筷子

路經商場買左兩對筷子, 非常過癮顏色又靚, 係我身邊既小慈已經大大聲叫:

"買粉紅色!!  我想要粉紅色呀, 媽媽~~~~~~~"

企圖遊說佢買橙色但唔睬我, 無奈.....  我堅信呢個熱潮會退卻既!!

你睇小慈個樣開心到  

小慈話以後都唔用 3 個圈既學習筷子喇喎, 不過呢款都係學習筷子既一種, 筷子頭已固定, 放岩手指用力一夾就得!

一視同仁買左對綠色俾弟弟, 叉住食雞翼幾滋味

Hello ~~~

姐弟夾衣

Suddenly 就跌到去 15 度, 俾 d 時間大家適應好喎 @.@  好在我都非常有效率咁一晚執好晒全家既轉季衫, 仲剩番幾件短袖以備不時之需  

不過小慈已經病左啦!  弟弟 d 咳岩岩先好番又輪到小慈成晚咳, 話凍就凍真係令人措手不及 @.@  真係好怕佢地咳, 弟弟試過一咳就咳左 2 個半月仲俾醫生恐嚇會變哮喘!  所以佢地一起咳就即刻睇醫生以免夜長夢多!  吩咐工人姐姐放學直接帶小慈去睇醫生唔好等我放工先去, 都未放學老師就打電話俾我話小慈係學校肚瀉左 2 次!  唔係咁大滯呀?  難度感冒菌入腸??!!  要講埋俾醫生聽先!

另外, 老師仲話學校進行 "愛運動獎勵計劃", 每日都要小朋友係學校進行 5-10 分鐘帶氧運動, 今日就係學校跑圈, 記得小慈舊年係學校玩競技比賽, 只係將豆袋由一邊放去另一邊來回跑左幾次, 當晚小慈返屋企不停話自己對腳好痛, 瞓瞓下仲喊醒, 估計係小慈平時少運動所以一跑起上黎就容易肌肉酸痛!  細心既老師咁都記得, 仲即刻將小慈係學校跑圈匯報我知, 老師好錫學生, 小慈真係有福氣!  不過我同老師講今時唔同往日架喇, 小慈參加左體操班每個星期六導師都會要小朋友跑 10 個圈做熱身, 有鍛鍊而家冇咁水皮 XD

今晚返到屋企眼前一亮!  弟弟著左件夾衣真係好可愛啊~~  我係有夾衣情意結既, 之前買左好多夾衣俾小慈著, 估唔到而家弟弟著得番晒真係抵養!!  我又唔覺弟弟咁高大威猛, 因咩解究佢可以未夠 2 歲著到 小慈 2 歲半既衫呢?  Any 肥, 好在弟弟大隻 d 早左半年著得落咋, 佢地一個春天出世一個冬天出世, 好多衫接唔到就徙架喇, 而家物盡其用幫媽媽慳錢 :D 

小明 1 歲 11 個月

小慈 2 歲半

真係好岩身

分唔分到佢地呀?

學校周主任

小慈班主任郭老師有左 BB, 而家周主任間中都會入班幫手, 主要係教小朋友執筆寫字, 佢對小朋友都好有要求, 一定要坐姿靚, 枱椅岩高度, 執筆手勢要正確, 連小朋友用既鉛筆都要講究, 最好用粗身鉛筆 or 執筆膠, 中華牌鉛筆太幼未岩呢個歲數既小朋友用, 周主任好重視 "開頭", 一開始寫字寧願花多 d 時間執靚個姿勢先, 習慣左就好難改, 我絕對同意, 所以下意識地我冇教過小慈執筆, 而家老師教一學就入晒腦!

今日小慈放學返黎話: "周主任今日鬧我呀!"

我: "話你咩呀?"

小慈: "佢話我唔記得交通告呀!"

我: "你唔記得係通告袋攞出黎呀?"

小慈: "係呀"

我: "咁你俾周主任話有冇唔開心呀?"

