遠近慈明: 小慈中三

顯示具有 小慈中三 標籤的文章。顯示所有文章

2021年7月16日星期五

學期完

中一中三最後一日返學喇!! 今日散學禮及派成績表, 好緊張呀!

矛事矛事!! 升到班呀!! 兩個都有優點添! 班主任評語都唔錯, 左邊係小明, 右邊係小慈既, 成績兩個都係中間

唔知係唔係中三既關係, 小慈仲有派學生學習概欖, 記錄晒小慈三年來係學校做過既野, 都唔錯呀, 小慈學校生活多姿多彩

呢個 Ms Wong 屬於經典中既經典, 由佢 day 1 叫同學仔講自己個名, 小明話佢叫 Young Man, Ms Wong 竟然唔接受仲要弟弟改過個名第二日再同佢講, 攪到弟弟對住我喊咁口!! 嬲得我打左段字叫弟弟 copy and paste 去 chat box (學期初仲係上網課), 唔知係咪 Ms Wong 唔服氣, 之後既一段時間都係叫弟弟做 1D20 (1D 班 20號) @.@ 好! 我忍! 忍到家長日派成績表我就投訴你! 可惜家長日都係網上舉行, 每人 5 分鐘見得一個班主任, 不過我都有講英文科老師考試溫習期間要求同學 2 日內騰 4 篇文, 又要寫作文大綱, 浪費晒所有寶貴既溫書時間, 點解唔放在長假期先做云云.... 我地對呢個 Ms Wong 印象真係好差! 小慈個時遇到既老師好好 (明太是我媽!) 仲推薦小慈入英文班添架! 真係同 Form 1 唔同命! 不過遇到唔係好人既老師都係對自己既一種鍛鍊, 提升 EQ! 做好自己就幾時都唔怕人插!!

當我見到弟弟收到呢張由 Ms Wong 俾佢咁高評價既字咭仔, 真係好想訪問下 Ms Wong 係咪叫做對 1D20 另眼相看?! 終於肯叫佢 Young Man?!!

鼓勵環節 -- 小慈英文同商業英語考得最好, PE & 電腦 A 足全年, 又揀到自己既心水學科升中四 (History, Geography & 旅遊與款待), 於是同佢行下街買野獎勵佢

成個商場都係 Mirror 呀! 不過小慈冇揀

反而見到 Among Us 貼紙雙眼發光!! 係咁話呢個係我黎架, 仲有隻太陽蛋 :)

小明因為未知升唔升得番上精英班, 佢份禮物下回分解

2021年5月12日星期三

脊柱側彎

小慈 5 年級 2017 年開始由健康院發現有脊柱側彎問題, 需要每半年覆診一次及照「莫爾相片」, 去到舊年年頭, 疫情下所有學生健康驗查停晒, 但健康院竟然打電話叫我地返去覆診?! 唔通照完 X 光張片有問題??!! 嚇死我即刻飛車出去, 好在醫生只係話健康院跟左小慈 3 年, 設施器材唔夠, 又怕小慈發育時有可能問題會突然轉差, 於是轉介小慈個案俾醫院跟進, 醫院有脊柱專科專門好多! 俾晒所有以前影既片呀報告呀轉介信呀咁叫我去醫院排期, 我心情幾複雜呀, 當時岩岩疫情開始人心惶惶仲要我去醫院!? 但唔入紙又排唔到期, 震震下咁踏入威院, 生完小明之後都冇黎過! 一條隊去排照 X 光, 一條隊去排見醫生, 我地住得近去醫院都叫方便, 又算快喎, 新症 3 個月就有得睇

第一次由爸爸帶, 話小慈唔算嚴重一年覆診一次就得! 今年我請到假就由我跟番啦, 每次照 X 光同見醫生相隔大約兩個星期, 今日醫院打晒蛇餅超級多人, 原來轉左程序要先繳費後診症, 好在有自動繳費機, 唔係要排完隊繳費再排隊等睇醫生真係等到天荒地老 @.@ 醫院都進步左, 只要你一繳費, 程式就會開始, 耐心係大堂等候就會有姑娘叫名, 先幫小慈度高磅重

15 歲的小慈高 161.5 cm 重 39.6 kg

跟住入房見醫生, 醫生話小慈舊年側彎 12 度, 今年 15 度, 輕微嚴重左要轉番半年覆診一次!! (嚴重左???!!!) 不過冇其他野可以做只係繼續覆診, 20 度先需要佩帶支架, 因每日要戴足 23 小時好辛苦所以可免則免! 比較擔心小慈係 delayed puberty 問題, 之前健康院講過話最快 7 歲半黎經最遲 15 歲, 小慈剛剛足 15 歲都係轉介我地去兒科跟進, 穩陣 D! 唔駛攞藥排晒 D 期就走得, 成個診症過程一小時鬆 D 完成都算快!

