上堂因為去左 Art Jamming 玩所以冇返 (再加埋弟弟發燒), 今日問番張姨姨玩左 d 咩, 唉呀! 原來 d 遊戲好正呀! 飲恨中....
第 6 堂 3 個遊戲
遊戲一 -- 試味
請小朋友試甜味 (煉奶), 酸味 (檸檬), 咸味 (美極) 及辣味 (wasabi + 豉油), 係試味既過程家長需要加入多 d 形容詞如: 煉奶係白色既, 好甜, 好香等..... wasabi 加豉油都俾佢地諗到 :D
遊戲二 -- 大笨狗
唱 "尋晚隻大笨狗為乜叫", 配合歌詞加入動作, 唉呀~~ 呢首歌係小慈當年既飲歌黎架!! 當年就算佢喊到幾凄涼寸步不離唔肯離開我去上堂, 一聽呢首歌就開心笑肯跟住跳架!
遊戲三 -- 跨 2" 4" 6" 欄杆
請小朋友先跨越 2" 欄杆, 之後再加深難度至 6", 即大約一張小朋友櫈仔, 前腳一定跨得過, 只需注意後腳提起既高度夠唔夠, 佢地通常會因為心急而 kick 後腳
~~~~~~~~~~~~~~~~~~~
第 7 堂 3 個遊戲
遊戲一 -- 拉拉手
請小朋友手拖手唱 "拉拉手", 初時先拖媽媽手, 熟練之後就試拖小朋友, 通常小朋友 1 歲之前係完全冇所謂拖邊個都得既, 但 1 歲之後有自我意識, 只肯拖大人, 對其他小朋友會表現抗拒係正常既! 千奇唔好鬧, 對熱情既小朋友想拖人被拒絕, 家長要安慰話:
"啊~~ 唔緊要, 小朋友未熱身我地一陣先拖佢, 等佢準備好先!"
對怕羞唔俾人拖甚至大喊既小朋友家長更加要安慰, 你唔係小朋友你唔知佢之前經歷過 d 咩, 可能之前佢企圖想同人玩被人拒絕過, 而有介心同挫敗感, 唔好即時反應話佢
"咩你咁水皮架, 人地同你玩之麻.... 云云"!
家長最理想係同情左佢先:
"啊~~ 你未準備好唔想拖人地係唔係? 可以同小朋友握握手啦"....
慢慢黎, 欣賞佢肯試, 對佢有信心!
遊戲二 -- 撕貼圖工
請小朋友撕不同顏色手工紙, 撕成小正方型最理想, 撕紙後用漿糊塗上手工紙, 再貼上 A4 紙, 2 歲前既幼兒只懂大力扯手工紙, 可以在紙口撕開一小角教佢地用手指仔撕, 熟練先將撕紙既紙口放係上下左右不同方向要小朋友自己搵, 訓練解難能力, 塗漿糊係感官刺激訓練, 整個圖工需時 5-10 分鐘, 訓練小朋友專注力
遊戲三 -- 音樂椅
每人一張櫈仔, 初時聽到音樂就企起身, 音樂停就坐低, 熟習後增加難度聽住音樂圍圈行, 音樂停就搵位坐, 呢個遊戲對佢地黎講係難既, 因為又要聽音樂又要做動作, 有規則又要專注
小明唔肯玩, 佢不停想去搬櫈, 俾我拉佢一時行一時坐好唔高興呢!
沒有留言:
張貼留言