弟弟出玫瑰疹

星期五 -- 放工返屋企, 弟弟發燒! 唉~~ 之前 d 傷風明明已經好得 7788, 點解會發燒架? 好在屋企有退燒水, 點知一食退燒水就冇事, 4 個鐘後又燒過!  半夜 2:00 am 喊醒, 一摸佢成個火爐仔咁, 仲已經燒到 39.9 度 (即係差少少 104 度呀!)   嚇到我死, 即刻又餵退燒水, 用濕毛巾同佢抹身, 換片, 用退熱貼貼額頭, 開大 d 個冷氣......  攪左成個鐘見佢有退燒既跡象先安心 d...

星期六 -- 捱到 9:00 am 醫生開門即刻同佢睇! 呢個兒科醫生都幾好架, 小明由細睇到大, 小慈都由 2 歲睇到而家, 近近地, 有咩事都可以即刻搵佢麻!  醫生好鎮定, 一聽到小明燒下唔燒下, 又冇鼻水, 冇咳, 冇任何病徵, 已經好肯定小明係出玫瑰疹了! 

真係估唔到小明 7 個月就出, 小慈 1 歲先出呢!  醫生話玫瑰疹只係過濾性病毒, 可以由 6 個月至 2 歲既期間出, 有 d 小朋友 3 歲都會出, 有 d 出完又再出, 所以弟弟都唔算好早, 又係個句, 第 2 個 bb 咩病都會早過人....  醫生淨係開左高低燒藥水, 知道小明吽出疹個心都定 d, 平時小明病都好少會發高燒架麻!

星期日 -- 雖然已經有心理準備, 但弟弟餐餐食完退燒水都仲係燒到 39.7 就真係好擔心, 高燒藥水都食左幾次!  但弟弟精神又冇咩野喎, 冇扭計冇喊, 撩佢都仲笑咪咪, 奶奶又全部飲晒, 玩具都肯玩, 只係唔鍾意食藥, 成日要我抱, 訓得好少好容易醒, 不過 3:00 pm 既時候就恐怖羅~~  睇住弟弟手指腳趾連口唇都變晒紫色!!!  全身起雞皮, 但探熱又得 37.5 度喎!?!  仲諗緊係唔係冷氣太大凍親之際, 著完長褲外套就黎料勒...... 破紀錄既 40.5 度呀~~~   癲架?!!  駛唔駛咁高呀?! 嚇到我地都標冷汗, 俾完高燒藥即刻掉弟弟落浴缸!  仔呀仔, 唔好嚇呀媽呀!! 個衰仔都唔知係唔係病到 short 左, 同佢沖涼竟然笑, 我就真係笑唔出, 好在弟弟只係嚇左我半粒鐘跟住退燒, 手指腳趾嘴唇都變番粉紅色......

捱左 5 日, 今日終於見到陳小姐了  (玫瑰疹, 英文名係 Rose Chan)

本來醫生話燒 3-5日, 退左燒就會出疹. 咁弟弟真係咁好彩燒足 5 日, 仲要出左疹都繼續發燒到 38.2 喎!!  小慈個時燒 3日, 仲要燒左 1 次 39 度咋, 所以個個反應都唔同呢~~   弟弟出疹既位置係耳仔後面, 心口 & 肚臍對落最多, 淺粉紅色, 遠睇唔覺架!

穩陣起見我都打俾醫生問個究竟, 醫生只係反問我, 弟弟有冇燒到尋日咁高呢?  我答, 咁又冇, 尋日下下都燒到過 39 度架, 今日 38.2 or 38.3 咁羅!  醫生就話已經叫做退緊燒, 只係弟弟退得比較慢 d, 唔駛太擔心, keep 住餵退燒水就冇問題.... 問完醫生就放心晒

連續 4 晚都要半夜起身餵弟弟飲退燒水, 仲要弟弟訓得唔好有時要抱住佢好耐, 我而家成個人都好似慢左半拍, 對眼隨時合得埋.... 真係好攰, 希望弟弟今晚一覺訓天光啦! 

不過呢幾日都有新發現!!  第 1 就係有時弟弟抱極都喊時, 只要我拍住佢背脊哼  "The Wheels on the Bus" 佢就會即刻靜晒, 有時仲望住我笑添!  萬試萬靈, 好攪笑架  :D

第 2 就係弟弟學識 180 度擰頭 -- 即係快速以及大幅度咁將個頭由右轉向左再轉向右!!  7 個月大既 BB suppose 係能夠快速地跟隨物件移動既, 而弟弟就將呢項技能應用係食藥上面, 每次見到支針筒, 佢就會 180 度大幅度擰頭企圖避開我地餵藥.....  真係....  佩服