弟弟食粒粒餅

弟弟同小慈家姐真係好唔同, 弟弟真係為食好多!  通常晚飯之後我地就會食飯後果, 弟弟次次都望到眼甘甘, 吞晒口水

而家既我真係比小慈當年放鬆左, 以前好跟指示去湊小慈, 6 個月先俾糊仔, 1 歲先食橙, 樽裝糊仔 / 罐裝果汁唔新鮮一定唔俾, 連加水開稀既米糊都唔想俾, 怕有添加防腐劑, 餅仔糖果呢 d 雜糧更加好少俾, 因為個時既心態係 -- 小慈 2 個月大已經厭奶, 每次餵奶都想喊, 餵成個鐘不特止, 仲要橫抱, 直抱, 噯佢訓住飲, 企係度餵, 用杯飲, 用飲管飲, 用針筒餵, 用匙羹餵.... 都係飲得 120-130 ml, 真係已經好氣餒, 如果俾其他野佢食, 試過咁好味既野咪仲更加唔飲奶?!  不過當時唔識諗得樂觀 d, 其實應該係咩都俾佢試, 要引起佢對食物既興趣先岩丫麻!  唔變通湊到自己咁辛苦.....

所以而家既我係放鬆左好多, 由陀住弟弟已經係咁, 完全冇戒過口, 仲冇咩當自己係大肚婆, 一來弟弟又大大隻隻, 食得好, 訓得好就更加咩都冇所謂, 二來弟弟個為食樣真係令人忍唔住咩都俾佢食, 而家既心態係 -- 試少少冇所謂啦, 哈!

今晚又係咁, 我地本來食緊蘋果, 都已經俾弟弟咬左幾啖, 點知個衰仔仲係呱呱嘈扭計!  咁岩我又買左盒粒粒餅諗住遲 d 先開俾弟弟試既, 就而家開黎塞住弟弟把口先~

嘩~~~ 不得了呀!  弟弟簡直係搶住食!  仲好有節奏咁 '咬', 冇牙既佢識得咬野真係笑死人, 仲食唔停要我地一粒接一粒咁餵, 我地手腳慢 d 都俾佢鬧.....

為食既弟弟真係勁勁勁可愛 ^8^