罷奶

一直都唔係好逼到弟弟飲奶, 次次飲剩小小就推開奶樽, 雖然佢係好鍾意飲奶, 但唔知點解飲到尾尾就唔飲

星期一晚

9:00 pm 同小慈一齊飲夜奶, 弟弟唔知咩事一見到支奶就推開仲走埋, 捉佢番黎餵奶就狂喊掙扎, 好曳啊~~  平時飲剩小小都算, 今次係一啖都未飲就話唔飲?!?  於是我就處理佢, 要佢收聲飲奶奶, 點知斷斷續續咁喊左 15 分鐘, 見到支奶就從新再喊過, 我開始扯火, 我同小慈講: 

"弟弟好曳媽媽要教佢, 跟工人姐姐去擦牙洗面訓覺!"  

小慈見勢息唔對講左一聲 "知道媽媽" 就乖乖擦牙上床瞓覺, 完全冇扭我要我陪佢睇圖書!  望番弟弟佢仲喊緊喎!  我擺支奶係佢面前示意要佢飲, 佢竟然出手推跌支奶奶, 話佢曳曳再喊大聲 d, 喊到企起身想走, 我航住佢唔俾走, 佢就手指指指住廚房方向口中唸唸有詞, 我估佢既意思係想去工人姐姐度求救, 我唔出聲望住佢喊, 弟弟又好似耍我咁突然又指住電視機講 banana, 又指住梳化 d 公仔逐隻叫名, 好似想分散我注意力咁, 我唔 show 佢又俾支奶佢睇, 佢又喊過, 一直僵持左 40 分鐘, 弟弟喊到由企變坐再變企, 喊到口都震晒舉起手想我抱佢, 但我唔郁 (心痛到我死死下架其實但我要忍住), 再縮埋牆角越來越遠好似想避開我咁, 仲喊到盅眼瞓....  就係呢個時候爸爸出現, 佢一手抱起弟弟, 弟弟喊到對眼腫晒未睇清楚邊個抱佢就極力掙扎!!  爸爸用佢低沈雄厚既聲音 NO 佢一野先打開眼, 見到爸爸呢個救兵即笑, 仲係梳化攞左隻 Elmo 攬住錫一啖, 同爸爸講 "Elmo" 要爸爸又錫一啖跟住攬住 Elmo 係爸爸既懷抱中瞓左, 前後過程只係 30 秒至 1 分鐘 @o@  唔識教呀~~~  我唔識教呀~~~  弟弟比小慈更硬頸, 更固執, 更加寧死不屈!!!  逼都逼唔到, 同佢硬碰硬今次係我輸左既, 我估唔到 1 歲 4 個月既弟弟已經咁硬頸會避開我仲唔睬我, 小慈以前更倔強都一定要我錫番佢先當無事, 弟弟竟然係喊到瞓左都唔理我!!!!

星期二大清早

仲諗緊弟弟會唔會怕左我呢個魔鬼媽媽仲嬲緊我呢?  原來係唔會既, 佢照樣飲完奶奶都係推開房門搵我錫我拉我起身, 不過支奶都係飲剩 40ml, 唔知佢咩事, 冇飲夜晚支奶半夜都冇餓醒??  唯有吩咐工人姐姐如果今日再出現同一情況就通知我啦, 吩咐埋姐姐 d 奶沖凍 d 俾佢, 又俾牙仔水佢飲俾牙膠佢咬, 可能出牙痛

星期二晚

我同秋放工出左去, 返到黎兩隻 B 都瞓晒, 問番工人姐姐弟弟今日既情況, 佢話弟弟朝早支奶飲剩 40ml, 5:30 pm 支奶一啖都唔飲, 夜晚 9:00 pm 支奶又係一攞出黎就喊, 冇飲到...  咩事呀?  咩事罷奶呀?!  工人姐姐補充話弟弟食粥仔係冇問題, 肯食仲好鍾意食曲奇餅同埋牙仔餅, 咁即係關 d 牙事?  工人姐姐話弟弟唔肯擦牙, 摸到佢兩邊牙肉紅腫仲好似損左咁, 牙肉腫既位置係第 2 隻大牙!!  真係出牙!!  本來出緊 1 隻大牙 2 隻側門牙, 而家仲谷多 2 隻大牙, 即是一次出 5 隻?!?  駛唔駛咁趕呀, 仔!  唉~~  仲要牙肉損左, 痛死死呀~~

今日大清早

弟弟今朝支奶又係一啖都唔飲, 尋晚已經冇飲, 而家又唔飲係唔係玩絕食呀?!  我望住弟弟, 問佢點解唔飲奶奶呀?  弟弟講左一大堆太空話我聽, 跟住手指指要我俾枱面上既蔬菜乾佢食....  唉~~ 是但啦, 你想食咩就食咩啦, 既然姐姐話你肯食粥, 就全日俾粥你食!  衰仔都逼唔黎架勒, 但要飲水, 唔可以滴水不沾, 於是我去廚房開支 150ml 既果汁俾佢飲, 用 combi 水杯, 弟弟一見到即刻衝埋黎搶, 仲唔駛 1 分鐘飲晒 @.@  即是識口渴?!  用飲管就唔痛?!  即刻吩咐工人姐姐晏少少用水樽俾奶奶弟弟飲, 睇下佢肯唔肯先, 令人好擔心呀衰仔!!

今晚

工人姐姐報告弟弟全日冇飲過奶, 用水樽裝奶奶絕對扼唔到佢, 飲一啖就連樽都掉埋, 不過全日就食左 1 餐麥皮 + 2 餐粥 + 1 餐飯, 心情都唔錯, 夜晚我同弟弟講飲奶奶, 講之麻, 佢已經即刻嗚咽, 周圍行來行去坐立不安, 見到工人姐姐攞支奶出黎仲即喊, 走埋黎我度嗲, 我話要飲奶奶呀弟弟, 即走, 走去姐姐度又有支奶, 走去我度我又鵝佢, 於是, 弟弟係撲左埋去爸爸度唔郁, 爸爸即刻受寵若驚!!  尋晚已經做左一次救人英雄, 今晚唔知弟弟係記得定係咩又搵佢, 雖然嬲嬲地, 不過見佢咁既反應真係好好笑!  算啦, 唔想逼佢, 於是同弟弟講安靜喇, 去瞓覺啦, good night... 

奇蹟地弟弟即刻收聲, bye bye 手都出埋咁拖住姐姐入房瞓, 真係 bear 一聲 @.@