聖誕 Cat Walk

小慈學校今日有聖誕節慶祝會, 主題係 "聖誕扮相大匯演", 小朋友們可以扮天使 / 聖誕鹿 / 聖誕老人 / 雪人!  穩陣既我梗係選擇扮聖誕老人啦!  最容易扮得似, 不過冇時間搵白鬍鬚同埋加個大肚腩俾小慈, 今日就扮 cute cute 小聖誕老人啦!  

一返學俾老師見到小慈呢一身既裝扮已經問: 

"聖誕老人有冇禮物派架?"

有有有!!  好在早有準備!!  整左成袋糖俾小慈帶返學校派, 小慈好開心, 好豪氣咁話要派糖俾 K1 既同學仔, K2 同埋 K3 既哥哥姐姐, 仲有 N1 班既 BB 添!

行 cat walk 小慈話係張枱上面行, 仲要同其他小朋友 say hello 喎!  K1 cat walk 行 1 次, K2 K3 既哥哥姐姐就可以行 2 次, 行 cat walk 唔駛驚架, 唔會跌咁話!

學校仲整左好多非常有節日氣氛既手工

我同佢仲做左個親子聖誕花環, 初初收到通告要做聖誕吊飾我都好苦惱, 仲要有特定主題 -- N1 做聖誕樹 K1 做聖誕花環 K2 做聖誕襪 K3 做雪人..... 笨笨的我初時睇錯通告整左聖誕樹, 後尾及時修正加多個環俾佢就造左呢個聖誕花環勒!  DA LA~~~~ 係咪有 d 漁護處 logo 既感覺呢?  幾環保先得架 :DDD

中間 D 波波小慈自己貼, 絨毛圈佢都有幫手繞, 真係親子勞作黎架!

非常有節目氣氛, 最鍾意就係聖誕節 ^^

靚 B 聖誕大派對 2009

又到聖誕~~ 又到聖誕~~  點少得開 party 呢?!  今年又去番我地既鐵竇搴搴屋企 BBQ!!  由細玩到大, 小朋友們已經唔再係痴媽 b 識得同朋友仔玩, 我地終於可以輕輕鬆鬆燒野食喇~~~ (有細 b 既家長當然除外)

小朋友們都有燒綿花糖

搴搴屋企幾時都係一個超級好玩既地方, 小朋友們真係百去不厭

呢部識得自己行既車車天橋好好玩

有運輸帶升 D 車上去, 車車就會沿住公路駛過

Bernard, 好耐冇見!  你大隻左頭髮都剪左幾次, 仲已經識行, 勁呀!

地方大, 冇野扶, 弟弟今日行左 3 步!!!

仲有聖誕禮物派 ^^

7 種口味小慈最愛薑餅人, 真係整得好可愛

幼潛第 2 堂

今日係幼潛第 2 堂, 吸收左上次既經驗, 我 9:45 am 就哄弟弟瞓覺, 點知 10:30 am 抱佢出門口佢就醒左, 瞓左少少 45 分鐘諗住都 ok 啦, 去到弟弟觀察左一陣都肯玩玩具, 係我衰, 見佢坐低玩緊我就除外套放去後面椅子上之麻, 弟弟就以為我離棄佢開始喊, 仲氹極都唔收聲, 抱住又喊, 俾餅食住都喊, 喊足全堂, 終於去到最後唱 bye bye 歌弟弟先回復正常!!  自己仲爬去圈中間周圍同人 bye bye, 仲笑 @.@

好費解呀!  點解弟弟會咁既呢?  咁細個就唔鍾意返學?  慢熱?  怕嘈?..... 唉.... 

張姨姨又叫我下堂早 d 帶佢返黎 warm up, 俾佢睇下其他小朋友上堂喎....  我都唔知點早 d?  又要俾佢瞓一陣, 又要預時間俾佢 warm up?  真係..... 我真係唔係好開心!  明明弟弟係一個冇所謂既小朋友, 去邊度, 去邊個屋企都冇野, 從來冇喊過, 冇扭過計, 唔怕三保架麻, 點解一返幼潛就攪成咁呢?  唯有再觀察下佢, 越難攪既野我就越要去面對, 我唔會放棄既! 

