工人姐姐返黎喇~~

放左一星期大假, 工人姐姐原本今日 6:40 pm 抵港, 我已經吩咐姐姐落機排隊搭巴士時俾電話我地, 萬一我地出左街都可以預番時間係屋企開門俾佢, 如果航班準時抵港, 8:00 pm 點都打到電話俾我地喇掛?  點知等到 8:15 pm 都冇電話, call 佢手提又冇開, 究竟咩事呢?  個心 15 16 之際電話就響, 原來工人姐姐過關檢查時放低左個手提係 d 膠籃度過 x-ray 跟手就行左去, 到巴士站想打俾我地時先發覺唔見左個手提, 即刻走番入機場搵, 去左 lost & found 又冇, 沿路搵又唔見, 諗左好耐先醒起自己根本冇用過電話, 只係過海關時攞過出黎, 即刻又問海關, 好在係海關, 佢地廉潔 d 真係俾佢搵番!!  幾經波折工人姐姐終於 10:00 pm 前返到屋企!  小慈岩岩想訓, 一聽到門鐘 ding dong, 已經大叫姐姐, 第 1 個衝出去幫手開門攬實工人姐姐唔放, 我真係估唔到小慈原來係最掛住工人姐姐個個呢!  

呢個星期佢已經問左好多次姐姐去左邊度?  我答佢姐姐放假返左菲律賓屋企, 要好耐先返黎, 跟住佢就日日都問我姐姐屋企係邊度?  我話係菲律賓, 好遠架, 要好似小慈咁搭飛機先去到架!  小慈好上心, 我答左佢 2 次之後佢已經識自己講番俾我聽姐姐去左菲律賓屋企要搭飛機好耐先返!  攪笑到我星期六話佢聽姐姐星期日夜晚就會返黎喇, 小慈可以答我: 

"未呀!  姐姐要好耐好耐先會返黎架!"

係我就死梗喇女,  呢個星期我照常俾小慈自己訓床仔, 因為同佢訓既話佢就會成晚打關斗, 醒訓既我肯定唔駛訓!  點知俾佢自己訓都唔好得幾多, 衰妹好似識得感應定係真係覺得間房唔夠人氣定咩, 晚晚準時半夜 3:00 am 就喊, 佢係坐係自己張床度伸個頭出去子母床見唔到姐姐就大喊呀!  我由睡夢中驚醒咁衝出去睇佢, 小慈一見到我就攬實我同我講: 

"我要出去呀~~  嗚~~~"  

如是者一個星期有 5 晚我都係半夜抱佢返房同我訓的, 可以想像我對熊貓眼有幾熊貓呢.......

姐姐返黎我真係好開心, 甩難喇~~~~!!

煮飯仔

結婚之後, 我地已經係出名既 "無飯夫妻" ^^  陀住小慈時, 日日攰到飛起隨時都訓得著就更加唔會煮飯, 跟住請左工人就更加唔駛入廚房, 計計埋埋, 原來我已經 4 年冇煮過飯 XD

工人姐姐放一個星期大假返菲律賓探親, 佢第 1 次出國打工好掛住屋企我好明白, 於是我送來回機票加埋借左 $5000 俾佢返去只係希望佢開心, 返黎之後更加俾心機幫我打工, 乖乖地同我做 4 年咁我就於願足矣!  好多人都話我傻話我唔應該對工人咁好, 2 年返 1 次咪好羅, 點解要貼錢俾佢一年返一次仲要借埋錢俾佢?  一個唔該佢以後都唔返黎就渣都冇得剩!  我明既!  呢 d 問題我一早知道亦都已經考慮過!  我呢個工人, 話好佢又唔係真係好好, 成日冇記性, 鎖匙都唔記得帶 3 次!  但佢個人品真係好好, 好純, 心地好, 唔多嘴, 唔貪心, 好聽話, 最重要既一點係佢真係好錫小慈小明, 好鍾意小朋友, 呢點已經足夠我留佢係身邊!  對住佢我從來都冇壓力, 真係當佢係我屋企人, 所以我希望佢開心, 我亦都好有信心佢會返黎既!  不過做一個星期全職媽媽真係好辛苦!  好在小慈要返學, 唔係我實俾佢 "媽" 到冇命都似, 3 歲人仔而家好多鬼主意, 一時要玩呢樣一時要玩個樣都預左, 但佢係要你跟足佢規矩咁玩, 真係企邊格階磚都要管埋, 又要監埋弟弟排隊玩, 要施盡混身解數大小姐先滿意!  

