近排就成日都要入去弟弟張網床度, 然後將弟弟既所有波都掉晒出黎, 再吩咐我地執番再掉番入網床俾佢咁
我就梗係唔會咁順灘, 專登瞄準小慈既 pat pat 呀, 頭呀, 肚腩咁掉佢, 掉中其實唔痛既, 不過小慈已經 V 嘩鬼叫, 興奮非常! 一路叫住唔好呀, 一路卡卡聲笑個隻呢
Day 1 已經吩咐左小慈掉波要掉落地下, 拋太高會整爛 d 燈呀, 櫃呀, 講到咁, 大家都知道故事既發展係咩啦!? 今晚其實就唔係拋波, 小慈係羅左一隻佢自己叫 octopus 既野黎玩, 係一個好似海膽咁既樣, 但可以彈下彈下又林林地既軟膠黎既, 有 d 小朋友好怕呢種質感, 但小慈就極度歡喜, 鍊到好過引個隻! 又鍾意逐條鬚咁 meet 佢, 淨係吊住一條鬚成隻 octopus 就會彈高彈低......
案發經過係咁既: 我同秋係 sofa 睇緊新聞重播日蝕過程, 小慈就羅住 octopus 企係 sofa 度, 估計小慈又係吊住 octopus 一條鬚, fing 得大力左就掉左上電視櫃, 咁岩就擊中櫃上面個相架, 相架應聲倒地, 先撞倒電視機再跌落地墊, 一地都係玻璃碎....... 我既即時反應係擰轉頭喝左小慈一聲 "小慈!!!!" 衰妹自己都估唔到咁大件事, 一切發生得太快, 我再喝一喝佢就即刻.... "嘩~~~~~ "
真係吹漲, 我都未鬧佢就喊左先, 好彩弟弟訓左姐, 唔係平時弟弟坐係地墊, 咪成頭都係玻璃碎羅?!! 真係丫! 冇佢咁好氣, 小慈有小慈喊, 我地 3 個大人即刻攞吸塵機, 攞布, 搬開 d 野做清潔, 我地抹咁耐衰妹就喊咁耐, 連好脾氣既爸爸都忍唔住鬧小慈: "做錯事仲喊! 收聲!"
攪掂晒 d 野, 我坐番係 sofa, 小慈仲係眼紅紅咁, 我望一望佢又喊! 拉佢過黎訓話
我: "小慈, 知唔知自己做錯咩事?"
小慈流住眼淚好可憐: "octopus 掉左上去爛左玻璃......"
我: "記唔記得媽媽話掉波波要點架?"
小慈: "波波要掉落地下...."
我: "咪係羅! 波波要掉落地下, 掉得太高會整爛燈燈記唔記得呀? 出去公園玩就可以拋到 d 波波好高都得, 但係我地屋企細, 掉得太高就會整爛 d 野, 而家整爛相架羅, 點算呀?"
小慈: "下次要掉落地下, 爸爸媽媽要掃地, 爛晒咯....."
我: "係呀, 爸爸媽媽要掃地, 成地都係玻璃碎! 弟弟同埋小慈踏到腳仔會損晒, 流血架! 下次仲整唔整爛相架呀?"
小慈: "唔整爛......sorry 媽媽, sorry 爸爸!"
我: "小慈乖喇, 媽媽攬番你, 錫番啦, 下次要好小心喇, 知唔知?"
小慈要到我肯攬番佢先唔喊, 諗番起咁耐以黎, 小慈今次先係第 1 次整爛屋企既野! 佢一直都係一個好定, 好穩陣, 好斯文既小朋友, 又好珍惜所有玩具, 而我地屋企都好少會整爛野
檢討自己, 我今次反應都大, 小慈又唔係專登, 佢真係甩手之麻..... 不過我地今次咁大陣象, 小慈一定刻骨銘心, 以後拋波怕且都會有陰影......
後記
果然係有後遺症! 今朝起身, 小慈坐係 sofa 指住電視櫃同我講:
小慈: "媽媽, 爛左勒! 冇左相架喇....."
我: "點解會冇左相架既?"
小慈: "小慈頭先羅 octopus 掉左上去, 相架跌左落黎爛晒咯...."
我: "小慈尋晚唔小心係唔係呀? 下次仲會唔會呀?"
小慈: "我下次會乖喇, 掉爛電視機媽媽冇得睇羅!"
我: "小慈都冇得睇啦!"
估唔到經過左一晚, 小慈訓醒第一件事都係諗番起尋晚既野.... 真係刻骨銘心呢
跟住夜晚仲攪笑, 小慈玩神奇畫板, 失驚無神識自己渣筆, 仲畫左個我識睇既公仔
似模似樣!! 小慈畫左個唔開心既小朋友! 問佢點解小朋友會唔開心既?
小慈: "因為佢曳曳打爛野, 爸爸媽媽嬲佢所以佢唔開心羅!"
我: "咁小朋友點先開心番呀?"
小慈: "爸爸媽媽錫番佢就開心架勒!"
沒有留言:
張貼留言