第 2 堂又學 3 個遊戲:

1. 用 2 隻手指仔 meet 魔術貼花, 訓練小手肌 (弟弟喊住都有 meet 晒)

2. 用粗蠟筆油顏色, 為應節今日油聖誕樹 (弟弟一開始肯畫, 仲笑既, 跟住想食支蠟筆我唔俾就又喊過)

3. 障礙賽 -- 穿山洞, 跨過欄杆, 上樓梯, 滑滑梯 (弟弟全部係喊住咁完成, 好嘈呀佢 @.@

弟弟 1 歲返健康院

原先約左 12 月頭返健康院打針, 點估到弟弟生日燒左 3 日先得架!?  健康院姑娘話要退燒後一個星期先可以打針, 為安全計都係 book 遲 d 好, 所以到 12 月中先返去, 13 個月都黎緊 @.@  今日我好緊張, 因弟弟要見姑娘仲要做測驗, 都冇咩訓練弟弟都唔知 pass 唔 pass....

光脫脫豬仔磅重, 陰公豬, 得番 9.56 kg (21磅)  跌番去 50 線, 不過高左變男長人, 有 80cm 高 (90線), 頭仔 48.5cm (90線) 大頭仔一名!  仲係 2 行鼻涕, 其實都未完全好番

跟住見姑娘, 第一句就讚弟弟白白淨好可愛, 高度重量都係生長線內, 冇問題!  我話輕左好多喎?  姑娘話病咁耐係咁上下啦, 弟弟仲係頭大大面圓圓好睇得下唔駛擔心, 仲叫我唔好養到個仔咁肥遲 d 要減肥就好痛苦,  一日重過一日, 有胃口就 ok, 而家一日 3 - 4 餐奶太多, 早晚 1 支奶其餘時間要食固體, 粥又好飯又好麵包都好, 要佢趙!

其實而家都有, 不過正餐要咁多餐都係粥就真係冇, 工人姐姐都冇咁多時間餵, 唯有係朝早食多餐, 下晝要出去湊小慈家姐放學真係冇機會餵, 唯有咬住個包出去啦!  我都想谷番弟弟上 75 線, 以佢咁為食又唔駛點趙就生吞既性格應該 ok 既!

做測驗:

1. 姑娘俾左個碗佢, 入面有 2 粒積木叫弟弟攞, 左手攞完右手攞, 左手擺完右手擺 (pass)

2. 姑娘用手指攞住一粒好細既紙碎叫弟弟攞, 弟弟伸出 2 隻手指仔想 meet, 左手 test 完到右手 (pass)

3. 姑娘問弟弟識唔識 bye bye, 請請, 拍手, give me 5?  我話識晒!  姑娘好驚訝弟弟識晒!  原來佢係想問我佢識邊一樣!!  (pass & above average)

4. 姑娘問弟弟想叫人點叫?  我答大叫加手指指, 有時扯褲腳 (pass)

5. 姑娘問弟弟識講咩?  識叫媽媽, 姐姐, 家姐, 弟弟, duck, mum mum (pass & above average)

6. 姑娘問弟弟識唔識聽電話?  我話識架, 會將電話放係耳仔邊 (pass)

7. 姑娘問弟弟識唔識行?  唔識, 單手拖住佢都行到 (pass) 

姑娘話佢差少少信心, 俾 d 推得既玩具佢, 俾 d 硬 d 既鞋佢著, 可以承托腳板唔左搖右擺就應該行到, 波鞋最好!  姑娘好滿意弟弟既表現, 知道佢屋企有個家姐所以所有發展會有刺激, 會學得好快!  下?  我冇聽錯麻?  我話佢所有發展都遲過小慈家姐喎!!  點知姑娘話我男仔冇得同女仔比!  弟弟係男仔黎講已經係 above average, 千奇唔好比較咁話!

