小慈 K1 下學期學校旅行

尋日落狗屎落到冇晒心機, 於是夜晚同小慈一齊祈禱希望天父收埋 d 雨雲俾番個太陽伯伯我地, 嘩~~~  真係神蹟呀!  今朝一起身真係天朗氣清, 多謝天父!!  於是我地一家 5 口齊齊出發了 ^^

小慈話一定要帶埋爸爸, 弟弟同埋工人姐姐去旅行, 今日既目的地係元朗

搭車必定瞓覺既弟弟, 瞓左都緊握扶手, 幾乖

今次旅行交左俾旅遊公司負責會去好多景點

第一站就係去參觀恆香老婆餅廠

新鮮熱辣老婆餅, 小慈話都係鍾意菠蘿包多 d

第二站 -- 錦田鄉村俱樂部

一入去小慈已經俾檔金魚吸引左

錫到佢燶既爸爸點會唔俾佢玩

弟弟苦等小慈不果, 終於係要出去搵家姐

小慈都撈到好多條, 不過我地摸完一輪抽晒水, 就會將 d 金魚俾番魚檔

引晒成班同學仔一齊摸金魚

又要驚又要摸開心到飛起

玩完金魚就周圍行下, 呢度好大, 好耐冇見過荷花池

叫弟弟摸下個大樹菠蘿

衰仔摸摸下錫左個菠蘿一啖!!

雖然呢度叫鄉村俱樂部, 但我覺得呢度好似農場, 去賓尼兔樂園餵兔仔先~~

呢隻松鼠唔 show 人仲要跑得超快, 弟弟紥晒馬咁餵佢, 好攪笑呀!

山羊仔, 弟弟好鍾意佢

望到眼甘甘

弟弟好大膽, 佢又想埋去錫隻山羊, 好在隻山羊避開左 @.@  老師都俾佢嚇親, 話佢其實係唔識死

向大草地進發!!

唔記得帶個波俾小明踢下添, 佢識講 kick the ball 架!

小慈最鍾意玩 Bouncy Castle

$20 / 10 分鐘, 不過小慈應該玩左半個鐘以上

跳到成身汗底衫都濕晒連辮都甩埋

唔好話跳, 弟弟係草地散步都出晒汗!  今日真係好熱

創舉!!!  小慈俾左個驚喜我地, 導遊姨姨請小朋友出去唱歌, 小慈竟然舉手出去唱 Happy birthday to you, 真係估唔到佢會咁做!

第三站 -- 荃灣熊貓酒店食 buffet

不過我地太攰, 弟弟又開始扭眼瞓, 所以我地冇去第四站既嶺南之風公園, 提早結束行程返屋企瞓覺~~

呢個係小慈班主任郭老師, 校長話如無意外而家呢兩位老師都會跟到小慈畢業, 太好了 ^^

小慈 K1 課室

今日參加小慈學校旅行, 等候出發期間我梗係把握時間周圍影下相, 了解小慈平日既學校生活!!  呢兩位同學仔叫許樂瑤 & 馮英倫, 佢地好攪笑地見我影相就話要同恩慈一齊影, 由 N1 上 K1 都係呢班同學, 佢地感情已經好好, 你叫下我, 我又叫下你, 好不親熱!  有 d 仲連我係恩慈媽咪都知, 好叻呀!

學校呢個月既專題研習主題係 "健康生活", 由教有益健康既食物開始, 主題網入面, 小慈有提出西蘭花係蔬菜類既一種

我有份貢獻肉類既圖片架

小慈既圖工

我估呢幾舊係包類 :D

3.2.1 健康餐盒

小慈既餐盒, 佢鍾意食牛扒意粉

講完飲食, 就到健康既生活習慣和運動, 專題研習好抽象, 好難做架, 老師加油!