小慈唔出聲

我: "拿, 下次你可以同周主任講我唔記得左攞出黎, 我唔係有心架, 周主任你唔好嬲啦, 你唔係專登唔攞出黎, 你係真係唔記得係唔係?  你唔講清楚周主任唔知架!"

小慈開心番 d, 話: "而家唔可以叫周主任做周老師架喇!"

我: "點解既?"

小慈: "因為佢讀左好多書丫麻, 讀左好多書就可以做主任架喇!"

爸爸插嘴: "咁你讀多 d 書都係郭主任喇喎?!"

小慈: "嘩~~~~ 亂咁講野呀你!"

我即刻爆笑! 爸爸個樣幾咁無辜呀 XDDDDD

小慈參加到學校既藝術班, 逢星期一放學上堂, 每堂都有作品帶番屋企, 幾靚架~

恐龍仔磁石貼 2 隻, 形神俱備, 掂呀!

弟弟 1 歲 11 個月大

就黎 2 歲既弟弟真係力大無窮!  雙手可以扭斷 Jessie 條頸, 拗斷手指尾咁粗既膠鼓棍, 木盒又可以踩爛, Woodstock 隻眼又可以俾佢撕走, 所有車仔唔係甩左車轆就係冇左車頂, 份份玩具都唔齊, 唔係俾弟弟收埋就係已經無聲無息地掉左落垃圾桶 @.@  最經典既 "藏參" 地點唔係鞋櫃, 唔係琴底, 唔係 Thomas 車箱, 唔係背嚢, 而係 Hippo cushion!!  我睇住佢靜雞雞拉開 hippo 後面條拉鍊收埋 d 野再拉番好條拉鍊!!!  好在俾我見到, 如果唔係真係搵一世都搵唔到呀~~  破壞力同創意都非常驚人 @.@

我嬲架!  最唔鍾意屋企七國咁亂 d 野又整爛唔見, 但偏偏每日都發生!!  有時真係睇唔開會鬧人, 弟弟見我發火就會成個人僵直好似俾人點穴咁, 雙手爪衫, 雙眼碌大直望, 嘴角向下隨時想喊咁樣 (微表情呀)  見佢咁既樣我次次望到都想笑, 但又要忍住鬧埋先, 幾痛苦呀!  X_X  

我同弟弟講: "玩具爛晒我唔開心呀!"  

弟弟答: "唔好喊呀!"  跟手走去攞紙巾幫我抹眼淚, 吹漲~~~~

不過有時弟弟都唔認錯, 我問佢邊個掉玩具?!  弟弟會答我: 

"我都冇!  唔係呀!"  

然後逃之夭夭, 絕對唔會企係度俾機會我話佢, 問佢 d 玩具唔見左, 係邊度呀?  弟弟答: 

"我幫手搵丫!"  

搵搵下又俾其他玩具吸引走左去玩, 好唔可靠

今個月開始, 每逢弟弟瞓醒我地就會移開床爛, 等佢自己可以爬上床攞床頭櫃 d 書睇, 佢真係好鍾意睇書, 每次都夾住 2-3 本要我讀俾佢聽, 同小慈一樣都係好心急揭書, 有時我都未講完佢已經揭左下一頁, 有次聽到小慈問書 

小慈: "What is this?"  弟弟一一作答 

問到唔識答既地方, 老實既弟弟話: "I don't know!!"  

小慈答: "唔識唔緊要, 小慈家姐教你, 聽住喇....." 佢兩姐弟真係好可愛 ^^ 

唱歌方面有顯著進步, 上個月仲係 hmm 既音居多, 而家成首 ABC song A-Z 都唱岩晒, 佢又好唱口, 成日都好似開籠雀咁不停講不停唱, 首本名曲有: 

Which way / Birthday song / 5 little duck / 5 little monkey / Who stole the cookie / Old McDonald

中文歌有滴滴嗒 / 我是一個大蘋果 / 太陽伯伯, 佢把聲都幾好聽 ^^ 

有次臨瞓仲好笑呀, 弟弟同我講: 

"我想 abcdefg 咁樣呀!" 

