又到一年一度工人姐姐放大假回鄉探親既日子, 今次返 10 日, 臨上機前佢竟然同我講唔駛再一年返去一次, 可以等續約先返去, 真係? 我估佢已經習慣香港既生活唔再思鄉, 都好既, 咁即係下一次佢再返去時, 小慈 6 歲 小明 3 歲半, 可以帶晒佢地一齊去旅行! YEAH!
今年又係安排姐姐係小慈要返學既日子走, 又係諗住我淨係湊弟弟一個 ok, 唉~~ 估都估唔到又重蹈覆轍, 而家 1 歲 8 個月既人仔竟然同 9 個月大時一模一樣! 都係極度黐身!! 陪佢坐係度玩好地地, 我一起身佢就即刻喊到癲左!! 不論我係企圖去廁所 or 入廚房 or 有時我只係起身攞張紙巾, 弟弟都係即刻死攬住我對腳唔俾我行, 喊到塊面紫色係咁叫媽媽抱抱, 我真係想叫救命啦 @.@
好在弟弟都仲要瞓晏覺, 餵飽佢食 brunch 再沖埋涼, 佢可以瞓 3 個半鐘頭, 我就趁呢段時間做家務同埋煮飯, 我已經煮左 3 日, 不過都係好簡單既菜色, 令我最開心既係弟弟非常欣賞我煮既野, 食一啖就即刻雙眼閃令令咁望住我講 "yummy~~" 一啖都未吞就即刻擘大個口講: "I want 粥粥" 慌死我唔俾佢食咁, 真係好窩心 ^8^
沒有工人姐姐的日子 Day 4, please call me 國寶祖安!! @.@ 我一直都係一個非常醒瞓既人, 而家間房得小慈小明兩個小朋友自己瞓, 多多少少都有 d 唔放心, 弟弟呢兩晚都有半夜喊, 我即刻彈起身裝佢又係合埋眼喊個隻, 拍佢兩下都 ok, 但驚嚇我既係小慈!! 次次入房都見佢裸睡!! 成張被跌左落地下仲打出晒個肚腩!! 咁攪法就令到我成晚扎醒, 一醒左就入去同佢地冚被, 我每次都有斬獲架, 唔係幫小慈執番張被就係幫弟弟拉番張被出黎, 佢對飛毛腿真係咩都可以踢走!!! 點解佢地遺傳唔到我既僵屍瞓覺法呢? 梁山伯個招放碗水係我隔離我真係唔會整瀉架, 而家咁好攰呀真係.... 不過對住弟弟都開心, 佢真係好可愛!! 現正處於鸚鵡學舌階段, 呢幾日我同佢講番多 d 廣東話, 佢又識跟住轉 channel, 仲講得幾好, 弟弟識講:
- 俾丫! 俾弟弟丫!
- 咩話?
- 係個度!
- 唔係呢個
- 蚊蚊咬呀
- 幫手啦
- 洗手手
- 要粥粥 / 要麵麵
- 可唔可以? "可以" 知唔知道? "知道" 洗唔洗手? "洗!" 飲水水? "飲!"
- 弟弟瞓覺啦, 小慈瞓覺
- BB 鱷魚 媽媽鱷魚
- 指住我叫 "媽咪, 媽媽"
- 瞓覺前用被被冚住自己個頭唱 "媽咪媽咪 where are you? 啊~~ 係呢度喎!"
- 拉櫈, 然後叫 "小慈坐靚靚"
- I want to 睇 Barney, BJ, Baby Bob 呀! 唔要 Dora 喇!
- 食食下 brunch 問我: "小慈呢? 爸爸呢? 姐姐呢?"
今晚去姑媽屋企黐餐, 三表姐弟屋頭追屋尾, 仲玩埋在家裡捉迷藏, 笑聲不絕非常開心, 小慈更破紀錄地第一次 15 分鐘自己食晒碗飯, 終於有一次快過昊昊! 昊昊學緊小提琴, 非常大方借俾小慈咋帝拉一陣, 初學者既琴聲真係.....