真係估唔到, 唔講真係唔知, 一切正常, 健健康康就 ok 啦!  打埋支 MMR 就走得!  為左呢支 MMR 我已經預先俾弟弟食左幾日蛋白, 又日日俾開奶茶佢幫佢下火, 跟手就會煲竹蔗茅根芫茜怕佢 3/5/7日後發燒, 點知姑娘話唔駛, 而家 d 針靚好多唔同以前唔駛做呢 d 野!  咁... 未雨綢繆都得掛?  做多點都好過做少啦!

吉大脾勒, 打針前俾定塊餅弟弟食住, 心情係唔錯既, 點知吉針個下我望見都痛, 弟弟梗係大喊!!  好在喊左 2 聲我提佢食番塊餅弟弟就即刻收聲 :DDDDD

弟弟, 你真係好乖仔架 ^8^   乖乖, 冇事勒, 希望遲下唔發燒啦!

弟弟農曆 1 歲生日

今日係弟弟農曆 1 歲正日, 咁岩小慈學校停電唔駛返學, 真係有咁岩得咁橋!  於是我今日決定做偉大的母親, 帶 2 隻 B 去迪士尼過雪亮聖誕!  秋秋要返工請唔到假, 弟弟仲咁細, 1 拖 2 暫時未有可能, 所以帶埋工人姐姐一齊去玩啦!

開門未呀?  兩姐弟好心急入場呀!

今日天氣好好唔太凍又唔曬, 只係估唔到星期一都仲咁多團友, 一入場本來想搭火車, 點知見到架迪士尼巴士上客喎, 問一問真係可以上車, 不過要收埋 bb 車, 到我地攪掂晒準備坐低時, 竟然 1 個位都冇 @.@  原來係我地忙碌地收野之際, 其他乘客已經填滿左架車, 當時我拖住小慈, 工人抱住弟弟真係企左係度, 攪左咁大輪先要我落車?!  我制小慈都唔制, 好在架車入面都有 d 好心港人, 同我講 bb 一定要坐架, 於是叫自己個個已經至少 10 歲既仔坐大脾, 自己又坐前 d 咁擠出空位俾我地坐, 其他同胞完全不為所動... 無言以對...  不過都無損我地既雅慶, 呢架龜速巴士真係第 1 次搭, 路程只係由小鎮大街火車站駛到去城堡附近, 都要搭 10 分鐘係唔係好 '快' 呢?!  

小慈同埋弟弟搭到唔肯落車

小慈掛住迪士尼火車, 於是我地係幻想世界站上車, 弟弟都係第 1 次搭, 沿途多多野講, 又拍手又手指指又大叫咁興奮非常!  咁多野睇對弟弟黎講太刺激!

兜左 2 次小慈都唔捨得落車, 弟弟過度興奮體力透支, 後尾仲俾架火車整暈左訓埋, 但落車就即醒, 左望右望見周圍唔同樣又 high 過唔肯訓, 於是轉戰 Winnie the Pooh, 第一轉要排 15 分鐘, 玩完 encore 已經要排 25 分鐘, 對我地呢 d 有經驗人士黎講梗係唔再玩啦, 15 分鐘都嫌多, 過對面玩灰姑娘旋轉木馬好過!  帶住 2 個 B, 下下都要泊車攞車又行得慢, 玩左幾樣野已經夠鐘換片飲奶食野, 時間真係唔係好見洗, 所以路過見到 d 卡通人物就要爭取時間影相!!  估唔到弟弟有我地既家族遺傳唔怕大公仔, 見到史迪仔超級興奮!!  大叫到連史迪仔都要摸下佢個頭安撫佢, 開心得好緊要呀!

Woody 非常高大, 弟弟頭臥臥望左佢好多次呀

雪映舞動巡遊好好睇, 值得推介! 