原來佢係想我唱 ABC song 噯佢瞓覺 :)  

食食下飯無端端指住鋼琴話: "我要練琴呀!"  

真係小慈都冇佢咁積極, 教佢分高低音, 低音牛牛同高音雞雞, 自彈自唱仲自讚話好好聽 XD

發音都唔錯, 外人大多明佢講咩, 雖然都仲係英文居多, 之前講過 "巴斯光年" 個光字發音準過好多大人, 今期仲識講好難發音既 Cookie Monster, 小慈個時都要 2 歲幾先講得岩!  仲有講 "姐姐 holiday, bring key" B 音都準, 多得工人姐姐成日同佢傾偈仲教佢分 it's bright, it's dark 

學識 jump, 雙手舉起牽動一隻腳離地佢當自己 jump 左 :DDD  亦開始有表演欲, 會叫我講: 

"我地 N1 郭恩明出場咁丫~~~" 

問佢表演咩俾大家睇?  弟弟有時會唱歌, 表演 jump, 又會話 "程尋磨較叉燒包" 但佢次次都淨係識出包

佢唱 Nobody nobody but you 先笑瓜我, 識改歌詞做 nobody nobody but 屁股 pat pat, 肯定係小慈教佢架啦  XDDDDD

睇麥兜學識 "較剪腳, 唉呀~~"  次次都同小慈玩到卡卡笑, 仲指住小慈話: "小慈好攪笑呀!"  

笑到咪晒眼合埋嘴但咇左個酒凹出黎個樣最似我 :)

依然係好嗲我, 我係屋企就絕對唔俾我離開梳化, 我行去飯枱都即刻拖我走, 我入廚房飲水仲喊住拉番我出黎, 成日都怕我走左去, 一定要我係佢既視線範圍!  有時坐係佢隔離都會話: 

"我要拖住你~~  我要媽媽抱!  我坐呢邊呀!"   

有時我會檢討係唔係我陪佢既時間太少?  成日來去匆匆攪到佢對我冇咩安全感?

與爸同床, 弟弟個頭岩岩沖完涼未梳, 有凌亂美 :DDD

學識咋瞓

今日自己爬枱又跌親個雲精 @.@  佢完全唔叫痛攪到沖涼撥開 D 頭髮先發現!

大頭 B!

老公舊曆生日

呵呵呵~~ 好事接踵而來, 新曆同舊曆差一日, 大家都應該估到慈明爸幾多歲啦 :D  我大顯身手整幾味拿手小菜宴請郭氏家族, 秋秋生日, 最應該孝敬既係老公既媽媽 -- 嫲嫲!!  俾 d 掌聲佢, 冇嫲嫲就冇老公架喇 ^^

今晚既菜色包括: 清湯腩 (原 Staub 上), 香茅胡椒炒羔蟹, 冬蔭蝦湯, 香葉包, 蒜蓉炒通菜!!  味味菜都好岩大家食, 姑媽讚不絕口, 爺爺仲食到唔得閒講野由頭帶到尾, 連影相都咬住件蟹, 非常俾面, 近來好少見佢食咁多野架 XDDDD

姑媽送左個芒果蛋糕俾秋秋, 好驚喜!

Happy Birthday to 爸爸~~~~

3 個小朋友爭住吹蠟燭

當然係要一人吹一次先開心啦

飯後甜品 -- 芒果椰汁西米露, 有芒果真係好味好多, 又靚仔!  

