星期六晚去完爺爺度返屋企見佢有 d 乞嚏, 以為佢只係鼻仔痕啦, 個晚就慘勒... 12:00 am 開始喊, 抱起佢會收聲, 放低佢半個鐘頭又喊, 好扭計!! 斷斷續續咁抱佢又放低, 攪到 3:00 am...後尾要攬住佢先訓到... 已經攰到我成隻積咁 @.@
星期日佢又冇咩野喎, 笑口常開咁成日追住小慈家姐添! 係開始多乞嚏, 仲有透明鼻水, 即刻俾保嬰丹佢希望震得住, 點知夜晚開始鼻塞仲有 d 體溫高 37.4, 又未去到發燒, 為安全計都係俾定退燒藥佢食, 雪櫃仲有支睡前服既止痕抗敏收鼻水都俾佢食埋
星期一好左 d, 不過弟弟訓到 3:00 am 之後就慘羅!! 因為佢鼻塞, 一放低佢係床仔就大喊, 連攬住訓都唔制, 勁踢腳扭腰! 為左唔嘈醒全家人, 我要抱住佢係間房度行來行去.... 3:00 am 行到 6:00 am 呀! 得番半條人乾想唔返工, 可惜要返公司交帶 d 手尾, 好在都可以放下晝拿拿聲同弟弟睇醫生!
我咪問醫生羅, 關唔關打針事呀? 幾次病都係打完針就黎既? 醫生幾抵死呀, 佢答我: "咁岩姐!" 跟住講左個比喻....
醫生: "好似你鎖門咁, 有賊經過咪入唔到黎羅, 不過你遇到 d 惡既賊, 點鎖好度門都爆開你隻窗, 整爛你度門咁入黎羅野啦! 要病就會病, 周圍都係菌, 你屋企兩個 b 年紀又咁近, 可能係家姐惹番黎, 不過佢抵抗力好 d 冇病發之麻, 弟弟而家係傷風, 唔係流感, 冇發燒, 好快冇事架勒....."
西藥既唯一好處就係可以止住 d 病徵, 等你覺得冇咁辛苦, 果然弟弟食左幾日藥, 已經冇鼻塞, 訓到覺, 仲好好胃口, 今朝早餐食麵包, 弟弟片住車咁埋黎問我地羅黎食, 小慈就好似餵金魚咁餵佢, 好 cute !
希望佢唔好有後遺症, 上次新年前病左, 又係流鼻水, 之後演變成咳, 足足咳左 2 個幾月呀陰公 @.@
沒有留言:
張貼留言