大力弟弟

呢個星期弟弟自己調節左自己既生理時鐘, 以往 7:30 pm 就會扭眼訓既佢, 一訓就訓到好霖, 一直訓到 10:00 pm 要我地整醒佢飲埋最後一餐奶奶, 整醒佢有時會好唔滿意咁喊, 有時又會飲住訓咁, 之後就會一覺訓到朝早 6:00 am 

我地曾經試過好殘忍咁不停撩佢玩, 等佢唔好咁早 7:30 pm 就訓, 咁早訓我有時連抱佢既機會都冇!  我仲好理想咁諗住可以攪到佢夜少少訓, 又晏少少起身 (日日朝早 6:00 am 就俾佢 morning call 醒我, 好殘忍架麻)  點知試左幾次, 不論弟弟 8:00 pm 訓又好, 9:00 pm 訓都好, 佢都係照樣 6:00 am 未天光就叫醒我,  於是, 我地都放棄左改變佢既生理時鐘

世事往往就係咁樣, 當你開始唔強求既時候個天就會俾你架勒!  呢個星期放工見親弟弟都精神奕奕, 手舞足蹈, 笑容滿面咁, 好可愛!!  我地開飯, 弟弟就會片住架學行車埋黎拍我大脾, 拉我件衫咁問我羅野食, 有時我都會睇下有咩餸岩佢食既 (通常都冇架勒)  就算俾白飯, 弟弟都 '妹' 到五滋六味

唔問我羅野食時, 弟弟就會片住架車跟住小慈家姐, 真係小慈去到邊佢跟到邊架!  有時小慈會怕左弟弟, 因為弟弟片車速度之快, 一不留神就會俾佢碌中腳趾, 都幾痛架!  連小慈家姐都唔睬佢時, 弟弟就會開始攪破壞勒, 咩都摸, 咩都咬!  最有興趣拉開玩具櫃既櫃筒, d 腳趾好似跳芭蕾舞咁伸到直一直, 個人就黎凌空咁都要睇下個櫃筒入面裝 d 咩野!

今晚仲勁, 弟弟睇中左我地張凳, 一手就將餐枱張凳拉到打橫訓低左, 有冇咁大力呀?!!  佢係 BB 黎架咋喎!!  好誇張~~  @.@  工人姐姐都話弟弟而家不甘於出街訓平係 BB 車, 要坐直睇風景, 但係俾佢坐直就麻煩勒, 帶佢去街市, 弟弟就掃跌晒 d 蕃茄呀, 扯晒人地 d 菜葉咁, 好在佢生得可愛唔似技安咋, 唔係人人都怕左佢, 隔離佢都似!

弟弟玩足全晚, 不過都會 8:30 pm 就開始扭計, 勞勞嘈嘈咁, 但不停俾 d 玩具佢玩, 俾 d 餅佢食, 係可以捱到 9:15 pm 既!  跟住早 d 俾佢飲最後一餐奶奶就會即刻訓著, 一直訓到第二日 7:00 am 呀!!    我既熊貓眼當堂淺色左好多 :)