箍牙

真係冇諗過 8 歲既小慈需要箍牙!  係呀, 箍牙呀!  事源小慈 3 歲開始睇牙醫, 一直到入小學有學童牙科保健, 福利黎架麻 $20 一年梗係睇啦.  就係小二既牙科保健, 無端端寫紙再約時間要我地返去覆診, 唔慌好野啦!  果然, 姑娘俾左張 X-光我地睇, 話小慈左上顎天生冇左一隻恆齒, 其他大牙因為佢顎骨太細冇位完全出唔到, 夾硬逼出黎成副牙一定歪晒, 建議我地睇箍牙醫生!  @@!!  小慈成日話牙痛, 仲以為係出牙既正常反應, 點估到係因為逼住出唔到咁痛先得架....... V_V..... 唉

於是, 咪去睇箍牙醫生羅, 同小慈影相作記錄中~

箍牙醫生俾左兩個方案我地:  (1) 因為唔夠位, 先剝 2 隻 BB 牙, 等大牙有位出, 天生左邊少一隻牙仲好, 一定夠位出晒, 另一邊有可能出晒恆齒之後要再剝 1 隻牙先夠位, 出齊再箍, 前後剝 3 隻牙  (2) 由得佢天然甩牙換牙出牙, 出齊晒先再箍, 但因為佢本身唔夠位, 所有牙會夾硬出黎位置一定歪晒, 到時先再箍就會辛苦 D 同埋時間會長 D, 點都一定要箍牙, 因為而家小慈既恆齒好大隻已經嘟嘴, 唔夠位一定會向前生變成哨牙!

我地選擇方案 (1), BB 牙遲早都要甩, 人為剝左佢反而大牙夠位出仲會出得靚, 搏得過啊!  不過真係估都估唔到顎骨細, 面細, 面尖會引致箍牙既必要!  面尖尖既靚女係需要付出代價啦......

方案決定左就需要做一個牙模確定位置

小慈成副牙出左黎, 而家要剝上顎最尾數上第二隻大牙, 剝左希望最後個隻大牙夠位出

唔做模都真係唔知小慈已經有哨牙傾向

呢個口仔幾細

暫時會係剝牙痛, 之後食野咀嚼冇咁方便, 等大牙出晒, 睇情況有冇需要剝第 3 隻牙, 都已經係 11-12 歲先會發生既事, 小慈, 辛苦晒!  堅持住呀~~