去沙灘

小慈小姐已經講左成個月要去沙灘, 終於等到連續幾日都出太陽今日又得閒就去玩!  點知今朝落雨仲見到大大舊烏雲, 唔係麻?!  想去沙灘先黎落雨, 唔通連個天都唔鍾意我?!  點知小慈非常老定咁答我: 

"唔會架, 媽媽!  我地一齊祈禱啦, 希望天父叫 d 雲快 d 落晒 d 雨, 我地訓醒晏覺就有太陽架喇!"

真係喎, 真係要有小孩子既信心, 晏晝已經雨過天晴, 熾熱既太陽又冒出頭來, 天上面一舊雲都冇, 影都冇隻!!  不過今日沙灘超級超級多人, 爸爸泊到車已經好叻!!  同上次一樣, 弟弟點都唔肯用腳仔踩沙, 但今次肯落地, 踩住張蓆仲好自在添

呢個就係弟弟既活動範圍

小慈已經忍唔住要落水涼快一下

呢件泳衣既原意係塞 d 發泡膠入衫裡面令到個人浮起, 不過唔 work  @.@  唔知係小慈唔識放鬆自己浮水定係發泡膠既比例唔夠?  都係攬住爸爸穩陣

俾我發現到沙灘中間有溪水流過, 二話不說即刻抱弟弟落去玩, 呢度有水涼涼地弟弟終於唔抗拒

望著海一遍~~

愈來愈大膽, 自己沿住溪水行左出海!!

俾小慈家姐捉左出去游水!  呢張相好似我同我細佬細個, 可惜朦左少少

海水係有 d 凍, 弟弟好唔高興, 小慈冇眼睇

都係返去玩沙罷啦

來來回回整沙球, 好忙呀!

又搬石仔起堤壩

130 度既太陽油真係勁, 今次曬左咁耐兩姐弟都冇黑呀

幾勁, 弟弟個頭冇濕過!

完全玩到唔捨得走!

小慈不停話未天黑未夠鐘, 佢入左腦上次佢生日我地玩沙玩到真係天都黑晒先走, 下次再黎過啦, 小慈!