初時以為小慈返左學, 我淨係湊弟弟一個綽綽有餘啦, 點知呢個 9 個月既人仔極度痴身, 真係行開一步都喊喊!!  呢隻人仔又以為自己好大個, 又想爬又想行又咩都羅黎食要金精火眼望到佢實, 唔俾佢攪既野又同我鬥力, 佢仲要真係好大力添!  成日捉雞咁捉佢真係手軟, 我兩隻老鼠已經入左深切治療部.... 陪住佢已經冇晒時間做家務, 我一日做一樣咋!  所以你話點可以唔對工人姐姐好 d 呢?  我真係越黎越佩服佢可以一個湊兩個, 夜晚仲要煮到飯俾我地食!!

我呢個星期既工作如下: 星期一吸塵抹地, 星期二抹玩具傢俬, 星期三洗衫, 星期四執屋清垃圾, 星期五煮飯.... 哈~~  估唔到我都會煮飯呢?  只係因為日日出街食飯 / 叫外賣 / 煮公仔麵 已經去到一個厭惡又開始食到怕既地步@.@  於是, 今晚就等我呢個 4 年都冇煮過飯既人獻醜啦!  

開飯喇~~   雖然係好簡單既餸, 但我都有俾心機去煮架

影相記錄鼓勵自己!!  今日既晚餐有清湯腩

芝麻涼拌海帶

花雕醉雞翼

小慈竟然 3 樣餸都鍾意食, 醉雞翼都食左 1 隻半, 真係估佢唔到呢^^

我都係鍾意返工......

弟弟第 1 次上 play group

因為有一張課程優惠券, 用 $100 就可以試一堂 45 分鐘既感覺統合課程, 雖然好多野我地已經識, 仲已經同弟弟做緊, 不過都要帶弟弟出去見下世面, 睇下佢出街玩會唔會扭計, 同人地 d BB 又可唔可以相處得黎先!?

感覺統合 -- 我讀書既時候已經要學, 不過咁耐歷史既野已經忘記左 9 成,  剩番個 1 成大概就係指用感覺去學習, 靠感覺去刺激大腦細胞, 以致發展前庭平衡覺, 運動覺, 觸覺, 視覺, 聽覺等.... 如果呢 d 感覺發展得好, 基本上係可以令小朋友聰明 d, 思考敏捷, 學習專注, 觀察敏銳, 情緒穩定從而增加自信心等等..... 唔駛驚!  其實呢 d 野, 我地細個去一轉公園已經做晒架勒 -- 蕩千秋, 搖搖板, 玩滑梯, 踏沙池, 爬攀登架... 已經有晒頭先個 d 咩覺物覺, 大量刺激左個腦, 只係而家 d 小朋友少左落街玩, 又多左 d 專家將 d 平常既野 "名詞" 化, 先攪到大家突然間好似好多野唔識咁

今日 playgroup 個環境幾好, 地方夠大又有落地玻璃, 光線好舒適, 玩具又夠多, 可以俾小朋友隨手就摸到掂到, 不過我唔 like 個導師, 連小朋友幾大識 d 咩野發展 d 咩都未知, 一去到問我弟弟係唔係岩岩識爬?  佢腳仔冇力, 上多幾堂就會爬得好好架勒喎, 呢度個個 bb 上完堂都會爬得好左咁話 (低鬼能, 係屋企唔曉爬既咩?!?)  上堂又冇程序, 其中一個環節係要 d 半歲既 bb 掉波撞跌 d 樽, 唔係執波, 係掉波呀!  攪到個個媽媽都要 meet 開 bb 手指先可以掉個波出去, 又單打 bb 用口咬玩具....  大佬呀, 呢個時期既 bb 唔係用手就係用口去探索同學習架啦, 冇 heart 又冇 sense, 大堆頭咁俾晒 d 玩具你自己玩, 又唔解釋下 d 玩具對 bb 有咩好處, 可以同佢點樣玩等等.... 見你個 bb 鍾意玩個份玩具就話隔離有得買, 一句講晒: 低能白痴冇料到握飯食!!  最衰一早俾左錢, 我唯有當係俾弟弟玩下 d 新玩具咁就算

上堂前熱身, 今日有 6 個 BB 一齊上堂, 年齡差別都幾大, 6 個月至 1 歲都有!  BB 相差 1 個月能力差別都好大, 我睇你點教?!  郁手郁腳熱身中....