Yeah!  呢個就係我想影既 "飲食龍虎磅"

小慈係學校食飯真係叻左!  見唔見到午餐佢食第 1 呀!?  隔一日既早餐就食第 4 ^^  基本上個龍虎磅日日都有佢個名, 當然小慈既食量係比其他同學少 d 啦, 老師話佢最鍾意食壽司 & 饅頭, 每次都會好快食完仲舉手添食添 :DDD

呢個就係我每個星期都好有壓力既 "新聞分享", 不過老師話恩慈講得好好

講挪亞方舟既故事, 小慈連 "彩虹之約" 係咩都知, 勁呀!

小慈舊年已經識背主禱文

集體畫, 中間紅色個兩個英文字係 K1

呢幅太陽係小慈油顏色既,  我覺得好靚呀!

大開眼界~~

小慈農曆 4 歲生日

今日係農曆三月廿三天后誕, 亦都係小慈既農曆 4 歲生日, 因為夜晚要上 JMC 冇特別幫佢慶祝, 只係路過美心時買左佢最鍾意但好耐冇食過既芝士麵包條送俾佢!

往 JMC 途中, 小慈同我講佢想跑步, 見地方安全就俾佢跑下, 都明知小慈跑唔遠, 果然跑左 20 米就停低回頭望我, 想我拖住佢一齊跑

我: "拖住手跑好危險會跌架, 你自己跑啦!"

小慈: "媽媽一齊跑啦!"

我: "媽媽想行喎...."

小慈: "你跑下啦, 跑步係運動黎架麻, 你唔好咁懶啦!"

我: ".........." 於是應酬佢跑左兩下....

我既小慈真係大個女喇, 講野好成熟, 語氣好大人, 仲已經冇晒 d BB 音, 咬字非常清楚!

學校今日仲幫小慈度高磅重.... Da La......

小慈已經有 100cm 高, 重 14.5kg = 31.9磅

突破呀!!

整古做怪既小慈

老師的話

星期一放工返屋企, 小慈同我地講聽日要帶保齡球同埋保齡球樽返學校, 我問小慈帶返去做咩架?  佢話分組要好多個保齡球樽先可以玩遊戲, 但我搵晒成個書包, 手冊, 通告袋, 都冇見到老師通知話要帶野返學校, 平時佢地上堂要 d 咩都會出通告叫我地家長配合架麻, 今次冇喎!!

星期二準備返學時, 我再問小慈係咪要帶保齡球返學?  佢話係, 仲話要交俾陳老師, 於是, 半信半疑既情況下我就帶左袋保齡球玩具返學, 最多唔岩就即刻羅走!  

返到學校, 見唔到陳老師冇得對質, 於是我就將袋保齡球交俾當值既老師, 略略解釋下, 當值老師問我小慈平時講野真唔真?  我話真架, 唔係就唔會帶返黎啦!  於是佢就幫手收起, 等左全日老師又冇打電話搵我喎, 夜晚我地返屋企小慈又已經瞓左, 問工人姐姐有冇攞番袋保齡球返黎?  姐姐又話 no, 我真係滿腹疑惑既呢.....

星期三送小慈返學, 終於見到陳老師, 謎底亦都解開!!!   

陳老師話呢個月既主題係健康生活, 小慈已經學識左咩叫有益既食物如: 飯麵係五殼類, 芝士係蛋奶類, 油鹽糖要食好少, 亦都學識左咩野係運動, 睇電視就唔係運動既一種, 分組活動時講開保齡球都係運動, 陳老師就問小朋友邊個屋企有保齡球?  有 4 個小朋友舉手, 不過恩慈係冇舉既!  咁老師就請屋企有保齡球既就帶番黎, 都係輕輕帶過一句, 但最終只係得恩慈一個真係有帶!  舉手個 4 個都冇!!  因為恩慈有帶保齡球所以全班小朋友都有得玩, 陳老師都諗住冇人帶先出通告, 而家已經唔駛出, 恩慈真係好叻  :)

整個對話都係當住小慈面講, 陳老師一讚完小慈, 小慈自己都有補充話:

"媽媽, 我返學好認真架!"  :DDDDD

小慈咁講真係好攪笑!  

