時間真係過得好快, 9 歲既小慈係一個好家姐, 非常非常愛錫弟弟, 有時見佢同弟弟相處, 我覺得佢做埋我既角色, 做左一個小媽媽咁去照顧、憐惜弟弟. 好重視其他人既感受, 將人地既快樂放係自己之上, 做好多野去氹人開心, 好純真, 好易話為既一個人, 小慈真係好乖! 就算係生日問佢想點慶祝, 小慈都可以答我冇所謂 @.@ 我咪激佢話, 「咁呀. 咁算架喇喎, 唔慶祝架喇噃!」 激到佢係咁跳: 「喂呀! 我都唔係咁既意思! 一年得一次生日架咋! 媽媽呀~~~」 咁你想點丫? 小慈: 「媽媽, 不如你俾 D 驚喜我丫!」 ...... 幾似 D 老細話自己唔知自己想要咩, 你幫我諗下我想要咩, surprise me ..... 唉..... 咁睇得起我! 唯有搵 D 佢未做過既野去 surprise 我既寶貝女啦!
9 歲生日要驚喜 -- 打 War Game
呢個場係長沙灣, 要識途老馬先搵到
成枱都係武器 :)
打 war game 梗係要一大班人先好玩啦
弟弟幫手做示範, 一定要戴眼罩, 不能近距離開鎗
中左鎗要蹲下數 10 秒先可以再開始
大人唔會跟入去, 靠睇呢 3 部 CCTV 睇戰場既情況
我好鍾意柏弦爸爸影既呢幅相 -- 食大茶飯 ^^
隔離枱既姐姐哥哥射 BB 豆, 重裝備好多
12 位小朋友分成兩小隊, Team A 成員包括小慈、小明、Bernard、Enson、Jackco and 搴搴
Soldier are you ready?
Team A Team B 大合照! 成隊車路士打 war game 好爆笑! 下次應該帶兩套唔同色既波衫方便分敵我
戰區!! 小慈小心唔好殺錯良民呀!
個戰場好逼真! Team B 唔知呢左去邊, Team A 快 D 搵地方佈陣啦!
小慈呢左入浴缸 >.<
小明呢埋梳化後面
走向神秘未知既地域
發現敵軍!!!
一見多人圍捕, 小明次次都好醒即刻蹲低扮中槍, 再趁機密密入子彈
每場戰役歷時 30 分鐘, 賽後檢討稍事休息又繼續, 今日總共玩左 3 場成班小朋友係入面喪跑, high 爆!
唔夠皮啦! 下次組夠人又玩過 ^^
除左玩, 我地一班由細識到大既朋友仔梗係要食餐飯慶祝生日啦, 大家都 9 歲了~
2 圍包廳, 好有飛屎 :)
各自各精彩, 睇波既睇波
玩 UNO 既玩 UNO
玩小遊戲既又一組 (小明係真係鍾意埋家姐堆架 >v< )
遊戲姨姨 Shirley 仲帶大家玩估領袖
估唔到 9 歲既呢一日, 小朋友終於可以自己一枱, 感動! 感動! 爸爸媽媽有餐安樂茶飯食
Happy Birthday to you all!!! 冬晴 3.20; 搴搴 4.2; 熙熙 4.3; Enson 4.11; 巧巧 4.15; 小慈 4.20; 柏弦 5.17
細佬們爭住吹蠟燭, 熙熙極力阻止最細既琛仔, 勁攪笑 >v<
終於要一人吹一次, 小明吹到變金魚面 ^^
都唔夠, 排隊搵多多姨姨再吹, 笑 C 人喇!!
Shirley 姨姨好有心機將 D 相砌埋一齊
Happy 9th Birthday :)
每年一個數字蛋糕, 多人先食得晒架
Happy Day!! 祝各位小朋友身體健康, 讀書聰明, 醒目過人, 兄友弟恭, 孝順父母, 開開心心!!
沒有留言:
張貼留言