 有好多唔同質地既玩具刺激感官

弟弟真係一個好順灘既小朋友, 我帶佢去邊度, 做咩野都唔抗拒, 乖仔!

呢個 fitness ball 係所有教感覺統合既導師都必備既, 弟弟玩到出中指, 仲係波上面做掌上壓, 笑死

9 個月既弟弟終於識照鏡, 發現到鏡入面既自己喇~~

我在我識少少冇俾人搵笨!  玩完就閃~~

Free Dinner

今日好開心,  熙熙媽媽邀請我地一家四口去佢屋企痴餐, 我真係好感動! 今晚好好餸熙熙媽媽極之客氣 -- 瑤柱蒸蛋, 香草花甲, 蒸鯇魚, 蠔油雞翼, 白灼西蘭花, 飯後果仲有水蜜桃, 唔會結冰既雪糕, 真係多到食唔晒!  熙熙媽媽你咁熱情招待, 我地一定會有下次架喎 XD

今晚最開心個個應該係兩個小朋友, 我地去到熙熙屋企佢已經玩緊煮飯仔, 仲熱情地招呼小慈一齊玩, 小慈又唔客氣, 二話不說已經羅左個煲去煮牛扒, 弟弟更加隨手就執左條魚放入口 :D  

熙熙真係好叻, 佢識好多詞語 -- 打邊爐, 馬頭魚, 煲湯, 壽司, 燒賣, 焗蛋糕.... 仲話要煮汁添!  我問佢 d 汁要黎點咩架?  熙熙答我: "點火!"  真係笑死我!!  兩個既對話又勁攪笑, 話說大家要收拾玩具準備開飯, 熙熙準備推番個玩具箱同埋 2 張櫈仔入房, 於是

熙熙大叫: "邊個幫我手擺野?"  小慈: "我啦梗係!"

嘩哈哈~~~  真係笑到我碌地, 兩個講野都好老積呀!  由佢地把童聲講出黎真係笑死人!

撐枱腳變比武筷子?!

兩個古靈精怪咁樣扮山窿俾火車捐, 玩到勁 high

呢款雪糕原來雪極都唔會變冰, 好神奇, 仲要好好味添!  小慈 & 熙熙 encore 左 2 次, 如果食飯都肯添飯就好喇.....

出外靠朋友 :)  多謝晒!

弟弟 9 個月大識爬了

弟弟今日 9 個月大喇~~  靜雞雞又出多 1 隻牙, 而家下顎有 2 隻正門齒^^

弟弟呢個月又好大進步!  初時仲擔心俾學行車佢坐慣左會唔肯爬, 原來係唔會既!  我地只係飲完奶怕佢即刻爬會嘔奶先俾佢坐一陣, 其餘時間都係陪佢係地墊度玩, 日日都係咁就爬得好矯健, 手仔腳仔又好大力, 已經可以係網床度引體上升自己扶住企!  今日仲係 sofa 邊企左起身, 仲向左行左 2 步, 我估佢有意識學行了~

今個月有重, 而家有 20 磅 (70線)  頭仔 46.5cm (75線)  身長 74.5cm (90線)  腳仔 12cm  肚腩 19"  大脾 10"  全部都有進步!!  飲食時間表如下:

7 am  Milk 220 ml

11 am Milk 220 ml

2 pm 粥 1 碗

5 pm Milk 220 ml

9 pm Milk 220 ml

弟弟又已經學識表達自己, 愛惡好分明!  開心, 唔開心, 扭抱, 眼訓, 為食既聲而家連小慈都分到!  亦都學識左專登掉野落地然後搵下跌左去邊, 仲會重覆好多次!  發音亦都多左, 近期除左講 "呀爸" "媽媽"之外, 仲識得叫 "姐姐" 同埋 "家姐"  好幾次都係望住小慈叫 "家姐" 架!  不過最令我地煩惱既就係弟弟真係好痴身!!  去廁所都唔俾!  佢又唔係要人抱, 係要人陪住個隻呀!  陪住佢, 佢仲會耐唔耐擰轉頭望下你, 好似要認清楚你個樣咁, 如果你本來坐佢左手邊, 但突然轉左去右手邊既話, 佢就會以為你走左而即刻喊~~ @.@  問佢喊咩?  如果弟弟識講野, 我肯定佢會答我:

"個邊冇人既?!" 

