畫班第 5 堂

 小慈真係好難估計, 當你以為一切相安無事進入軌道之際, 佢又會突然俾 d "驚喜" 你  

事源係今朝帶左小慈去畫班之後我就去買早餐食, 早餐食到一半就收到畫班電話話小朋友扭計, 問我係唔係附近叫我返去, 我聽到呢個電話好失望, 係咪玩野呀小慈?!  真係唔想去理佢, 慢條斯理食埋隻蛋先行返去

去到畫班課室門口, Miss Wong 正拖住喊到眼腫既小慈去廁所, 見到我就由我帶佢去啦, 一路行我冇出過聲, 眼神非常凌厲咁怒 bear 住小慈, 衰妹仲係度嗚咽, 係廁所出黎我就勁鬧佢

我: "你喊咩呀?  咩事成日都要喊呀?"

小慈: "我好掛住媽媽呀...."

我:" 媽媽放學就會黎接你架啦, 咩事要喊呀?  媽媽好唔開心對你好失望呀!  快 d 返入去畫畫, 媽媽係課室出面等你"

真係激氣呀!  我係真係對佢好失望, 係唔係一次又一次咁試我底線?  身痕要俾人鬧先安樂?!  上個畫班都一波三折咁想點?   

落堂了, 小慈戰戰兢兢咁俾佢 d 傑作我睇, 好細聲咁問我有冇得去冒險樂園? 

我: "你喊喎, 你覺得你仲可唔可以去呀?"

小慈: "我後尾有收聲好勇敢咁去畫畫呀!"  聲震震講到好委屈眼濕濕又想喊....

對眼都未腫完....

唉, 我又唔想去到咁盡, 我係唔鍾意佢喊, 咁之後佢又真係有改善, 但我又唔想咁輕易放過佢, 想佢付 d 代價, 於是我話:

我: "因為你喊今日只可以玩一個遊戲, 下次要開心上堂先有 10 個 coins, 咁你仲去唔去?"

小慈: "去!  我下次唔會喊架喇, sorry 媽媽!"

女呀女~~  你可唔可以唔好一啖沙糖一啖屎咁俾我呢?