吉屋一間
個廳大過我地原先間屋
廚房竟然藏住過百隻曱甴!!!!!! 好在現代科技進步, 用 4 個滅虫蛋就暫時令佢地絕種
俾兩姐弟揀, 小明揀左呢間係佢間房
小慈揀左呢間, 實情係呢間房大 D 預留俾弟弟同工人姐姐
發現左幾間房既窗台係互通既, 打下招呼先~~
呢間就係我既勁大主人房
咁大個窗台真係令我一見鍾情, 尤其係窗外既河景, 於是...... 扑鎚 ^^
我咁大個女, 話就話搬過 2 次屋, 第一次係由一間房仔搬去另一間房仔, 第二次就由房仔搬去一間大屋! 一個人既時候雜物真係好少, 再加上由房仔搬去大屋 D 野直頭任擺都冇所謂, 個時仲可以有間房養 1 隻龍貓, 個廳絕對可以放兩張 6 呎梳化....... 但隨住小慈小明既出世, 二人世界變成一家四口再加工人姐姐, 真係冇估到我地竟然有咁多野!!!!! 玩具都已經有 6 箱, 小明仲要咩都唔俾我掉, 咩都話: "我仲玩架! 我仲要架!"...... 到後來唯有唔俾佢知, 趁佢瞓覺靜雞雞掉減 D 又將 D 太 BB 既玩具送俾其他有需要既人, 唔係咁做真係攪唔掂啦! 呢架豬仔車已經玩左好多年, 新屋係柚木地板唔玩得大車車, 同埋佢個 PAT 都開始大塞唔落架豬仔車, 要小明放棄佢都好傷心架, 最後佢將架貼車牌既私家車送俾其他小朋友, 真係估唔到佢既車牌, 就係爸爸以前架車既車牌, 仲話佢同小慈家姐已經儲緊錢俾爸爸買新車.....
堆到上天花板都未執完, 仲有兩間房未執, 搬屋公司安排左 40 個大箱 20 個小箱俾我地, 但我覺得唔夠用.... 真係有 D 淆底.......
一邊執野, 一邊新屋係吉屋一間要添置新傢俬, 辛苦老公日日新舊屋兩邊走 ^8^ 有窗簾有傢俬, 成間屋既感覺好唔同, 開始有溫馨既感覺~
本來好理想主義地掉晒唔用既野先 PACK 走, 點知到最後, 時間已經唔容許我地咁做, 唯有見到咩都入箱先, 去到新屋先慢慢拆慢慢掉啦, 於是就攪成咁既畫面 >.<
個廚房先慘不忍睹呀, 辛苦晒姐姐了!
搬屋搬到 10:30 pm, 新屋既第一餐唯有叫 Pizza
因為要適應返學時間早睡早起, 工人姐姐唔放假都要執好個廚房, 仲勁到已經可以即刻煮飯!! 感恩我有個幫得手既工人姐姐 ^^
經過一個星期既努力, 間屋見得人了!! ^^
一開門就係飯廳
客廳一邊做書房
姐姐已經將廚房執得企企理理, 我最開心係 I Love Kitchen 度買左個岩駛既刀架 :)
小慈房, 小慈要求一入房就可以碌上床瞓, 唔肯再爬樓梯, 於是我地放棄高架床既設計改為上面係衣櫃下面係床, 小慈對自己間房好滿意架
另一邊就做書枱書櫃
弟弟 and 工人姐姐房~ 弟弟瞓下面, 佢張床終於大到可以放晒所有公仔
勁大窗台既主人房原來好曬同埋睇到對面屋, 於是我用個大書櫃頂住, 岩岩好呀 ^^
弟弟間房放左姐姐條樓梯之後就冇晒位, 書枱唯有放出廳同爸爸貼背脊等爸爸監督佢做功課
客廳另一邊就係梳化, 我有我睇電視, 秋秋有秋秋打機了~
梳化後邊就係飯廳, 鋼琴用既時間相對少都係拍牆慳位 D
最重要係掛晒 D 相架上牆! 呢 4 個木箱好重要, 小慈小明 1 個月大同 1 歲大既手腳印, 整唔番架喇 :)
搬屋其中一個主要原因係想俾小慈有自己間房做功課溫習, 而家仲可以請昊昊入房一齊玩 ^^ Photo taken by Young Man :)
新屋宴客既第一餐梗係要宴請爺爺嫲嫲姑媽姑丈黎食, 順便迎接中秋節 ^^
感恩天父俾我地有藏身之所! 無論何時何地, 無論我地身處世界邊一個地方, 天父一直保守愛惜接受與不接受祂的人, 因為衪叫日頭照好人、也照歹人、降雨給義人、也給不義的人 :)
沒有留言:
張貼留言