大家飽到行唔郁 :DDDD

老公生日打風

老公一年一度既生日遇見超級颱風 "鮎魚"!!  呢個風行蹤飄忽全港進入高度戒備, 但我就真係唔覺有咁勁, 小慈無端端兩日唔駛返學尋日仲可以落公園玩, 今日有微雨濕濕地先冇去

本來諗住同秋秋出去鯉魚門食飯慶祝但怕水浸, 魚船又因為打風返晒埋岸怕且冇咩海鮮食, 都係留係屋企安全 D!  好!  就等我大顯身手煮西餐俾壽星秋秋食, 呢度係我尋日去一田買既材料, 大型超市真係好方便, 佢開係我樓下就好了

唔知點解我形住呢隻先係啡磨菇, 買個時都係咁諗, 影相先見到佢叫紐西蘭燒烤菇, 算啦, 用攪拌機打碎左唔覺既

See?!  唔覺呢!  話時話我覺得我既磨菇湯好香滑!

伴碟既薯蓉我落左牛油, 鮮奶, 蒜鹽, 真係好香好好味呀!

呢個就係我既迷你焗爐仔, 頂住先啦, 法包正在焗製中~~

鵝肝醬配法包, 買埋香草蒜蓉牛油俾小慈小明!  食住頭盆先, 小慈非常好奇我地搽既鵝肝醬係咩, 俾佢試左少少之後就即刻唔要香草牛油, 不停話鵝肝醬好好味, 真係超級識貨呀!

小明就對脆卜卜既法包愛不釋手

LE CREUSET 坑紋煎 pan 出場~~~~~~~~~ 果然正方形好好用!

主菜上碟 -- 加拿大香蒜黑椒肉眼扒配薯菜

我低估左 LC 既熱力, 大火煎完兩邊原來已經 6 成熟, 塊扒又唔太厚所以已經有 d 燶, 好在係 LC 咋, 而家係皮脆, 裡面 d 肉冇變牛肉乾柴皮, 第二塊我煎完兩邊就熄火, 肉非常鬆軟汁又多, 但表面就起唔到坑....  Any 肥, 秋秋都食得好開心, 佢話係我煮既就好食喎 ^^

甜品係椰汁西米露, 凍既!  聽日去九龍城街市睇下仲有冇芒果整芒果西米露先!

小明食左半碗薯蓉, 小慈都好俾面我食左半塊扒, 非常鍾意用刀叉切野食, 連紅蘿蔔仔都要切!  今晚佢地個個都食左好多野, 唔怪得 d 西人食西餐個個食到肥獅大隻啦~

Happy Happy Birthday my 老公!!!  Love you!

20.10.2010 小慈 4 歲半

今日係一個好特別既日子  20.10.2010  咁岩又係小慈 4 歲半正日生日!!

4 歲半既小慈真係超級可愛, 識 d 唔識 d 咁成日都爆出好多笑話!!  好似今朝我問佢:

我: "點解班主任郭老師個肚越來越大既?  

小慈答: "佢食左好多野丫麻!"  

我: "郭老師有左 BB 呀!"  

小慈: "下? 又黎?  佢已經有一個哥哥架喇喎!"  

我: "即係好似媽媽咁, 生完小慈再生多個弟弟羅!"  

小慈: "我鍾意媽媽生我先呀!"  

有得你揀既咩, 傻妹!

冇咩特別慶祝, 只係估唔到我同老公都不約而同地買禮物送俾小慈!  最開心個個梗係小慈啦, 開門見到我同爸爸大包小包咁入屋已經雙眼閃令令, 咩日子呀今日?

我送左隻粉紅色既史迪仔手錶俾佢, 冇計啦, 小慈呢期鍾意, 佢之前個隻錶無端端長短針鬆晒我估係跌爛左, 問左我好多次可唔可以買過隻俾佢

小慈見到隻錶既反應: "嘩~~  係我最鍾意既粉紅色呀!!"

爸爸竟然買左 3 份玩具咁多!!  You win!

弟弟即刻對 little green man 愛不釋手

係搖控三眼仔黎既, 一隻係隊長, 另外兩隻有磁石會吸住一齊行, 好過癮

爸爸諗過有 3 隻咁多, 弟弟攬住兩隻小慈都仲有一隻玩, 唔駛爭!