之後, 小慈話肚餓要出去食 lunch, 未食過譚仔既佢今日黎見識下

譚仔初體驗~~ 小慈試食魚片魚腐雞肉酸辣米線, 正! 爸爸問佢有冇聽到譚仔話? 少少啦 XD

後加黑糖珍奶一杯.... 咁樣食都唔肥呀 @.@

返屋企做功課有螳螂陪伴添 XDD 佢究竟係點樣入屋既呢? 我地明明有晒蚊網?!! 相信呢個係一個謎~~

由於在 keyboard 發現佢, 於是命名 Keyboard!!! 同佢玩左一陣就天台放生啦!

身體健康呀, 小慈女!!

2021年5月7日星期五

中三選科家長晚會

事態好似好嚴重, 上學期派成績表都只係網上開家長會, 今次中三升中四選科, 學校竟然開實體家長會!! 可見呢件事真係影響深遠, 要兜口兜面講清楚! 可惜限聚令下只容許一位家長入場, 爸爸冇得幫手聽, 我要非常留心 jot notes 再轉述, 真係辛苦晒....我 @.@ 家長晚會 7:00 pm 開始, 我放工要飛入去, 約小慈在學校門口等

我地坐係禮堂最後排既位置, 小慈完全睇唔到個螢幕要戴眼鏡! 久違了的眼鏡 Look ^^

全級 120 人今晚有 118 位同學既家長參加, 高度參與校長話係對佢地好大既鼓舞!! 有緊張學生學業既家長係蒙福既, 因為選科真係好重要, 會影響將來子女既前途

呢個遊戲都幾複雜, 首先係必修 4 科核心科目 (中文 + 英文 + 數學 + 公民與社會發展 (前身係通識)), 跟住再揀 2 科 / 3 科選修科, 不過要成績係全級 36 名以內先可以人揀科, 每科只係有 24 (+-3) 咁上下既位

暫時小慈商業英語, 中史 & CHEM 成績叫做較好 (排名 32 / 48 / 41), 希望都有機會人揀科, 但奈何佢又唔係好鍾意呢幾科, 想讀我都唔識既 "健康管理與社會關懷" & "旅遊與款待", 不過呢兩科都睇中文 + HIST + GEOG 成績 (50% / 25 % / 25%), 小慈上學期中文炒左我真係唔知佢點揀 (-_____-), 如果揀讀 CHEM 或者可能有 D 機會, CHEM 計 60% + 英文 20% + 數學 20%, 但我又唔覺佢呢科好掂, 數理佢都係比較弱! ECON 中三都冇機會讀又唔知佢識唔識, 有科 BAFS 佢淨係讀過 Business English 又唔知掂唔掂.... 救命啊 @.@

成件事都係睇成績, 實施左成年既網課其實係拖慢甚至非常影響成績!! 呢個上學期都係自修咁, 考試我同爸爸出盡全力成績都係中間, 真係唔識點同佢揀, 仲要通識改頭換面唔知點玩 @.@

求天父賜下聰明智慧, 亦希望小慈生生性性勤力 D, 下學期考好 D 啦! 尤其係科中文呀~~~~~

2021年2月27日星期六

安慰

全家一齊努力左個聖誕假期, 農曆年假前返學校考試, 農曆年假後一個星期就派晒卷喇!! 由小慈家姐先拔頭籌, 數學合格不特止仲史無前例咁高分 -- 80.5 係 80.5 分啊!!!!!! 自小學三年級開始數學合格都偷笑, 真係估唔到小慈會有 8 字頭!!! 差 D 喊左出黎...... 其他由爸爸幫手由 0 開始教起既 PHYS, CHEM, GEOG, HIST, 中史全部都合格! 爸爸可以考慮轉行做補習天王 :P Business English 唔知係咩小慈自己溫有 89 分好叻叻豬! CHEM 份卷老師收番, 應該係高分因老師送出天使咭一張, 真係老懷安慰!!

呢份數學卷完全想裱起佢! 爸爸媽媽真係好開心!!

小明弟弟只有半日可以返學校對卷, 兩個鐘頭內一次過派晒 & 對晒 13 份卷非常趕時間! 大家都要帶計數機返去快速計分

弟弟專登另外用紙記低所有卷既分數方便我睇, 又用萬字夾夾好一份又一份既考試卷俾我 check, 超乖超生性啊! 非常滿意自己中學生涯第一次考試全科合格 :)

弟弟話綠色萬字夾係我同佢溫習既科目, 估都估唔到佢中史竟然 46 / 50!!! 92 分啊 OMG!!!!!

除左中史, 仲有 History 歷史 and Geography 地理之所以我要同佢溫, 因為呢 3 科都係改左課程用新書冇 pass paper 既科目, 完全冇參考唔知老師會點考, 於是局住同佢巨細無遺地溫晒所有考試範圍, 真係勁多勁辛苦, 出卷都出到我手軟架! 弟弟有咁既成績媽媽真係好開心! 一分耕耘真係有一分收穫!!

