今次呢個主要係鴨仔團, 我地跟朋友仔一家出發, 佢地舊年已經去過沙巴 1 次, 知道好好玩又好岩小朋友, 所以我地就跟尾一齊去, 主要都係出島游下水, 食下海鮮, 以 relax 為主, 好寫意~~
我地搭 3:30 pm 機, 一早幫小慈試泳衣佢已經好興奮, 問我係唔係去玩沙? 我話帶佢坐機場巴士, 跟住搭飛機, 再去沙灘游水! 小慈已經開心度咪晒眼 ^^
3 歲先搭飛機好呀, 小慈完全冇氣壓問題, 起飛降落又冇驚, 仲話飛機飛得好快, 又話雲姐姐飄左去, 望到地下 d 島又識問我係唔係好高呀我地? 小慈仲勁鍾意空中小姐, 成日話空中小姐對住佢笑, 又話要去睇下人地做咩, 去同人地傾計, 傾完計返黎見佢左手渣餅, 右手渣糖咁, 真係俾佢笑死! 咁唔客氣都得!
小慈第 1 次搭飛機就有小插曲!! 本來 2 個鐘既機程, 點知去到亞庇機場時有狂風大雷雨, 能見度低降落唔到, 加上機油唔夠唔可以係天空盤旋, 要飛 20 分鐘到另一個機場入油先可以再返亞庇, Delay 左 2 個鐘, 好在小慈訓醒心情好好, 同行又有小朋友一齊玩, 攪下窗, 襟下燈制, 無端端又起飛降落多次, 今次搭飛機印象極之深刻啦! 問小慈搭飛機開唔開心? 小慈答: "開心, 我地係唔係去玩沙呀?"
原來佢由試泳衣開始已經期待去沙灘! 不過我地落機已經係夜晚 9:00 pm 喇女! 唯有同佢講, 太陽伯伯天黑呢埋左, 游水好凍架, 聽日先去游水啦! 小慈本來想發爛, 但望下個天又真係黑晒, 好無奈咁話: "聽日等太陽伯伯訓醒覺, 我地就去沙灘啦好唔好呀?" 咁明白事理真係我既乖女 ^8^
之後去酒店 check in 完再搭的士去食飯, 平時呢個時候小慈已經好夢正酣, 今日又出其地乖冇扭眼訓仲食晒 d 飯添! 返到酒店已經 11:30 pm 同佢沖涼仲笑騎騎, 果然係精神亢奮, 幾驚佢唔知玩到幾點先瞓呀, 好在佢揀完位要瞓中間後, 唔駛 5 分鐘就扯鼻鼾了~~
Day 2
尋晚夜瞓, 今朝 8:15 小慈都未醒 @.@ 拍醒佢第一件事就係同我講: "天光拿? 我地去游水係唔係呀?" 答佢係去游水, 不過要去食完早餐, 食飽飽先有力游水, 小慈開心到即刻好合作咁擦牙洗面換衫, 仲食左 2 隻蛋 & cornflakes 好生性
不過行程有變, 我地原來係要 12:00 pm 前去 Sunday market 身負重任咁整個人名牌先, 跟住去買手信, 再去 Boo Boo Land 兒童樂園玩到夠鐘, 再 check in Shangri-La 我地先可以係酒店泳池游水.....
食完早餐, 好記性既小慈果然就係問我, "係唔係去沙灘呀?" 唯有答佢未呀, 要去買埋野先, 點知, 之後既每半個鐘頭, 小慈就問我一次, "去游水未呀?" 真係唔可以隨便應承小朋友任何野, 尤其係小慈!!!!!
雖然我都係一個言出必行既媽媽, 不過有時 d 野係要等架麻, 耐性有限既小朋友都係唔好將未發生既野, 咁快講俾佢地聽!! 好在, 小慈都受氹, 同佢講玩完波波池先去游水, 佢都 ok! 呢個 Boo Boo Land 即係類似冒險樂園, 小慈玩得好開心!
原來個衰妹仲遺傳左我地既大膽因子, 鍾意玩機動遊戲!!
玩完 Boo Boo Land 又問我游水未呀? Bang Bang 聲即刻去酒店 check in, 換泳衣即刻跳落泳池! 真係怕左佢呀! 追我 9 條街.....