第二份係接龍 -- 全圖片連弟弟都識玩

質地係厚身膠, 包裝又精美, good choice!

好玩

第三份係康樂棋 

爸爸一直擔心小慈既數學概念唔叻要 train 下佢喎

呢幾份禮物都買得好有心思, 爸爸, 我好欣賞你呀 ^8^

迪士尼黑色世界

重陽節公眾假期, 難得小慈唔駛返體操班連兒童詩班都放假, 咁得閒梗係要搵 d 野攪!  問小慈想去邊度玩, 小慈答: "如果好天我地去迪士尼啦!  落雨我地就留係屋企好唔好呀?"  一言為定 ^^ 

落左幾日雨但小慈一 d 都唔擔心, 因為佢有祈禱天父會俾佢星期六好天!  又真係喎, 今日天氣報告話間中天晴, 太陽伯伯 long time no see 呀!!  不過等呢兩隻豬仔瞓醒晏覺, 入到迪士尼已經 3:30pm!  好在有全年通行証唔係實同佢搏老命咁玩 @.@  今日抵玩架, 黑色世界 11:00 pm 先關門, 唔叉足電我怕小慈小明捱唔到咁夜!  

泊車行入迪士尼門口呢段路我覺得好遠好辛苦, 都唔明點解唔可以前 d 落左客先呢?

好在兩姊弟而家曉行曉走唔駛我抱

小慈嫌弟弟行得慢要拖佢行快 d!!  小明真係好悠閒架, 一塊葉都能夠引起佢既興趣, 行下停下又摸下咁

See?  影緊相弟弟都可以望到天空有飛機!  小慈個樣好無奈.....

終於行到去噴水池, 仲有條大直路

入到樂園岩岩好可以睇巡遊, 兩父女席地而坐好攪笑

小明見到咁大隻 Mickey 好興奮

攪笑既 Flamingo

Woody and Jessie 出場弟弟大叫到我耳膜穿咁滯 @.@

黑色世界主題係萬惡之后黑巫婆, 周圍都係佢 d 同黨

樂園好多妖怪出沒, 小慈小明表示怕怕驚驚, 我地留係幻想世界玩

影張 3 個都望鏡頭係好高難度既

玩慣玩熟既我地完全知道行程點安排, 人多既樂園最好排隊睇表演, 而家三父子食住爆谷等睇米奇金像獎!  今次我地坐到第一行, 小慈小明睇得特別投入開心, 除左鐘樓陀俠, 連小明都識晒金像獎入面既迪士尼朋友, 高飛出場小明尖叫令到高飛即刻同佢揮手, 更加估唔到既係小明鍾意主持人 Bi Bi, 同我講 "Bi Bi 唱歌好好聽呀~~~"  爸爸話佢有眼光鍾意靚女 ^^  小明唔怕大聲唔怕黑唔怕大公仔, 迪士尼真係好岩佢架!

小慈好唔想睇夜光鬼魅巡遊因為好驚妖怪, 但我好想睇, 於是叫小慈呢埋係爸爸度唔想睇就合埋眼睛, 小慈果然呢到米妮出場教跳舞先開番眼睇, 有冇咁驚呢?! @.@

同舊年一樣, 南瓜王阿積率領一班妖怪出黎攪鬼!  我地專登係明日世界門口睇巡遊, 巡遊一完就跑去玩巴斯光年, 真係冇人排隊, 到我地玩完出黎條隊已經要排 30 分鐘了, yeah

小明今日做左明星!!!  佢去到邊度都聽到有人話:

"呢個靚仔好過癮呀!"  "好得意呀!"  

成班大人圍住同佢玩, 又用相機追住影佢相, 連 mean 左好多既迪士尼員工都主動俾貼紙佢!!  唔知係唔係弟弟件夾衣著得佢好睇所以 d 人咁瘋狂呢?  

細細個就引埋晒 d 狂風浪蝶, 年齡由 16-36 歲不等, 男女通殺但 90% 係女性....