輸左

今日球類運動班放學時, 小慈喊住出黎!!  問番導師咩事?  原來頭先玩比賽, 小慈俾人捉住輸左所以喊, 導師仲話下次唔好比賽叫小慈坐埋一邊, 小慈即刻話我下次唔玩.... 

嘩~~ 你咁都得呀!  作死你咁教我個女 !!!!  於是我好認真咁拉小慈埋一邊訓勉下

我: "小慈, 你記唔記得媽媽教過你要有體育精神呀?  比賽入面係唔係個個都會第一架?  你係學校食飯, 都有人第一, 有人第二, 有人第三啦, 你又話第十都好叻既?  你記唔記得呀?"

小慈仲喊緊不過有點頭

我: "如果頭先比賽係小慈贏左, 但係輸左既小朋友係度喊, 你會點呀?"

小慈: "我會唔開心"

我: "係羅, 比賽要有體育精神架!  你喊就係好小氣, 冇人會同小氣既小朋友玩架!"

小慈: "唔好呀~~"

我: "咁你下次輸左比賽時, 你要走去同第一個個小朋友講恭喜你!  你做得好好呀!  小慈贏左呢, 人地又會走埋黎同你講好叻呀小慈, 恭喜你呀....  咁羅!  咁大家先開心架麻!  下次知道點做未呀?  輸左唔要喊, 幾時都唔喊, 要做開心小朋友!"

小慈:  "知道"

**********************

夜晚食飯, 爸爸食第一, 弟弟食第二, 小慈第三, 我包尾 (次次都係要餵飽小明先輪到我食麻, 我都慣左), 就係呢個時候, 小慈話...

"爸爸你食第一呀!  恭喜你!  媽媽食第尾有冇喊呀?  冇丫麻!  如果爸爸媽媽都成日喊呢, 天父就唔鍾意呢一家人架喇!"

雖然有少少舉例不正確, 不過, 愚子可教也 ^^