弟弟終於肯爬, 仲要爬得好攪笑, 完全似 d 士兵爬鐵絲網底 :)

弟弟係一個好易笑, 好易開心既 BB, 同佢玩玩具玩到笑出聲, 小慈同佢玩 "丫 bu" 仲大笑笑到卡卡卡卡, 勁可愛呀~~ ^8^

小慈派 N1 下學期成績表

今日要去小慈學校見老師, 因為小慈派下學期成績表!  老師真係好有心機, 本發展報告寫得好詳盡, 仲要好精美!  老師們有愛心, 觀察力又好, 好細微既野都注意得到, 真係好勁!  老師話小慈最鍾意玩學習角, 每逢牆上面有新既教材教具, 小慈一定知道, 仲會放棄玩玩具而走去玩學習角, 就等於一個學生選擇唔去玩而去做左功課先一樣!  真係乖到不得了!  老師做教材教具係好辛苦既, 小慈竟然識欣賞, 所以你話老師唔錫小慈就奇啦!

小慈既體能唔錯, 所有 3 歲要做到既野佢都做到晒, 例如: 雙腳跳, 單腳跳, 拋波接波踢波完全冇問題, 駕玩具車時都會好小心避開雪糕筒唔會撞車

小慈自理能力非常好, 著衫除鞋上廁所都冇問題, 飲水食飯食生果唔會整污漕 (不過老師都話佢真係食得好慢), 又會依足指示跟顏色放回碗碟, 仲會小心翼翼斯文非常咁抹嘴!  老師話佢通常抹一次唔夠, 要來來回回抹好多次, 真係抹到好乾淨, 對自己好有要求架 XD

老師話小慈畫畫好有計劃, 諗好晒幅畫點樣畫先會動手!  慢慢塗漿糊, 撕紙, 一行一行好有心機咁做, 所以佢既圖工全部都好乾淨整齊

係老師眼中, 小慈係一個完美既好學生!  我地真係又自豪又驚訝!

老師講左好多次小慈係叻女!  好喜歡學習, 好投入, 好聰明, 表達力又好, 喜歡將自己既經驗同身邊既人分享, 課堂表現非常出眾, 因為小慈有好既反應, 老師好多時都會搵小慈幫手做示範, 仲試過俾任務小慈, 例如去 K1 課室搵葉老師攞圖書架, 小慈都會不負所托咁完成任務!  老師話唔係個個小朋友都做到架, 小慈係叻女黎既!  

老師又讚小慈係一個既細心又敏感的好孩子, 好多時老師只係講過 1 次既野, 小慈就會好上心, 會做齊, 仲會帶領其他小朋友一齊做!  有一次老師責備其他小朋友一窩風走去擺番 D 圖書, 因為爭先恐後冇排隊, 於是老師收起所有圖書冇出聲坐埋一邊, 當時全班靜晒, 跟住老師先開口責備, 但小慈以為老師話佢, 於是老師一路講小慈一路喊!  之後, 老師要同小慈做個別輔導, 因為老師知道小慈好乖, 其實佢冇份爭既, 但其他小朋友曳老師就要一齊話!  小慈真係好敏感, 要 handle with care 既呢!  不過老師話小慈既情緒已經好左好多, 當初最恐怖應該係弟弟岩岩出世, 小慈係可以無端端將全枱既玩具全部掃跌晒, 連其他小朋友玩緊既都掃跌埋, 脾氣之大真係嚇親街坊 @.@  但而家既佢已經好大進步, 好多時都能夠講出自己咩事唔開心, 會忍住唔喊, 安慰完佢解釋過後都會好快冇事!  

小慈確實係一個善良受教, 和順聽話又好記性既小朋友!  老師尤其安慰小慈好愛錫弟弟, 每次弟弟黎接佢放學佢都表現出好開心, 會做好多野講好多野去引弟弟笑, 又好樂意同老師分享佢既生活點滴, 真係一個好乖既小朋友!