14 個月時買既蜜蜂裝, 36 個月都仲著到呀! 勁~~
Day 3
今朝終於可以好肯定咁同小慈講: "去沙灘玩喇~~~"
我地帶左 1 個 26 寸同埋 1 個 14 寸既行李箱, 隻 26 寸入面全部都係小慈既沙灘玩具, 其中包括 1 隻可以坐 2 個人既橡皮艇! 爸爸好堅持要買, 因為佢話冇咩幾何有咁大地方俾你放艇玩而又唔會撞到人, 仲話坐係上面餵魚都不知幾寫意! 咁..... 咪買羅, 不過一隻艇已經霸左半個行李箱, 跟住仲有水泡, 水袖, 支支水槍, 沙灘玩具, 沙灘蓆, 仲有乾糧...... 一個 26寸喼可以放得晒已經係一個奇蹟 @.@
住香格里拉既一個好處就係可以慢步行去碼頭即刻坐船出海去島玩, 非常方便, 小慈第 1 次坐大飛出海, 心情興奮未識驚, 去到海中心開始拋高拋低小慈開始面青, 不過我同秋秋扮晒開心又 wee wa 鬼叫咁, 小慈就當玩, 仲識同我講: "船船 up and down, 好快呀!"
就係呢隻艇吹左爸爸 20 分鐘 @.@ 好在有帶泵, 用口吹佢要人工呼吸都似!!
沙巴真係好靚, 水清又多魚, 你睇, d 魚為食到唔驚人, 手指照咬! 浮潛緊呢個係我黎架, 勁呢?!
回程時又大風, 又大雨, 加上大飛速度快, d 雨打埋黎好痛, 要用大毛巾包住小慈, 衰妹仲要我連個頭都同佢包埋, 成船人都望住佢笑
Day 4
尋日出左 2 個島, 今日再出多 1 個!! 一早起身終於見到耀眼陽光真係好開心! 就係呢袋沙灘玩具小慈堅持要自己揹住, 視為命根架!
好鍾意呢條裙款泳衣, 知道自己著緊裙係咁話: "好靚呀~~"
一時游水, 一時玩沙
又你睇佢幾忙
今日勁開心, 因為我地竟然見到毛仔, 仲搵到佢屋企!!
同電影一樣, Nemo 真係只會出出入入個堆軟珊瑚, 唔會行開, 我地勁同毛仔影相~~ 超開心!!
沙巴呢幾日既天氣係好奇怪, 朝朝間中有太陽, 但一到下晝 3:00 就會落大雨, 想係沙灘玩耐 d 都唔得! 不過小慈都要瞓晏覺, 所以朝早玩完返去瞓醒晏覺, 夜晚再外出覓食就 very good!
我地今晚仲破紀錄咁 3 個鐘頭食 3 餐!! 由 5:xx pm 食到 8:xx pm, 先係去食肉骨茶, 再去食意大利餐, 主要係俾小朋友食意粉 & 飲湯, 之後再食海鮮餐!! 真係飽到行唔郁 @.@ 我地由意大利餐廳去雙天海鮮酒家時, 只係行緊去羅位之麻, 小慈已經意識到又係去食飯, 即刻唔肯行拉我向後, 想喊咁既表情同我講:
"媽媽, 我唔食飯喇~~~ 小慈食左喇! 我好飽呀~~~"
咁陰公... 我即刻安慰佢 "小慈食飽, 不過爸爸媽媽未食飯, 仲係好肚餓喎! 我請小慈坐低我俾印仔你玩好唔好?" 咁先氹到佢坐低咋! 對於唔好食既小慈, 要佢坐飯廳又陰公左 d ! 佢點會明白我地咩事要一晚食 3 餐飯先得架?!! LOL
Day 5
小慈今朝訓醒又係問我係唔係去沙灘呀? 我都想, 不過今日要搭飛機返香港搵弟弟 lu~~ 點知小慈聽到即刻唔開心, 話: "我唔要返香港, 唔搵弟弟呀! 要去沙灘玩沙, 搭船呀~~ "
我梗係唔睬佢啦, 媽媽好掛住弟弟, 真係牽腸掛肚呀陰公! 我仲以為自己冇咩野, 工人姐姐都照顧得佢好好, 又勁錫佢, 點知原來我一日唔錫過塊肥豬面係會周身唔舒服既! 我已經好叻架勒, 小慈 bb 時, 我一日都冇離開過佢架! 諗番以前又真係緊張過龍 :p
雖然冇得去沙灘, 但帶左小慈去酒店 playroom 玩, 佢都好開心
搭回程機返香港時有人係機上面嘔, 於是就全機人唔俾落機, 衛生署要幫事主一家檢查及量體溫! 你地睇下幾大陣象....
後尾知道係有個姐姐仔食錯野所以嘔, 差 d 仲以為要原機折返, 去多轉沙灘先返香港添~~
呢個 trip 期待左好耐, 一如預期, 真係好 relax, 好開心, 一家人曬到黑晒, 好健康 feel
鳴謝朋友仔為我地鴨仔一家安排左一個咁舒服好玩, 又抵玩既 trip! 多謝晒 ^8^
沒有留言:
張貼留言