遠近慈明: 4月 2015

2015年4月30日星期四

做媽媽的要

媽媽說 --- by 羅乃萱師母

孩子渴了，問媽媽拿水喝。媽媽說：你先把杯子拿來！

孩子看不懂功課，想媽媽教。媽媽說：挑懂得做的，先做做看！

孩子被同學欺負，哭著要媽媽出頭。媽媽說：你先想想自己有沒有做錯的地方。

孩子面對考試壓力，很想逃避。媽媽說：溫一陣子書，休息一下，考試壓力總會有，但我相信你可以撐過去的。

孩子談戀愛了，一直隱瞞。媽媽心焦很想知道，但知道多問不會有結果，還是等有天他開金口最好。不過，不講也無所謂，反正年輕人的戀愛，都很快成為過眼雲煙。

孩子唸大學了，準備離家。媽媽很想為他張羅準備，但又覺得他大個仔大個女了，就跟他說：自己來吧，否則怎能適應到外國一個人獨立生活。

孩子找工作了，沒有頭緒。媽媽很想插手為他拉攏安排，但又知道孩子成人了，自尊自重是他要憑實力建立的，就跟他說：去闖吧！人家請你或不請你，好的壞的，都是一個難得的經驗。

媽媽是孩子從小的照顧者。孩子有甚麼事情出了紕漏，心底就會喊：我的媽呀。但隨著孩子長大，跟母親的感情牽絆愈來愈多，會愈捨不得放手，孩子也會愈來愈倚賴，甚至不能自主。若能早點醒覺，明白到培養孩子真正的獨立自主，做媽媽的要：

忍心，不要全天候隨傳隨到。

狠心，讓孩子經歷一下失敗被排斥選不上等等的遭遇。

放心，相信孩子有能力自我照顧與做決定。

信心，對天父有信心。明白即使我們做多周全的準備保護，孩子的一生是在祂手中。

所以今天，若孩子跟你說：媽媽，幫我……我們就回答說：孩子，你先試試……好嗎？

++++++++++++++++++++++++++++++++++++++

好感恩俾我睇到羅師母呢篇靈修分享, 天父透過俾羅師母寫作既恩賜, 祝福左好多好多既人! 呢一篇特別觸動我, 字字珠璣, 句句入心!! 我近來都為「幾時忍心、幾時放手」腦內不斷盤算, 特別係臨近測驗考試季節, 放手俾佢自己溫習實會考到一 PAT 屎, 睇住佢做錯功課實會俾老師打大交叉加隻 C, 成績已經唔好功課仲要做得衰, 兩邊不是人..... 但唔忍心唔放手唔試就係唔俾機會佢進步! 有時真係會唔自覺做多左, 好似小慈 7 歲個時, 工人姐姐回鄉探親, 小慈話想試下自己沖涼, 姐姐係度佢就冇機會, 係o個個 moment 真係叮一聲! 又試過小明話視藝堂要帶白膠漿, 我買左俾佢但佢冇放落書包, 第二朝臨上校車先醒起冇帶, 係個一刻我有諗過返屋企羅再送去學校俾佢, 因為我唔想咁小事又俾老師寫手冊, 但明明係佢自己冇心裝載要佢學習承擔後果, 否則下下旨意我, 於是忍心唔理佢, 結果, 放學返黎手冊冇事, 因為弟弟問左小慈家姐借白膠漿 @.@ 咁都俾佢過到骨?! 不過都叫識動腦筋解決問題~

兩個小朋友, 小慈就擔屎唔偷食, 但自己冇信心咩都要問過你先敢做, 從不越雷池. 弟弟, 我覺得佢特別難教, 佢轉數太快諗到就做冇顧後果, 好似早前, copybook 無端端要寫 8 頁!!! 老師咩事呀? 放長假都係寫 4 頁, 做咩無啦啦寫咁多? 問弟弟, 佢話唔知點解老師會咁 (查實媽媽群組入面一早已經通風報信係因為小朋友曳, 老師先罰佢地寫多幾頁) 小明擺到明隱惡揚善我梗係丙佢啦! 於是再問多佢一次, 終於肯講..... 老師係黑板俾功課寫 4 頁 copybook, 小明好大聲「下」左一聲, 老師即刻改做 6 頁, 其他小朋友見狀又「下」, 於是 8 頁, 終於冇人敢再出聲..... 之後弟弟當然犯眾憎, 俾人冠以「死恩明」稱號 (-_-)' 其實好小事, 最令我地痛心係弟弟唔坦白, 坦白從寬抗拒從嚴麻, 佢話驚我鬧所以唔講, 咁我話你好可憐姐, 一家人都唔可以暢所欲言係一件好可悲既事, 訓斥一番之後, 爸爸話一定要同全班講對唔住, 我教埋佢老師一入課室你就舉手講 "I am sorry that I said「下」yesterday, please forgive me!" 弟弟有照做, 老師摸下佢個頭話尋日唔止你一個人「下」, 但得你一個講對唔住 (弟弟話老師係講英文佢唔識講番但意思係咁喎).... 希望係呢件事上面弟弟學識要尊重老師、坦白、做錯要認、修補關係, 肯定佢地個班唔係第一次「下」個老師架勒....

教導孩子是父母一世的學問, 所以多聽其他人意見, 多取經, 多反思, 得益的一定是自家小孩子!