去沙灘

今日放假天氣又好, 於是決定早 d 湊小慈放學, 一家大小浩浩蕩蕩出發去沙灘玩!  最驚喜個個梗係小慈啦, 無端端可以早放學, 仲要係由我去接佢, 一見到媽媽已經開心到彈起, 再同佢講去沙灘, 簡直係開心到暈咁滯 :DDDD  不過呢張相佢兩個表情都好騎呢, 完全反映唔到佢地驚喜開心既感覺, 可能要應酬我影相阻住佢地玩....

弟弟第 1 次玩沙, 果然係唔客氣放入口食!!  @.@

近期最開心就係學行

落水玩喇~~~ 你睇小慈幾靚女^^

弟弟今日真係好開心, 實驗證明, 弟弟係完全唔怕水架!  沖身時我用盆仔裝住 d 水由頭淋佢, 弟弟都冇喊, 真係太好喇~~

玩到天黑都唔捨得走, 小慈仲超攪笑地用呢支水槍射殺工人姐姐, 真係笑死我地 XD

小慈贏左 626 熱舞比賽

上星期日係 Mega Box 舉行既 "史迪仔 626 熱舞選拔賽" 真係收到電話通知小慈贏左呀!!  得獎既禮物就係可以免費入迪士尼樂園玩一日!  雖然我地已經買左年票, 但始終贏左既感覺係喜悅既 :D  本來落雨落左一個星期, 今日又出奇地天朗氣清, 仲熱到溶左咁滯....

禮物除左門券 2 張之外, 仲有大會指定 T-Shirt & 禮品包

入面全部都係印有史迪仔標誌既沙灘用品, 都好實用!

小鎮大街畫分左一個 "貴賓區" 俾我地呢 100 位得獎者同史迪仔一齊反轉大街!

史迪仔出場了~~

隻 626 舞話咁快就跳完, 可以周圍去玩

今日弟弟同姑媽一家都有一齊入黎睇小慈跳舞, 小慈拖住姑媽去射槍槍!  

兩表姐弟都極度喜歡玩巴斯光年, 排隊時努力訓練弟弟企下, 希望佢快 D 識行一齊玩啦

好耐冇合照既 3 表姐弟!  不過今日實在係太熱, 小慈個頭從來冇乾過 @.@ 

捱到 5:00 pm 頂唔住要返屋企沖涼嘆冷氣了~~~

小 B 第一次聚首

呢個暑假, 我地竟然少有地冇滾攪搴搴屋企.... 唔得!  暑假就黎結束, 要黎個最後一擊!  我地今次既陣容更加係史無前例咁勁 24A 13C 6B, 真係要搴搴屋企先裝得晒 :DDD

今日呢個 party 首先係去熙熙屋企天台玩水先, 再去搴搴屋企開大食會!  熙熙 & 搴搴自從做左左鄰右里之後, 真係唔駛客氣, 佢地既屋企已經變左我地既鐵竇^^  不過小慈今日竟然選擇留係熙熙屋企玩畫板都唔上去天台玩水, 有 3 個大水池都吸引唔到小慈落水於是一張相都有...... 小朋友有時真係好難估計!

我地一班由產前認識既媽媽, 一齊生第 1 胎, 到第 1 胎差不多 2 歲時又陸陸續續生第 2 胎, 個個都 3 年抱兩, 仲要極度攪笑地全部都生仔

左起最細柏橋 (3mth), 滔滔 (~5mth), Jackco (~7mth), 小明 (~9mth)Bernard (~11mth) & 柏苗 (1yr3mth).... 呢張相真係經典 ^^

點少得小 B 既家姐哥哥先得架, 一齊合照啦 (開始混亂)

更加混亂

弟弟 8 個月識扶住野企

嘩~~  真係嚇親街坊, 弟弟今日係網床度拉住圍邊企左起身!!  估唔到弟弟手仔腳仔咁大力!!

之後, 2 隻豬仔一齊係我間房訓晏覺, 弟弟係 BB 床醒左, 又係 2 隻手仔拉住床邊, 半個身已經爬左出黎想摸小慈, 再爬出 d  就碌隻肥豬仔落地架勒 @.@  嚇死人喇!!!  即刻將張床仔個圍欄再拉高 D! 

小朋友既野, 真係唔聲唔聲嚇你一驚!

