弟弟 1 歲既時候我已經幫佢報讀小慈而家呢間幼兒學校, 於是上星期係小慈書包發現張通告要弟弟面試 (連郵票都慳番幾方便) :D 老師都話收到弟弟張 form 時覺得好攪笑, 感覺上仲係覺得佢好細個原來已經要返學, 真係快樂不知時日過!
出發去面試之弟弟第 1 次坐 car seat! 平時都係小慈家姐坐既
今次既面談都係非正式既, 因為我地同學校真係已經好熟好熟! 何校長基本上日日都見到弟弟, 由弟弟 3 個月大開始每日放學都例必見到佢接小慈家姐放學, 弟弟自細又好肯跟老師, 笑咪咪又肯俾人抱氹得人地好歡喜, 再加上而家識行識走, 見到學校門口已經興奮大叫, 跟住仲好唔客氣咁走去學校入面玩滑梯, 玩車車, 非常自在自出自入玩到樂而忘返, 睇住佢大, 個個都錫佢啦 ^^
校長問我地點解揀番呢間學校? 咁當然係因為小慈既轉變 -- 由喊包到而家變左鬼靈精, 老師既功勞最大!! 師資一直都係我最欣賞呢間學校既原因, 好難搵到一間學校有老師咁細心關心了解學生 ^^
唯一令學校有保留既就係弟弟係細仔, 大家 9月開學, 弟弟就要等到佢 11 月 25 日足 2 歲先可以返, 要學校蝕 3 個月學費留個位俾我, 所以校長問左我 3 次係唔係一定會入讀? 如果留左個位到時我唔讀就大整古佢地, 亦都浪費左個學位! 所以今次既面談最主要都係傾入學時間, 唔怪得 d 人話細仔冇學校收, 原來係因為學費.... 咁又係, 校長話 2008, 2009 好多 BB 出世, d 申請表格多到有成 2 寸咁厚, 真係唔憂收生!! 好在有小慈家姐咋, 如果唔係弟弟要等多一年做超級大仔先有書讀, 好在~~ 好在~~ 感恩, 感恩!
決定弟弟今年 12 月 1 日正式返 N1, 到時小慈就係 K2, 有 2 年既時間兩姊弟一齊返學, 好野~~~
沒有留言:
張貼留言