我: 係呀, 返學要好留心架, 專心聽老師講野返黎講俾媽媽聽!

小慈: 我知道架勒, 媽媽!

媽媽真係好開心, 小慈你真係好乖好留心好認真返學!!  學習態度超級好!!  媽媽俾 10 個 叻你 ^8^

幼潛第 2 期第 6 堂

遊戲一 -- 大肌肉活動

請小朋友上落斜板學習運用小腿肌肉, 小明好奇怪, 去公園上斜落斜都冇問題, 今日張姨姨只係係斜板上面放左條毛巾防止小朋友夾腳之麻, 弟弟就好似好唔鍾意條毛巾咁, 拖佢行上去直情縮腳 @.@

遊戲二 -- 手眼協調

請小朋友插圓形捧捧入木板, 分別有左中右 3 條, 小明小手肌唔錯, 提供難度放四方木棒, 唔會一插就中, 需要轉動手指頭四方形先岩位插到唔會 kick 住!  初初小明插兩下插唔到就成條俾左我, 鼓勵下佢自己再試又 ok, 今次估唔到佢竟然肯乖乖地坐定定插左幾次 :DDD

遊戲三 -- 聽指令做動作

俾一個籃小朋友, 入面有毛巾, 牙刷, 杯, 碟, 玩具, 請小朋友 "俾毛巾媽媽" or "俾個杯爸爸", 做到就吩咐佢俾兩樣, 如 "俾個杯同埋毛巾媽媽" 

以為好易, 小明一樣都唔肯做, 越叫佢俾越唔俾, 走都走唔切!!

三老表去寶康公園

難得今日係公眾假期又天朗氣清, 約埋昊昊姑媽姑丈一齊去好大好大既寶康公園玩!  由坑口地鐵站步行前往要 15 分鐘, 由昊昊同小慈踏住三輪車帶領我地出發

對比 1 年前, 小慈大個左好多, 不過仲坐得落架公主車

寶康公園真係好大, 有呢款相撲手兜襠布式千秋, 我搵左好耐喇!!

弟弟第一次玩好緊張, 你睇佢個樣 >.<

小慈好鍾意玩千秋, 不停叫我地推高 d

有人吹 bubbles, 所有小朋友蜂擁而上

兩表姐弟古靈精怪

小慈大昊昊半歲, 兩個已經一樣高了!

有得玩已經唔需要媽媽時刻在身邊

我顧住呢隻大膽仔就得

就係呢隻企鵝手!  雙手向後擺咁行, 成隻企鵝咁真係好攪笑 :DD

發覺小明真係好鍾意穿山洞, 所有有頂既地方佢都至少入去一次!

小慈見我同弟弟影相會叫我影埋佢

我細個超鍾意玩呢 D 搖搖搖, 小慈都一樣呢!

昊昊架車高身 D, 小慈踩都 OK

三條滑梯, 小慈話呢條最刺激

係弟弟扭計先既, 玩玩下無端端攬住我褲腳大喊扭抱, 望下個鐘原來已經 6:00 pm, 應該係喊肚餓, 果然俾塊餅佢就靜晒, 仲引埋小慈昊昊一齊食

跑跑跳跳個幾鐘, 真的餓了, 好在姑丈個百寶袋有大量餅餅供應 ^^  排排坐食餅餅先影到佢地 3 表姐弟既合照!!

食完餅都要起程回家了, 爺爺麻麻等緊我地食飯!  

昊昊問小慈要唔要坐車?  腳仔軟既小慈就去坐車尾, 37 磅既昊昊真係載得郁 30 磅既小慈, 好勁呀!!

小慈棄車, 弟弟先有機會執死雞踏番轉

今日真係好開心, 夏天到, 一定要再多 d 戶外活動