呢個暑假只係幫小慈報左兩個暑期活動, 一來我只係得星期六有時間帶佢出去, 二來又唔可以同兒童詩班撞時間, 三來小慈小姐之前講到明唔學游水唔學芭蕾舞, 所以真係冇咩得揀, 見到呢度有體操班同綜合球類班時間緊接, 堂連堂, 可惜同畫班撞時間, 唯有暫停畫班上完體操再學番
體操班係學習基本體操動作如平衡木, 跳步, 一字碼, 拱橋, 翻滾動作, 前後滾翻, 側手翻, 手倒立, 機械訓練如木箱, 彈網, 體能訓練等
綜合球類訓練班就係透過遊戲及各種小型球類如籃球, 羽毛球, 網球等訓練兒童眼手腳既控制配合及平衡力, 課程介紹非常吸引, 小慈平時又小郁動於是膽粗粗幫佢報左名!
第一堂, 導師非常嚴格, 請小朋友入場之後就請家長係出面等, 嚇到小慈驚惶失措即場大喊, 我就隔住玻璃門睇住佢喊 @.@ 導師請佢坐埋一邊喊, 想跟佢地做動作先出去, 想做就做, 你咁講, 衰妹小慈就攞正牌坐係旁邊喊左 20 分鐘, 見我係門口裝裝下小慈仲手指指又唸唸有詞唔知想同我講咩, 我開門想入去鬧佢時, 導師叫我將小慈放心交俾佢地, 叫我離開唔好俾佢見到我! 隔左一陣, 我偷望到小慈好痛苦咁跟導師做熱身, 之後用雙手撐地腳放上牆做倒立, 好精彩呀!
跟住跳木箱同玩呼拉圈, 小慈對眼腫晒都有跟住做, 完左體操班出黎去個廁所飲啖水就即刻再入番去學打波, 小慈又開心喎, 見佢拍波拍到依嘩鬼叫, 第一堂導師只係教佢地拋波接波, 唔好以為好易呀, 我見好多小朋友都做唔到, 一拋個波就唔知飛左去邊?!
落堂出黎小慈笑晒咁同我講好好玩, 我即刻問佢下堂仲黎唔黎呀? 黎到喊唔喊呀? 小慈答我佢會好勇敢, 之後返屋企攰到佢成隻積咁瞓左 2 個半鐘晏覺, Good! 出一身汗有運動係一件好事!
今日已經係第 4 堂, 小慈第 2 堂開始已經咩事都冇, 每個星期六都好期待體操班同埋學打波, 佢話最鍾意導師叫佢地將個波放係個頭上面傳俾後面個小朋友, 對手要拉到好後先做到, 真係有 d 野逼住黎其實小慈係得既, 可能今次開正佢個範, 跑跑跳跳又拍波玩得好開心啦!
而家等緊入課室, 食早餐時小慈同我講: "媽媽, 導師話早餐唔好食咁飽呀!"
沒有留言:
張貼留言