小慈好寶寶親子悅讀大獎

星期一收到一張寫住 "領取獎項通知書" 既學校通告,  內容係咁既:

本校特函通知台端 將於 2009年 8月 14日 (星期五) 舉行之第 24 屆畢業典禮上, 獲頒發 "好寶寶親子 '悅' 讀計劃全年大獎", 以多謝家長參與及協助學校推行各項活動

嘩~~  真係估唔到小慈會羅獎啊 ^0^  第 1 年讀書就有獎呢!  個獎仲同讀書有關添!  我就真係冇諗過每個星期做既讀書報告會變成全年大獎!!  每一級得 3 個小朋友有獎架咋!!  

真係好開心今日就係小慈人生入面, 第一次上台羅獎既大日子喇~~~

第 24 屆畢業典禮係宣道會台山陳元喜小學禮堂舉行, 見唔見到場刊有小慈個名呀?

張證書好靚, 仲有禮物添!

叻叻呀小慈!  爸爸媽媽好開心^^

小慈睇醫生

星期一放學, 班主任已經打俾我話小慈全日都好多乞嚏鼻水, 叫我留意下睇下駛唔駛俾佢食 d 藥甚或睇醫生咁, 不過到我放工返去小慈又冇野喎, 全晚都係得一兩聲乞嚏, 鼻水都係透明, 精神又好好, 我估佢都係初起傷風, 可能上次游水凍親掛?  屋企仲有藥, 穩陣起見, 都係俾佢臨訓前食啦!

點知今朝起身小慈就黎料勒, 係咁打乞嚏, d 鼻水仲已經係黃色, 體溫仲有少少偏高添 @.@  我同秋今日都唔可以請假陪小慈睇醫生, 一係今晚放工先睇, 但小慈就要捱一日, 佢個鼻仔已經抹到紅晒, 即刻教小慈自己用濕紙巾抹鼻!

等到醫生開門打去掛號, 朝早 last booking 係 11:45 am, 於是我決定吩咐工人姐姐帶晒 2 個 B 一齊睇醫生, 屋企行過去診所要 5-10分鐘, 速去速回咁近應該冇問題既!  我仲叫工人姐姐一定要帶手提, 去到診所打俾我咁, 當我收到工人姐姐電話時, 原來佢地已經返左屋企!!  姐姐話小慈好醒目自己同醫生講左好多野, be le ba la 咁一輪嘴廣東話佢都聽唔明, 仲話醫生讚小慈 Smart & Clever!  病情好輕微, 係 common cold, 喉嚨冇紅, 肺好清, 冇痰

真係估佢唔到, 我仲叫工人姐姐帶手提去諗住我同醫生隔空用電話溝通架麻!  即刻叫小慈黎聽電話.....

我: "小慈, 姐姐帶你去睇醫生呀?"

小慈: "係呀, 仲有弟弟都一齊去添呀!  佢好乖, 冇喊呀!"

我: "你話俾醫生聽你邊度唔舒服呀?"

小慈: "我話俾醫生聽我有流鼻水同乞嚏羅!  個鼻鼻仲損左添呀!"

我: "咁叻呀? 講得好好喎!  醫生有冇睇下你個喉嚨仔有冇紅呀?"

小慈: "有呀, 但係我冇咳咳喎!  醫生俾左 3 支藥水, 一支紅色, 一支紅色, 同埋白色"

我: "2 支紅色, 1 支白色咁多?  咁你食左藥未呀?"

小慈: "食左勒! 支紅色好甜架...."

估唔到我既小慈咁勇敢, 咁獨立, 竟然自己識同醫生溝通!  雖然俾佢嚇一嚇, 但真係好開心佢自信心咁強呢!  上次佢喉嚨痛已經係咁, 入到診所都未坐低已經同醫生講佢唔舒服, 氹到醫生開心到同佢免費鉗耳屎 :DDD  不過小慈係好奇怪, 佢特別鍾意見醫生同食藥, 班主任都曾經講過俾我聽, 話小慈逢親餵藥時間 (12:00 noon & 4:00 pm) 就會去排隊等食藥!!  明明係其他小朋友唔舒服要餵藥唔關佢事, 佢硬係以為自己都有份, 堅持佢都要食 medicine!  真係俾佢笑死架 :DDDD

我的老師

今日係我一個好朋友結婚既大喜日子, 先恭祝西田先生夫人一生幸福, 永遠相愛!

