睡姿

平時要返工, 係得星期日我先有機會偷拍到佢兩姐弟既睡姿!  而家 d 時間夾得幾好架, 首先係噯左弟弟瞓先, 我只要企係床邊佢就會碌下碌下, 講一輪太空話, 玩下張被就會自己瞓著

真係笑瓜我, 繼上次化身露宿者之後, 弟弟近來好鍾意用被冚住個頭瞓, 真係超攪笑, 同佢老豆一模一樣!!!  估唔到呢樣野都有遺傳 ^^

登登登櫈~~~  打開張被俾大家睇下佢既酣睡樣, 冚住個頭瞓覺唔健康, 我一等弟弟熟睡就會幫佢露番個頭出黎!  連將雙手枕住係頭後面瞓呢個 pose 都同佢老豆一樣樣!!  秋秋都好驚呢!

弟弟瞓左就到我同小慈一齊瞓晏覺, 唔知點解佢好鍾意瞓我地張床, 就算我唔陪佢瞓佢自己都會獨佔我地張大床!

當年小慈返 Nursery 要係學校瞓覺, 為左令佢安心 d, 有 d 依附, 就帶左屋企個枕頭返學陪佢瞓覺,  於是 "培養" 左小慈 "聞" 枕頭瞓覺既習慣, 一眼瞓就會問我地攞枕頭!  

好攪鬼架佢, 成日質個枕頭俾我地聞然後問我地 

"枕頭係唔係好香呀?"  

其實就冇咩味既, 因為小慈唔會流口水, 你估係弟弟咩, 由 3 個月大流到而家歲半有多喇  @.@

小慈 10 個月大開始一眼瞓就會拉衫袖聞下

小慈 11 個半月, 咩衫都唔放過

小慈 13 個月, 行緊都要拉件衫黎聞 :DDDDD

習慣係天生的