童工

做全職媽媽真係好忙碌, 感覺真係辛苦過返工!  我估如果唔係小明咁黐身應該冇咩野, 我終於諗到方法對付呢個寸步不離既小朋友, 就係去邊都帶埋佢 :DDD 

小明喊得最犀利就係見到我入廚房, 但我又一定要入去煮飯仔俾呢個少爺仔食, 咁咪唯有抱埋佢入廚房俾張櫈佢企係度, 開住水龍頭俾佢玩水.... 我盡量開到個水喉有咁細得咁細架喇, 佢咁重我又唔可以單手抱住佢煮飯, 真係冇計!  

食飽飽就帶佢去公園玩一陣順便買餸, 弟弟係一個好幫手黎架 ^^

呢位童工力大無窮

士別三日, 小明係公園玩到熟晒, 好矯健, 爬樓梯快到不得了!  呢架車咁高佢都企圖自己爬上去, 真係睇少一眼都唔得

眨下眼佢已經玩完滑梯落番黎, 教佢行平衡木又有板有眼, 見到英文字就同我講: "A A A, A is for apple"  我已經好開心, 原來未講完仲有: "a a a, a is for alligator"  俾佢睇過 2-3 次就記得真係好厲害!  

以前去到呢 d 咁大級既爬梯, 小明只識上唔識落, 而家兩樣都識喇!

玩一陣已經濕晒

仲未肯放手自己上落樓梯, 但扶住就識雙腳交替上落

A is for alligator

眼瞓喇~~  弟弟最得人錫既地方就係唔駛我催佢都識自己 bye bye 公園拖我返屋企

返去沖個靚涼瞓晏覺, 呢一轉又瞓左 3 個幾鐘, 我又有自由時間 :)

小慈放學返黎, 無端端好似發現新大陸咁同我地講:

小慈: "原來爸爸同媽媽隻戒指係一樣樣架!"

我: "係呀, 爸爸隻戒指大隻 d, 媽媽個隻細隻 d"

小慈: "點解我冇戒指既?"

我: "點先有戒指呀?"

小慈: "爸爸同媽媽結婚就有戒指攞!"

我: "係呀!  你講得冇錯呀!"

小慈: "我第時結婚都有戒指呀?"

我: "係呀"

小慈: "我同邊個結婚呀?"

我: "同你個老公攞!"

小慈: "邊個係我老公呀?"

我: "你而家咁細個未知架"

小慈: "我好想要結婚呀!"

我: "......"  (唔識反應中)

小慈: "弟弟!!  你都冇戒指喎!  第時我同你結婚啦!  媽媽, 我要同弟弟結婚呀!"

>.<