反而主打既小小世界過聖誕就冇驚喜, 只係加左少少公仔 & 所有原本既公仔都戴頂聖誕帽咁, 不過周圍既佈置都好靚!  跟住兩姐弟就攪笑地輪流瞓覺, 睇 Golden Mickey 咁嘈弟弟都訓得著, 小慈就係小小世界隻船度瞓左, 我呢 2 隻懶瞓豬已經破晒紀錄由 10:30 am 入場頂到 4-5 pm 先瞓, 平時係屋企至少瞓左 2 轉架勒!  迪士尼既吸引力真係無與倫比!

趁小慈訓左我就去排廣東話史迪仔, 小慈歲幾時睇過 1 次, 大喊收場, 今時今日既佢真係大個女, 雖然唔係咁鍾意暗既環境同埋大聲, 但有得同史迪仔傾計佢都樂在其中 ^^  係有 d 緊張, 連史迪仔問佢叫咩名都啞左, 但到最後要幫史迪仔搵逃生路線時, 小慈又好投入咁有咁大聲叫得咁大聲, 睇完之後仲話下次佢要話俾史迪仔聽佢叫 Grace 喎!  最緊要寶貝女你開心

睇埋閃耀冬日既亮燈我地就返屋企, 等唔到 8:00 pm 煙花, 唔好話佢地, 我都攰, 聽日仲要返學, 所以閃~~  呢張相係工人姐姐影, 意外地有 d special effect 喎!  正!

今日真係好開心, 我最估唔到弟弟咁 enjoy, 開心到唔駛瞓都得既?!!  真係要多 d 帶佢出黎見下世面!

燒烤同樂日

2 個月前已經預約定今日去大欖涌燒烤樂園黎一個大型聚會, 咁有心攪既, 當然就係秋秋既舊同事們啦!  佢地真係好攪笑, 其實而家已經冇一個人係舊公司返工, 但佢地係可以繼續每年都出黎玩幾次, 仲要攜眷喎, 真係不一樣的友誼!  因為大家都想見下小明, 於是我地一家四口加埋姐姐出動喇~~

燒燒賣 d 皮脆脆地都幾好味, 小慈最鍾意燒麵包

男士們燒到除剩件底衫

小慈同瑤瑤熱到要食雪條

呢度有個小公園都岩小朋友玩, 仲有好大地方可以踏單車 & 放風箏

弟弟咩都未岩玩, 但地方大多野睇又可以俾佢周圍行已經好開心

咩事大家羅住 $10 咁開心?

就係呢個吹氣大大大滑梯, 一吹起, 全場既小朋友簡直蜂擁而上

$10 玩 10 分鐘, 小慈好好好開心, 講左玩 1 次就 1 次, 夠鐘就走, 縱然依依不捨, 小慈同瑤瑤都好乖, 好抵錫

燒野食既唔好處就係返屋企成身燒烤味, 全家都要由頭洗到落腳!

幼兒潛能訓練課程

機緣巧合之下俾我有機會報名參加幼潛, 仲要有咁好彩俾我抽中左!  真係仲開心過中六合彩啊 ^^  

小慈 6 個月大已經開始參加大大小小既 playgroup, 弟弟就好似咩都冇咁, 好似咩都冇教過佢, 咩都冇幫佢預備, 成日都覺得愧對弟弟, 所以今次參加到幼潛我真係好開心!!  今時今日既幼潛已經唔同左, 首先係報名唔再先到先得, 改左抽籤真係唔知公唔公平, 不過就唔駛你晨咁早去排隊交報名表,  其次就係規定家長一定要參加講座, 計一堂出席率, 非常認真!  不過個講座都好好聽, 主題係 "牙牙學語", 講者都好風趣亦都提醒番我好多野, very good!