另一樣喜出望外既係弟弟 Oral 82 分竟然係全班第一!!! 重覆, 係全班第一呀!!! 第一次全班第一竟然係由外籍老師評分既 Oral, 翌日由英文老師 Miss Wong 在 Google Meet Class 時宣佈, 吩咐全班對住個鏡頭拍手俾掌聲弟弟, 勁好笑囉! 估唔到呢位 Young Man 咁 talk 得 :D 弟弟話 online 考 oral 時, 外籍老師同佢傾偈考試已經傾到好開心架喇! 真係叻仔! 俾左好多個驚喜爸爸媽媽 ^^

仲收到兩封情深既家長信俾我同爸爸

於是, 媽媽送上實質既獎勵, 雖然勤力讀書得益既係你本人, 但都好想表達下錫你地呢 D 咁乖有用功讀書既學生! 買左兩個你地好想要既水樽送俾你地, cool 耶~

仲趁戲院重開預先買飛同你地睇恨左好耐既鬼滅之刃劇場版無限烈車篇, 係唔係好驚喜先?!! 戲院雖然重開但場內唔食得爆谷, 買番屋企食左先入場啦 :DDD

早場係星期六 11:15 am 非常唔錯! 瞓到 9:00 am 起身仲可以嘆埋個靚早餐先入場

放寬番 4 人飯聚我地一家人可以一齊坐喇!

終於可以睇戲, 好滾動~~

炎柱大哥要你久候了!

咕嚕咕嚕大眼睛

之前以為冇得睇於是係網上睇左分析大約都知道故事內容, 但入戲院睇戲既感受係完全唔同的

一同抗疫! 戲院除左唔食得野全場戴口罩外, 仲要兩個兩個分開坐, 我坐佢地後面方便照顧

水皮! 喊左幾次喊到口罩都濕晒呀我! 慶功慶祝考試成績好其實唔應該揀呢套戲, 不過真係好好睇!!! 愛, 承擔, 責任係人一生都要學既功課!! 完場眼淚都未乾已經想睇多一次! 超正!! DVD, 要 get!

2021年1月27日星期三

考試

由知道考試範圍開始, 聖誕假期已經日日溫書, 跟住考試延期兩個星期, 第一次有咁充裕既時間去溫習, 足足一個月啊! 不過網課真係唔好, 佢地好多書都好似冇聽過冇學過咁, 全部靠爸爸口述一次先有 D 印象! 學校本來都有 pass paper 俾大家溫習, 但考試範圍唔同好多 paper 都用唔到, 中史歷史地理仲要冇 pass paper! 估唔到我要重操故業出試卷俾弟弟, 令本來甩左既惡夢又翻返黎....

好在佢地都好乖, 叫溫書就溫書

有位小朋友著左我件外套不停話有媽媽味, 仲話香過被被枕頭 :DDDD

小慈的溫書陣! 攤晒成個枱面, 再加杯靚茶, 醒晒!

考試延後兩個星期不過繼續朝朝網課, 有 D 老師同佢地溫書, 不過有 D 竟然係教下學期課程, 完全同考試無關! 有 D 仲好笑, 竟然要求 2 日內騰 4 篇文, 作文又要寫大綱呢 D 咁浪費時間既功課, 點解唔將佢地變成假期功課呢? 要學生考試前交係 for 你自己假期批改嗎? 真係好想出聲... 死忍爛忍..... 今次 WFH 我同爸爸都付出晒所有時間同仿似一張白紙既佢地溫書, 真係唔得呀呢種學習模式!!

呢張相係弟弟早會領禱, 為同學們考試禱告! 乖呀! 代禱都係事奉既一種, 今次真係要切切禱告先攪得掂!

溫習有時, 玩樂有時, 呢位小朋友忽然搵番晒 D 磁石珠黎玩

又話自己肥要踏單車, 2-3 分鐘已經聽到佢氣喘... 笑瓜我了 XD

小慈家姐夠鐘去補課, 見大家都溫得 7788 就獎勵佢地出去食個下午茶叉下電! 麥當當新出左呢款杯蓋可以唔駛再插飲管, 幾好喎, 連奶昔都可以直接飲, very good!

依~ 竟然開左間新超級市場

有位男子望到個凍肉櫃, 雙眼即時發光!!

好, 叉完電又繼續溫書啦!! 兩個星期考試眨眼就過, 農曆年假就可以盡情放鬆架喇!!! 撐住!

2020年12月1日星期二

無限 loop

9 月23日先恢復面授課程, 一個學期都未到, 第四波又爆發, 確診個案過百宗, 教育局又宣佈 12月停課直至聖誕假期 V__V 又從頭再黎過! 又要做網中人了! 2020年經歷 4 度停課, 幼稚園學生全年上課唔夠 50 日, 中五中六亦只係返學上課 90 日咋! 今日就係本年度最後返學既一日, 出年開課日遙遙無期~