我呢個朋友已經識左至少十年勒, 我地一齊讀浸會大學既幼兒教育課程時認識既!  係呀!  大家估唔到呢?  我當年係一個 QKT 黎架, 可以轉行做幼稚園老師, 新娘子同我最玩得埋, 一星期見 3 晚, 唔熟就奇啦!  點都估唔到佢會嫁俾日本人, 連佢自己婚禮既主題都寫 "緣定今生"!  人同人既相識真係好奇妙既一件事  

設宴係半島酒店, 我咁大個女都未去過半島呢, 八八卦卦走左上去 8 樓, 一開 lift 門就係泳池, 仲要對住維港, 我 "嘩~~~~~~~~~~~" 左好耐!  真係俾足面呢個老朋友, 拋夫棄仔女咁由 5:30 pm 觀禮直落到飲宴, 返到屋企已經 12:30 am!  真係未試過花咁多時間係人地既婚禮上面~  我地成班同學, 新婚子只係請左我, 導師 Peggy & 美麗, 因為只擺 10 圍, 座位有限呢!  所以佢請我飲都知我係佢心目中既份量, 可惜美麗突然因家事而缺席, 全晚得我同 Peggy 老師相依為命, 天南地北無所不談, 又有美食當前, 婚禮又簡單而溫馨, 我開心到飲左 3 杯紅酒呢!

上星斑既時候, 侍應 Henry 將個魚頭放左上枱, 我叫 Peggy 食面珠 dun, 佢話連魚眼都食得, 我話: "細個食得多啦!  媽咪成日握我話食魚眼聰明!" 點知 Peggy 咁樣答我...

Peggy: "你好聰明!!  你攞 A 架!  我俾左好多個 A 你架!  你攞獎學金畢業架喎!  如果當年你選擇教書, 你係呢行一定會有一番作為!  一定會去到好高, 好出色!  因為你無論讀書又好, 打工都好, 你個人好有 heart, 好想做好件事!  有 heart 既老師真係唔多, 我只可以話係學界既損失, 走左一個人才!  做幼稚園係好辛苦, 但好有滿足感, 亦都實實在在培育緊一班小朋友...."

老師, 你令我好感動, 好感動呀!  一路聽你講, 我一路好想喊, 多謝你咁睇得起我!  當年我都掙扎左好耐好耐, 好想做幼稚園老師, 因為我都知道自己天生係教書材料, 亦都好享受教書, 小朋友真係好可愛, 佢地亦都好愛我!  不過當年 (甚至而家) 幼稚園老師既人工, 福利 & 前景都令我卻步....  不過 Peggy 鬧我, 當年如果我肯入職, 而家至少做左校長啦!  

Hey, 咁易咩.....

小慈第 1 次參加比賽

 7月既某個星期六, 係 Mega Box 閒逛時發現好多史迪仔公仔, 原來迪士尼係 Mega Box 做宣傳, 有好多史迪仔精品換, 又有遊戲玩咁, 只要消費就有得參加!  小慈玩到唔捨得走, 係咁問我 "點解史迪仔唔係迪士尼樂園既?"玩玩下遊戲, 有職員邀請我地一齊參加 "史迪仔 626 熱舞選拔賽".  我地唔趕時間就參加埋啦. 都係抱住玩玩下既心態, 玩完就算!  點知 2 個星期後竟然收到 Mega Box 電話, 話我地入左決賽!!!   聽完個電話我真係笑到收唔到聲!  我地跳得好差下架咋喎!  小慈仲冇咩點郁添!  咁都入到決賽唔笑就假啦!Anyway, 今日就係決賽既大日子勒~~~ 小慈今日可以見到史迪仔, 好開心呢!

準備比賽喇~~  做個 626 手勢先

小慈今日都算合作架, 人地叫佢做咩都有跟下

見唔見到我同小慈既背影呀?

今日總共有 5 場比賽, 200 人裡面選出 100 個得獎者, 可以係 8月16日免費入迪士尼樂園玩 1 日, 再同史迪仔係小鎮大街一齊跳 626 舞

得獎者隨後會獲專人電話通知!  對小慈黎講, 最好既禮物就係可以近距離見到史迪仔呀!