網床

今日開番張網床俾弟弟玩, 呢張網床我好鍾意, 所以由小慈年代一直 keep 到而家, 個時唔係諗住生兩個, 但唔知點解張網床唔捨得俾人, 見佢摺埋都幾慳位就擺住先, 一擺就擺到而家!  好在都有用, 不枉我傻瓜地 keep 左咁耐 :p

其實由弟弟識反身開始我已經想開張網床俾佢, 奈何屋企真係冇晒位, 就黎連行都有問題, 成屋都係奶粉, 尿片, 玩具, 豬仔車, 學行車, 搖椅, 千秋都冇位擺要提早送俾人, 又唔想朝行晚拆張網床..... 左思右想諗左好耐, 終於吉到個位出黎!!  陰公... 點解我間屋唔係 3000 尺??!!!

決定搬小慈個玩具櫃去門口, 而原本放玩具櫃既位就放網床, 同以前一樣, 因為網床矮既緣故, 感覺仲開揚, yeah!

屋企大執位, 大家都估到邊個反應最大?  咁梗係小慈家姐啦!  一早起身指住張網床問我咩黎架?  我話係俾弟弟既網床, 俾弟弟係入面碌碌碌. 小慈即刻話:

"我又要碌碌碌呀! 弟弟飲緊奶奶, 飲完先到你呀下, 小慈家姐碌左先, 一陣到你, 排隊知唔知道? 安靜等"

一輪嘴咁真係俾佢笑死!  我話你 BB 時都係入面玩, 不過小慈已經唔記得左!  一抱小慈入網床, 高出半個身... 我既小慈真係大個了....

當年的小慈

小慈由 5 個月用到 19 個月, 係買左個玩具櫃俾佢先收埋

玩完一輪, 見弟弟飲完奶奶, 小慈都守諾言主動話到弟弟玩勒!  真係好乖, 抵錫  ^8^ 

弟弟當然傻更更唔知發生咩事啦, 放入網床玩左一陣仲喊添!  怕且都要一段時間先會適應架勒. 網床真係好好用, 行開行埋時放佢入去, 俾 d 玩具佢玩, 唔似得搖椅咁俾人綁住, 又唔怕佢撞親跌親, 好安全架!

希望弟弟都可以用耐 d 啦!