弟弟編左返 11:00 am -12:00 noon, 又係去番觀塘, 冇返黎呢度咁耐我就好有親切感, 仲見番好多以前教過小慈既導師同埋幫手既姐姐!  佢地都認得我, 竟然叫得出我係小慈媽咪, 真係厲害呀!!  反而小慈一 d 印象都冇, 條咁經典既樓梯佢都冇印象, 好費解.... 莫非 3 歲前真係冇記憶既?!  重臨舊地點解一 d 印象都冇???!!  咁小慈以前上既堂係唔係白廢既呢?!  好費解... 好費解.... any 肥, 我只相信人事物會忘記, 但技巧學左就係自己既, 舉例如我唔會記得我係邊度, 邊個老師教我寫個 "人" 字, 但我而家係會識寫架啦, right? (自我安慰中)

今日弟弟好開心, 弟弟同小慈最唔同既地方就係佢一 d 都唔怕生保, 去到陌生地方佢都會觀察, 都要我抱住坐大脾, 不過好快佢就自己爬左去羅野玩, 今次幼潛另一樣唔同既地方就係只可以一個家長陪, 同埋只可以第 3 堂同埋最尾 1 堂先可以影相, 咁樣希望小朋友專心 d !  所以秋秋要同小慈周圍行到差不多落堂係窗口出面裝我地 :)

導師係張姨姨 & Gi Gi 姐姐, 今日教左 3 個遊戲:

1. 在透明膠袋內取出盒仔, 再揭開盒蓋用 2 隻小手指取出粒粒餅放入口食

2. 用膠盒載住濕左水既海棉, 請小朋友用手吱出海棉內既水

3. 坐搖搖馬 / 拉住小朋友既手玩搖小船

小明既表現一般啦, 因為一點完名唱完歡迎歌佢已經開始扭眼訓, 加上仲未明白咩叫 bye bye 玩具, 一攞佢既野就乘機發爛扭腰大喊  @.@  

第 1 個遊戲因為有得食仲還可以, 2 隻手指仔揭盒蓋都做得好標準, 手指好有力, 到第 2 個遊戲唔識開手合手吱水但識玩水, 掉左人地舊海棉就成隻手仔放入膠盒內玩水, 後尾玩夠導師要收埋道具冇得俾佢玩仲喊到訓左係地, 好在岩岩係茶點時間俾塊餅佢食先肯收聲!  之後第 3 個遊戲仲完全唔肯玩, 好在屋企都有隻小馬東東, 返屋企先 train 佢啦! 

唉~~  眼訓真係死敵, 連乖巧既弟弟都變左隻小魔怪!  又大力喎!  佢玩拗腰我真係捉佢唔到唯有放佢落地.... 張姨姨叫我下次上堂前用盡方法俾佢訓陣先喎, 我盡量啦....

小慈第一次賣旗

為響應基督教宣道會屬下既慈善機構籌款, 小慈今日都幫手賣旗!!  想當年媽媽我都係公益少年團既核心幹士, 差不多 2-3 年既中學生活都係做服務, 真係賣旗植樹多過食生菜, 估唔到咁多年後竟然仲有機會俾我重拾旗袋, 好!  自小培養小慈為善最樂, 福有油雞既心先!

出發去賣旗喇!  見唔見小慈已經冇左貼左 3 張貼紙?  因為一早已經屈左爸爸, 媽媽同埋姐姐一人買左一支旗, 當係練習左 3 次

小慈: "早晨, 姨姨叔叔, 可唔可以幫我買支旗呀?"

咁可愛既小朋友請你買支旗, 點會唔買先得架?  不過事實係真係唔買既 @.@  初初我地被分發去火車站度賣旗, 雖然呢度有瓦遮頭, 可惜 d 路人個個趕住搭車好少停低, 係冇咩生意既情況之下, 我地同老師商量後上左去行人天橋上面, 同 d 路人峽路相逢, 想唔買都唔得, 不過我都係覺得生意淡薄, 人流唔算多, 所以又沿住天橋去左一個商場門口, 呢度四通八達, 形勢大好, 果然財源滾滾!!!

