小慈第 1 次入戲院睇戲

眼見小慈係屋企都可以陪我地睇電視睇到咁專心, 再加上冰河世紀 3 上畫, 之前 2 集我地都有睇開已經笑到碌地, 今次口碑仲極之好, 竟然創出了香港有史以來動畫片開畫最高票房, 講到咁正, 就決定帶小慈入戲院睇戲先 :)

事前俾足心理準備小慈, 逢親電視賣冰河世紀廣告我就話呢套卡通片好好睇, 出發當日我就同佢講:

我: "小慈, 爸爸媽媽帶你去睇戲, 戲院入面好黑架喎, 有時仲會好大聲添!  不過唔駛驚架, 媽媽攬住你同你一齊!"

小慈: "啊~~  好啦!  我地去睇戲啦, 我一陣合埋眼睛先!"

真係俾佢笑死, 都唔知佢明唔明?!  不過入到戲院冇話 "我唔鍾意呢度!" 我已經當成功左

不過衰妹真係問我羅枕頭話天黑要合埋眼睛..... 真係俾佢吹漲!!  合埋眼睛點睇戲先得架?!

入戲院睇戲既氣氛同屋企係唔同, 全場人一齊笑一齊叫係好有震撼力, 小慈都感染到, 佢都識笑呢! 

不過年紀細耐性始終有限, 去到大約 45 分鐘, 睇到文輝一班人行入深淵準備救森仔時, 小慈就話佢要出去, 好在我答佢未得住, 未睇完要安靜等佢都有合作, 冇扭計發脾四...

之後睇到大象 BB 出世就好開心, 係咁話 BB Elephant 好得意, 坐到完場出字幕小慈就知睇完了! 

捱到呀~~  出左戲院仲話要再睇多次, 第 1 次睇戲有咁既反應都算係咁啦!