共勉之~~

2015年4月28日星期二

南拳

之前弟弟一直怕怕羞羞唔肯耍拳俾我睇, 今晚明明上床準備瞓覺, 突然起身興致勃勃話要我幫佢錄影, 仲話幾分鐘好快架咋! 好啦, 見你咁有誠意~

試 post video

我今日表演南拳既...... 多謝大家欣賞 :)

2015年4月27日星期一

參觀

為配合科學書教授 Famous Parks in Hong Kong, 小慈參觀濕地公園, 弟弟參觀 Zoological and Botanical Garden. 去之前又要上網睇資料, 又要執樹葉畫圖畫認花樣, 攪左成個星期先出發, 「我好心急想快 D 到星期一」弟弟講左 N 咁多次! 今日風和日麗, 清風送爽, 天氣極好, 一年級第一次出外參觀, 終於出發~~~~

之前班主任王老師出去讀書, 岩岩返學就帶佢地出去 outing, 開心到成班仔飛起啦! 小明勁掛住班主任, 一見王老師影相即刻做攝石人攝左埋去 >v<

出去參觀要用小背囊自備防蚊、防曬用品, 小食文具水亦要執齊, 小明好大汗, 又易發燒, 出去參觀實出晒汗, 我怕佢一冷一熱易感冒, 於是吩咐佢要用毛巾仔攝背脊, 一早怕佢熱係屋企唔攝住, 上左旅遊巴臨落車前先攝啦, 自己攝唔到就搵人幫手. 呢度邊個係我個仔? 咪就係有鴨仔攝背脊個個羅! 小明話全班得佢一個有得攝背脊咋 ^^ 媽媽見到呢張相, 知道佢聽晒媽媽話有跟足指示, 真係巧滾動!! 乖~~

睇左 4 款腥腥、大龜、丹頂鶴、好多雀仔、科學書上介紹既花同樹都有睇到, 小明最鍾意既 Venus fly trap 就冇, 淨係見到豬籠草都好開心

四圍望既郭恩明

參觀教育及展覽中心

好出名既花豹標本

去 reptile house 找 reptile 既代表 -- 龜先生

有秩序, 又乖

老師獎佢地去公園玩

幾時都話戶外學習成效大架啦!

小慈家姐就辛苦 D, 濕地公園太遠, 搭一個鐘頭車去, 參觀一個鐘頭, 搭一個鐘頭回程, 聽到都肉赤! 不過佢都話見到鱷魚貝貝, 又睇到黑面琵琶, 彈塗魚, 又有導遊全程講解, 要戴一個特別既耳機先聽到導遊講野, 好攪笑

呢頂漁夫之帽係我架, 估唔到小慈都岩戴 ^^

感謝天父, 兩姐弟出去參觀冇俾蚊咬, yeah!!

2015年4月26日星期日

盪鞦韆

成日都笑弟弟輪盡, 其實佢係冇咩機會做運動就真! 放學返屋企都日落西山, 趕功課食完飯都夠鐘瞓, 體育堂又唔係日日有, 於是叫做盡人事地報體操班、武術班、游水班等佢有機會郁下. 而家既小朋友真係同我地細個好唔同, 我地細時好似每日都好多時間玩咁架, 睇電視玩玩具落街跑好耐都唔天黑格? 可能就係返半日同返全日學既分別, 時間唔見駛. 平日冇機會, 唯有等星期六日啦, 但公園都唔係個個星期有得去, 天氣唔好就困係屋企, 所以, 路過我地都會盡量俾佢地玩~

今日天朗氣清, 第一時間去公園, 兩姐弟最鍾意玩鞦韆

每一次, 小慈都做示範教弟弟打鞦韆, 幾時踢腳, 幾時縮腳

腳仔冇力既小明學唔識仲要人推, 今日推到我手軟咪唔理佢等佢個鞦韆冇力停低就閃人啦, 點知等極個鞦韆都唔停既? 原來小明終於學識盪鞦韆, 踢腳既時間終於岩喇!!!!!!!

佢自己都好滿意

Yeah! 我終於唔駛再推佢喇 ^^

2015年4月24日星期五

夢

我發惡夢...... 夢見 Jimmy 跌親, 爆晒殼流晒血, 夢入面秋秋同我講救唔番架喇, 同 Jimmy say goodbye 啦! 喊到我死死下, 好唔開心 v_v 但瞓醒就趕返工趕返學, 夢境拋諸腦後

到放工返屋企, 先同秋秋講番我發惡夢, 順便望下 Jimmy... 唔望由自可, 一望 Jimmy 唔見左!!!! @.@

缸既蓋移開左一半, 但壓住缸頂既野冇塌到所以冇人發現!! 即刻發散晒全屋人搵 Jimmy! 琴底、枱底、櫈底.... 所有黑既地方平時佢最鍾意呢埋既地方搵....

終於, 秋秋係鞋架底搵到, 成身都係塵, 縮埋一堆個樣好似好驚咁, 第一件事檢查下睇下佢有冇爆殼.... 冇, 不過近龜尾崩左一塊, 估計佢由窗台掉落地時撞崩左! 即刻同佢沖涼, 浸浴, 俾龜糧佢食... 收起佢座山, 唔俾機會借力爬高偷走 > <

曳曳 Jimmy!! 曳曳!!!