1 歲前係真係好多針要打, 小慈當年都要打 6 合 1, 肺炎鍊球菌 & 水痘, 而弟弟係二公子, 怕我地分身不暇唔可以好似以前咁金晴火眼秒秒中睇緊佢, 又怕小慈返學帶好多菌返屋企, 所以弟弟係要食埋輪狀病毒, 預防佢食左污漕野肚瀉虛脫
問左好多人先搵到一個有愛心, 手勢又好既兒科醫生, 以前小慈睇開又近屋企既陳醫生突然離左職, 我幾唔開心呀! 好左而家搵到呢個王醫生, 雖然佢唔近, 要去到大圍都叫做係沙田區, 不過佢真係好 nice, 姑娘又有禮貌, 所以打咁多針我都係 book 番王醫生
弟弟今日好叻, 平時打針會喊, 不過好快收聲, 今日仲叻 d 添, 打完支針細細聲 "丫" 左一下, 冇喊!! 叻仔!
同佢磅重有 8.2kg, 即係 18 磅, 同我預計差不多, 而家轉左 4 餐奶 1 餐純米糊, 我都怕佢會瘦左架, 好在都 ok
而家唯一令我心煩既就係弟弟唔飲水既問題, 不論葡萄糖水又好, 果汁又好, 清水.... 都係唔飲 >_< 好, 我決定出針筒!!! 吱都要佢飲
之後去嫲嫲屋企, 弟弟足 6 個月就非常準時地玩認人, 認地方!!
Oh No~~~ 小慈當年又係咁, 一去到爺爺屋企, 隻腳踏入去都未除鞋就勁喊, 喊到成條走廊都聽到, 仲試過佢喊唔停氣喘又想嘔咁, 攪到我地坐左半個鐘就要走 @.@
真係估唔到連乖巧既弟弟都係咁, 我地只係去左沙巴個個星期冇返去食飯之麻, 已經叫左爺爺嫲嫲係我地旅行期間日日去探弟弟, 等屋企不至於太靜, 俾弟弟見多 d 人, 我仲以為冇見弟弟幾日, 返黎佢會唔俾我抱, 又冇喎, 仲俾左個社交微笑我地 ^^ 暗自高興之際, 點知係屋企冇事, 出街就大件事!!!
24/5 第一次返去爺爺度, 入屋都唔夠 2 分鐘即喊, 仲係大喊面紅大大滴眼淚個隻, 好鬼凄涼, 以為有人打過佢咁款!?! 平時個個抱都得, 呢晚淨係我抱先收聲, 個衰仔, 平時一係唔喊, 一喊係震耳欲聾個隻!! 為免佢發出噪音, 成晚都係我抱住佢飯都唔駛食.....
唔想縱容呢個情況, 越怕既事就越要去面對! 於是, 28/5 端午節又返去爺爺屋企食飯, 今晚係入左屋 5 分鐘, 弟弟望均左間屋一次, confirm 左唔係自己屋企先喊!?! 都係成晚要我抱, 試過姑媽同嫲嫲抱住佢係 ok 既, 點知抱抱下弟弟會突然擰轉頭望下邊個抱住佢, 一發覺抱住佢個個人唔係我就即喊!! 真係 bear 一聲 ....
30/5 今日又返去食飯, 有進步喎! 入屋冇喊呀! 嫲嫲撩佢玩仲笑, 以為佢心情靚啦, 點知嫲嫲一抱過手又喊 @.@ 不過, 都叫做有改善, 我地唔會放棄既!
食完飯預備起程回家時, 嫲嫲搶左弟弟去抱, 同小慈講....
嫲嫲: "小慈 bye bye! 弟弟今晚唔走喇, 留係嫲嫲屋企過夜喇!"
小慈: "..............." 望住未識反應, 嫲嫲再講多次, 跟住抱住弟弟行入房
小慈: "唔好呀~~~ 嗚~~~ 我唔要留低弟弟呀~~~~"
即刻眼圈紅晒流眼淚, 仲係咁指住嫲嫲個背影 dum 地
我地從來都冇咁樣玩 or 試小慈架, 因為我地都好堅守唔係真既野唔講, 唔會試佢個 D
"你唔乖, 鴉烏公會捉左你架!" 或 "警察叔叔鬧你呀, 拉你呀!"
甚至連 "你走呀! 我唔要你呀!" 呢 d 說話, 我地從來都冇講過, 牙齒當金洗, 如果你平時成日都冇句真, 講過既野唔算數, d 小朋友咁聰明, 好快就搵到你既破綻, 唔信你, 當你流架啦!
我都冇估到嫲嫲今日玩 d 咁野, 所以小慈以為嫲嫲講真, 要搶左佢心愛既弟弟, 一情急就喊, 當然我係好心甜, 知道佢咁愛錫咁緊張弟弟, 缺一不可 ^^
不過事後我就要輔導小慈好耐, 同佢講
我: "嫲嫲同你講笑, 而家弟弟咪係度羅, 我地一齊返屋企, 冇留低弟弟"
小慈仲係度嗚咽, 話: "我唔要留低弟弟! 弟弟要返屋企飲奶奶, 跟住訓覺架~~~"
乖女 ^8^
沒有留言:
張貼留言