以我咁多年既賣旗經驗分析, 25- 45 歲既人最肯買旗, 因為佢地有經濟能力, 當中又以男人最慷慨, 同埋係褲袋羅錢最快;  其次就係拖住小朋友既媽媽爸爸, 佢地要以身作側一定會買;  第 3 就係向對手有購物袋 (特別係外賣袋) 既人落手, 因為佢地買左野, 一定唔可以用 "冇散紙" 做藉口唔買旗....  只可惜呢度係舊屋村, 買旗既人普遍係入 $1, 今日連 $0.5 都有人入, 好在 $10 都有 1 個, 真係冇得比!  以前我賣旗, 可能唔同區域再加埋而家經濟唔好, 我以前同 d 同學係比賽邊個旗袋最"輕" 架!  最輕既原因係入面多紙幣, 我最高紀錄係有個呀叔用 $100 幫買我旗!  冇任何原因, 我一叫佢買, 佢咩都冇講就入左張 $100 紙, 我幾驚佢話羅錯左呀, 但佢好認真咁將張紙幣自己入落旗袋, 簡直成為一時佳話呀我 ^^ 

而家呢條村太多公公婆婆冇咩閒錢, 又可能唔係好聽到我地叫賣, 普遍都唔係好願意買旗, 有個情景仲好笑, 我同小慈企係路中間, d 公公婆婆遠遠見到我地就即刻向左右兩邊行左去, 突然間我覺得自己似摩西, 企係度分紅海......   好在老師都體諒小慈細個, 只係賣左 2 個鐘就叫我地收工, 我想繼續可惜小慈已經叫肚餓又要我抱!  雖然我對今次既賣旗成績唔係好滿意, 不過老師已經話我地個旗袋已經係最重個個!?!  算啦, 我已經盡左力, 都叫做左善事, 而小慈都學識左咩叫賣旗!  

除左公益服務, 學校每個星期都有宗教活動, 教小朋友唱詩祈禱, 小慈已經學識好多詩歌, 近來因為聖誕節, 仲學識埋馬槽歌添!  見佢又唱歌又做動作咁可愛, 即刻攞相機出黎幫佢錄影, 一對住鏡頭, 小慈仲背埋主禱文俾我聽添!!   雖然音準仲差少少 (有鼻塞鼻水聲), 但我聽到好感動!!

主禱文

我們在天上的父, 願人都尊你的名為聖, 願你的國降臨,願你的旨意行在地上, 如同行在天上, 我們日用的飲食, 今日賜給我們, 免我們的債, 如同我們免了人的債, 不叫我們遇見試探, 救我們脫離兇惡,因為國度, 權柄, 榮耀, 全是你的, 直到永遠~~ 阿門!

山頂野餐

今日朋友仔邀請我地一家人去山頂野餐,  N 年冇上過山頂, 呢度好有外國 feel

對小朋友黎講去邊度都係大公園一個, 只要有玩伴就開心

小慈最鍾意騎膊馬

笑到卡卡聲

媽媽抱住弟弟玩就最開心, 不過估都估唔到弟弟唔鍾意草地, 每次想向外闖爬出地蓆時, 只要對手一掂到草佢就會縮, 然後坐番係度, 靜止一陣, 再大叫救命  @.@

所以今日弟弟既活動範圍只係地蓆

我好好好鍾意呢張相, 果然簡單就是美!

今日真係好開心, 陽光好好, 如果唔係咁大風吹到頭都暈就真係 perfect!!

第一次食 buffet

多謝爺爺嫲嫲, 弟弟今晚第 1 次食 buffet, 小慈都係 10 個月大時係機場酒店食過佢人生第 1 次 buffet , 之後都冇去過喇~

開餐!!  小慈當年都有雪糕食, 弟弟得個包, 不過佢都食得好滋味 XDDDD

搬竇

小慈成功訓上上格床之後, 今晚就到弟弟出房!!  小慈 11 個月大時都瞓小童床, 弟弟而家都足左 1 歲係時候遷出我地間房 :D   

趁今日係星期五, 就算弟弟半夜喊醒小慈第二日都唔駛返學丫麻, 於是.... action!  基本上, 弟弟瞓左, 你擺佢去邊佢都唔會知既

呢個係 11 個月大既小慈黎架, 估唔到兩姐弟瞓左都咁似樣

小慈知道今晚開始弟弟瞓下面, 連行步路都細聲 d

何其壯觀!!  小慈既玩具真係多到可以砌上天花板

夢寐以求既畫面 ^^

後記:

只係 12:00 am 弟弟就喊醒左, 估都估唔到弟弟半夜係搵我, 工人姐姐抱住佢都係咁喊, 係我抱就即刻收聲 @.@  唔通佢慣左夜晚瞓覺係我抱開既?  好奇怪!  不過攬住佢一陣都好快瞓番, 真係百思不得其解為何弟弟會無端端喊, 好在冇嘈醒小慈家姐咋!

