聽唔少)  不過呢個媽媽經過佢地既輔導已經走出左呢個框框, 小朋友病唔病肥唔肥高唔高, 並唔係做呀媽既責任, 唔好咩都攬晒上身!  真係中晒我死穴!! 

講座既題目叫 "心平氣和教兒樂", Shirley 並唔係為大家提供一套方法 or 技巧去教仔, 因為相信大家已經聽好多, 識唔少, 最大既問題係發唔發揮到出黎?  好似去考試咁, 明明已經溫晒書準備好, 偏偏對住份試卷就驚, 腦中一片空白字都唔識寫一樣!  同樣地當面對小朋友扭計 / 大喊 / 發脾氣 / 打人 / 咬人 / 撞牆 / 大街大巷瞓係地下 lur 地.... 你能唔能夠處理自己既情緒, 冷靜咁去運用你已經識既 "計仔"!?  忍到, 就咩方法都用到! 

面對資訊太多既年代, 周圍既人都會教你點樣做一個 "稱職" 既父母, 有冇壓力呢?  見人地個 b 幾多歲已經學咩學咩, 識咩識咩, 會唔會覺得自己 "慢" 左呢?  不打不鬧怕小朋友喊就係怕佢有童年陰影??!

心平氣和既第 1 步就係走出育兒既思想陷阱, 了解自己係邊一類型既人, 控制自己以下既諗法....

- 攬晒上身: 每當有問題出現就歸咎於自己, 一定係我教得唔好?

- 大難臨頭: 緊張, 將事情既嚴重性無限擴大致災難性既地步, 小小事諗到好遠?

- 感情用事: 以感覺做事欠客觀, 心情唔好就覺得咩都有問題?

- 打沉自己: 悲觀, 不斷講負面既說話以致意志消沉, 成日話自己做唔到?

- 妄下判斷: 冇咩原因就將事情推斷為負面, 例如老公唔聽我電話就係嫌我煩?

- 非黑即白: 將事情絕對化, 中間冇灰色地帶, 如男仔一定唔玩公仔?

- 左思右想: 面對事情不夠果斷, 猶豫不決, 掙扎, 重覆思考都冇決定?

- 怨天尤人: 推卸責任, 凡事歸咎他人, 埋怨上天?

- 貶低成功經驗: 所有事情只是僥倖, 好彩, 妄自菲薄, 唔覺得係自己既功勞?

心平氣和既第 2 步就係走出作為父母既不良思想規條, 最常見既規條舉例如...

- 呀 b 瘦出世成日病, 一定係呀媽陀得唔好湊得唔好!

- 我唔可以打佢鬧佢, 因為要民主, 俾個快樂既童年回憶佢?

- 我既一切都係為左仔女, 要俾最好既佢!

- 我細個冇得學樂器, 我一定要俾我既仔女學番!

- 子女既好壞就係父母既成績表?  冇家教?

每個人都有自己既一套, 呢一套好多時都係由生活經驗累積而黎既, 亦視為價值觀與個人既標準,  作為父母, 通常就會將自己個套套左係子女既身上, 多多少少對仔女都會有一定既期望, 但當小朋友長大有自己既主見, 與你既期望相違背而你又過份地執著時, 就好容易令自己跌入思想既陷阱, 甚至會出現非常嚴重既後果!  反思早前有個媽媽點解因為升學問題而掉個女落商場?!!

解決自己既思想陷阱謹記 5 常法:

1. 常留意身體警告訊號 - 開始發嬲時會心跳, 喘氣, 頂胃....

2. 常喚停負面思想 - 要問自己跌左落邊一個思想陷阱

3. 常自我反問 - 糾正自己既負面思想

4. 常分散注意力 - 遇上不快事要冷靜, 行開 or 轉移視線

5. 常備聰明卡 - 寫低對自己鼓勵 or 幫助既說話作為人生金句

停一停, 諗一諗, 作為父母都係一個人, 需要安排自己既生活, 仔女唔係你生命既一切, 唔好做 "責難" 既父母!  你自己唔樂, 又點會有育兒樂呢?  

共勉之~~

2 個女

今日小慈準備返學時要求紥辮, 佢頭髮好幼又唔係太長, 孖辮最岩佢

紥完, 小慈要求再夾隻夾, 我唯有咁樣同佢夾, 都幾靚呀呵?

咩都唔執輸既弟弟見小慈家姐玩夾仔玩得咁開心, 佢埋黎攪攪震, 於是....

係唔係好嬌俏呢?

我生左 2 個女  ^^