弟弟 21 個月大

工人姐姐放完大假返黎咁耐, 弟弟既痴媽筋症都未完全康復, 見唔到我好地地, 見到我就 "媽媽~~ 媽媽~~ I want 媽媽" want 到我暈, 成日都拉我去梳化陪佢, 我一起身又係即刻喊到癲左 @.@   

今晚我只係晏左少少返屋企, 弟弟飲緊奶, 9 秒 9 極速飲完嘴都未抹就 "I want 媽媽度" 飛快地走埋黎坐我大脾, 跟住扭我抱, 於是我抱埋弟弟入房準備換衫, 小慈係梳化睇緊電視, 見到咁既情形就話...

小慈: "弟弟真係好鍾意你喎, 媽媽!"

我: "係囉!  弟弟係咪成日要去媽媽度呀?! 下?!"  我抱住弟弟錫左佢一啖

小慈: "我都好鍾意你架, 媽媽!"

我: "我都好鍾意你架, 小慈!  你同弟弟都係媽媽最愛既小寶貝, 心肝掟!" 

即刻抱埋弟弟返轉頭又錫小慈一啖, 仲叫埋弟弟錫小慈家姐, 小慈霖晒~~

小慈: "弟弟成日話 I want 媽媽, 可能佢以為媽媽係食得架!" :DDDD

我其實好驚, 我好驚小慈話我成日都抱住弟弟又錫弟弟唔理佢, 弟弟呢個痴媽筋症暫時都未有方法解決, 工人姐姐係度都可以幫手頂下, 星期日通常係我冇命之日, 兩隻衰野都唔肯跟爸爸 (!!), 有時我要一手抱弟弟, 一手拖小慈, 手瓜起輾就係咁既原因 @.@

呢個月過得好快, 由 3 個月大開始流口水到今日 21 個月大, 終於都識關水制!!!

有時玩到忘形同埋受地心吸力影響, 擘大口都會流口水, 不過佢終於自覺識 '索' 番, 同埋會自己去攞紙巾抹嘴, 實在太令人感動~~~~~

弟弟係語言方面又俾驚喜我地, 弟弟識講:

- 指住 d 筷子匙羹講 "弟弟既, 媽媽既, 小慈既, 爸爸呢?"

- 識跟小慈一齊做飯前祈禱, 會大大聲講 "阿門~~~ 食飯喇~~~"

- 非常獨立, 咩都要自己做, 會自己要求 "弟弟揸住, 弟弟飲湯, 弟弟飲可樂"

- I want 弟弟 '不' 丫, 弟弟食麵麵 (最鍾意食童星點心麵) 

- 橙橙凍凍呀! 

- 弟弟飲水水

- 捉住!

- 學小慈要我幫佢擦牙會講: "媽媽補擦~~"

- popcorn yummy, 好味呀!

- 咩聲呀?  好好聽呀!

- 控訴蚊蚊咬佢會講 "蚊蚊咬弟弟囉!  蚊蚊曳曳! 搽 lotion"

- 見到鍾意既電視節目會講 "I want 睇多一次呀~~" or "再黎!"

- I want 媽媽拖住 (近來一落地行就自動自覺拖住人, 以前成日 fing 開我地架!)

- I want 洗手手, 洗腳腳, 擦牙

- 姐姐倒垃圾

- 屙左屎屎識話 "弟弟臭臭, dirty boy!  換片片"

- 最鍾意同小慈一齊跑步, 準備開跑時會講 "ready, set, go" or "ready 1 2 3"

- 知衰, 問佢邊個曳曳呀?  邊個喊喊呀?  識指住自己講 "弟弟囉!"

- 邊個乖仔?  係唔係 good boy?  弟弟識答 "係乖仔, 弟弟 good boy"

- 會同小慈爭玩具, 我地要求佢排隊, 弟弟識講: "到弟弟喇!  小慈到你喇!"

可以自己上落一級樓梯

學識左睇眉頭眼額, 做衰野前 (例如爬枱) 眼尾會望住我地, 最驚係俾爸爸望到, 爸爸一怒瞪佢就喊定先, 但又識話自己曳曳!  又係一個精甩邊 @.@

人地笑佢又笑, 而家仲學識假笑, 咪晒眼咁擘到個口有咁大得咁大哈哈有聲

近期鍾意不停自轉, 轉到自己話自己 "弟弟暈喇~~~"

今日先至有同事話弟弟超級似我, 假如將弟弟既相整黃整舊, 話係我細個既樣都肯定有人信喎!?

一定要拖住我, 又一定要飲可樂既弟弟

弟弟對眼真係靚到無話可說! 多謝天父

My lovely Boy!