滿足感

放工返屋企受到 2 隻衰 B 熱烈歡迎 ^^  心情大好既弟弟未抱佢已經笑定先, 佢終於都回復正常, 肯飲晒 d 奶, 肯自己玩, 又變番為食 BB!!  不過病一病面仔瘦左成個圈, 真係心痛死媽媽, 一定要補番先得!

趁爸爸同小慈上上格床玩, 我就抱住弟弟坐大脾唱歌俾佢聽, 呢個亦都係弟弟同小慈既最大分別, 記得以前, 小慈 pat pat 好似有釘咁一坐低就彈起, 成日都行行企企唔知佢摸咩攪咩就係係都唔肯望住我!  同佢講野又唔知佢聽唔聽到, 我都係經常性地對住小慈個背脊講野 @.@  好在小慈耐唔耐會突然做番我平時教佢既野, 我先知佢唔係聾架咋!

反而弟弟好細個已經成日望住我, 非常聚精會神咁聽我同佢講野, 只係我講唔夠兩句就會俾小慈叫左去!  以前為左令小慈覺得我唔會因為弟弟而忽略左佢 or 對佢同以前唔同左, 我係會放小慈第一, 應左佢先, 某程度上疏忽左弟弟係真既, 所以弟弟發展遲過小慈我都責無旁貸 V___V   睇圖畫係睇 full picture, 有目標有方向, 我地知道自己做緊咩野亦都放係禱告當中, 1 年後既今天, 小慈已經習慣弟弟既存在, 係我地眼中都覺得小慈好錫弟弟, 我地當初既苦心經營終於成功勒!  

而家一有機會我就會同弟弟單獨相處, 教番佢多 d 野, 好似今晚, 我只係抱住弟弟面對面坐係我大脾, 我唱 "The Wheels on the Bus" 俾佢聽, 因為弟弟既留心, 我唱得好興奮 :DDD  當我唱到 the wiper on the bus goes swish swish swish & the horn on the bus goes beep beep beep 時, 可能有 d 古怪聲, 弟弟笑到卡卡聲, 超可愛~~~~  前前後後唱左 5 分鐘有多, 5 分鐘弟弟都係碌大對眼好留心咁望住我, 真係前所未有既滿足感  ^8^   

弟弟之後要落地玩, 我去完個廁所出黎已經唔見左佢, 原來爬左入廚房搵工人姐姐, 當我去廚房打算捉佢出黎唔好攪住姐姐煮飯時, 弟弟本來係摸住雪櫃行緊, 一聽到我叫佢, 拍手示意抱佢時, 弟弟係即刻鬆開對手, 行左 2 步撲向我 !!!  咁樣行左 2 步, 即係弟弟 ready 架勒喎!!!  唔得, 要 train 下佢快 D 識行先!!!

心情好, 同場加映清酒煮蜆俾秋秋食, 秋秋勁開心, 佢話我煮到同出面日本餐廳賣既一模一樣!

我細個既時候因為爸爸媽媽鍾意食海鮮, 連帶我同細佬好細個已經有海鮮食, 雖然我同細佬一人只係分到一隻蟹鉗, 但係已經覺得係人間極品, 連蒸蟹個 d 水都特別好味!  自小培養, 到而家我都好鍾意食海鮮, 蟹同埋蜆更加係鍾意到當飯食都得, 所以陀小慈小明時我都冇戒過口, 要自小培養佢地食海鮮既興趣 :)