4 月中既時候, 我已經帶小慈返我一個好朋友既教會, 呢間教會最特別既地方就係佢有一個兒童詩班, 小朋友夠 3 歲讀 K1 就 welcome 呀 welcome, 歡迎參加^^
我小學中學都係讀基督教學校, 小學 4 年級時, 音樂老師要我地每個小朋友獨唱一首歌, 我仲記得我自己揀個首歌叫 "感謝天父", 歌詞係咁既:
小孩像我這樣大, 是否能夠謝天父, 只要凡事好好做, 誠實忍耐心溫和, 盡著本份愛天父, 用心歌唱讚美父, 感謝我天父 x2, 感謝天父, 我的天父
而家都仲識唱呢首詩歌, 冇幾耐之後就俾老師揀左去聖十架堂參加兒童詩班, 好在當年我媽咪准我參加 (我估最大既原因係唔駛錢同埋近屋企) 由 4 年級唱到小學畢業, 每個星期六練習星期日獻唱, 我真係好開心, 我識左好多唔同年紀既大小朋友, 學識唱好多詩歌, 參加過好多婚禮, 壯大左個膽見過下世面架! 當時仲有好多哥哥姐姐教樂理甚至教不同學器, 我淨係鍾意鋼琴, 但當年學琴太貴媽咪唔俾, 否則 5 年級開始學怕且我而家至少有 8 級
另一樣野我仲記得好清楚就係教會每個月都有一個星期日領聖餐, 好多人排隊去牧師度領聖餅同埋飲葡萄酒, 當時既我唔知點解好恨好恨, 硬係覺得 d 聖餅同酒係無上極品應該好好味, 不過我當年未受洗冇得領受, 一直至到中三我信左主中六受洗我先領聖餐, 喊到豬頭咁唔係因為終於有得食, 而係感受到神既大愛, 多謝神揀選我 :)
情意結, 我都好想小慈好似我咁係教會入面長大, 而小慈係唱歌方面叫做都有 d 天份, 咁岩又俾我知道有咁細個既兒童詩班, 於是幫佢報名! 唉~~ 真係一匹布咁長.... 第一堂帶佢返去, 變左樹熊不特止仲由頭喊到尾, 但攪笑地一離開左教會, 小慈不停咁唱住頭先教個首詩歌!?! 又係咁, 喊住都聽到! 第二堂返去, 小慈 180 度轉變, 我話我係 partition 出面等佢, 佢非常爽快咁同我 bye bye 自己行左入去, 我耐唔耐係 d 板中間裝佢見佢非常投入, 我幾感恩呀, 點知兒童詩班公眾假期放假, 隔左一個星期之後再返去, 小慈又唔肯自己入去仲一定要我坐佢隔離, 之後堂堂都係咁, 我坐係隔離就好地地仲不知幾投入開心, d 歌一教就識唱仲成日都聽到佢自己哼番出黎
畫班又係咁, 兒童詩班又係咁, 我已經就左佢好多次, 初時唔想逼佢唯有氹, 但我發覺佢成日反口真係唔可以太遷就, 越扶越墜, 勇氣可能係要逼出黎既, 於是今日我同佢講我坐係佢後面, 小慈自己同小朋友坐小朋友櫈, 媽媽係後面坐大人櫈, 小慈即喊, 我話你喊我就坐出面你仲見唔到我! 於是小慈默默流眼淚, 可憐兮兮咁喊左大半堂遊戲又唔肯玩, 哥哥姐姐撩佢又唔睬人仲成日擰轉頭苦瓜乾咁望我 @.@ 唔得呀, 要佢獨立第一件事就唔可以再黐住我, 今次我坐佢後面, 下次 or 再下次我就坐出面架喇!
今日教個首歌叫 Dona Nobis Pacem, 拉丁文解作求天父賜平安, 係莫札特作既加冕彌撒第五段《Agnus Dei》（羔羊頌）的後段, 係好多合唱團音樂節目中最常出現既曲目之一, Dona Nobis Pacem 確實使唱者, 聽者都感受到屬天的平靜安穩, 真係好好聽, 我都係第一次聽呢首歌, 成首歌都係得呢一句歌詞, 但旋律真係好正! 連喊緊既小慈都停住眼淚, 擰轉個頭同我講:
"媽媽, 呢首歌好好聽好舒服呀~~" 莫札特你好勁呀!!
仲有, 今日小慈終於成為正式詩班員, 落堂時茜婷姐姐將 "藍色薄薄" 派俾小慈令佢非常驚喜!
加油呀, 小慈! 你得架!
沒有留言:
張貼留言