遠近慈明: 小明中一

顯示具有 小明中一 標籤的文章。顯示所有文章

2021年8月3日星期二

檢查

上次健康院驗眼肥佬, 小明今日要去見視光師了

我地已經第一時間返去眼鏡舖再驗眼再換過一副眼鏡, 有咩理由戴住新眼鏡都肥佬先得架? 原來弟弟係深得太多, 眼鏡舖怕配足俾佢會暈, 今次唔理咁多配足度數, 終於 pass 了!

再深入檢查色弱, 小明對淺綠色, 黃色, 灰色係睇得比較辛苦! 視光師話係我既家族遺傳, 仲要係傳子不傳女, 所以我同小慈都冇事, sorry 呀仔.....

對上一次已經係 4 年前都係呢個視光師, 佢出左一條數學題俾弟弟:

一年加深 50 度近視, 20 歲才視力穩定, 弟弟現年 12 歲, 到 20 歲時, 他會有近視多少度?

佢自己都冇眼睇!!!

街坊 look! 眼鏡框, 拖鞋同個袋仔係佢自己揀架! 今日唔知咩事滿載而歸

發現觀塘有叁拾士多好開心! 唔駛去到大埔買燒賣

今年又做天灸, 每人 7 粒貼 1 個鐘, 醫師再三吩咐唔好食生冷野, 於是佢地係攤暖 D 壽司黎食.....

呢間由細黎到大既麥當當十幾年後重新裝修

無聊之作.... 小慈真係已經高過我好多, 弟弟都追平我了

無聊之作 2..... 兩位仁兄扮冇肚腩 XDDD

弟弟有 follow 開小薯茄, 今次留言得到阿 J 既回覆, 開心到痺!!

阿 J 覆我呀!!!

同爺爺食快餐! 好耐冇食 Pepper Lunch

返學校速成一堂小結他

學識幾個 chord 就彈到首歌, 正呀!

當年今日, 一年級時同同學仔一齊玩 PTS camp, 時間真係過得太快了!

攬住被被瞓媽媽肚腩, 真係好唔捨得你長大

弟弟張被被都開始爛, 修補過好多次, 唔知會唔會爛成咁都依然不離不棄呢?

好好愛惜自己, 唔好再加深近視喇!!!

2021年7月19日星期一

Time with Young Man

小明呢個暑假好開心, 學校馬崇堂安排左好多活動俾同學參加! 小明報左籃球班 (終於有得掂下個波幫助增高 ^^), 又報左學 Ukulele, 返學校同同學玩 board game & 水動樂, 最估唔到佢會報 cooking class 焗左幾個蛋糕仔返黎, 又幾好食喎! 全家一人一個一啖食晒!

學生健康檢查因為疫情延期再延期, 學期完小明先有期去檢查, 但小慈又冇喎! 後來先知健康院只安排小一 & 中一有得檢查咋! 呢張青少年心理健康單張一野就篤中弟弟死穴 -- 我好嬲因為同學笑我矮!!

醫生檢查身體, 脊柱側彎緊緊合格!

對上一次檢查已經係 2019年2月, 兩年半高左 18 cm 都唔錯丫, 呢幾個月都明顯 feel 到佢高緊, 不過重左 30 磅就.....

驗眼 fail 呀!! 唔知點解戴住新眼鏡都睇唔到, 雙眼一齊睇冇問題, 蓋住一隻眼右眼就出事要再返黎見視光師 @.@ 亦 detect 到弟弟有色弱問題, 做唔到飛機師了....

快速生長中既弟弟頭髮都長得好快, 今次恨心摌短 D 希望捱到開學先再剪

佢話呢個係佢最有型既 pose

新眼鏡戴唔夠一個星期驗眼 fail 當然要返去 check 下係唔係有咩出錯啦

視光師話度數岩, 可能係因為左眼深得太快, 深左 150 度但只係配 75 度俾佢怕佢戴唔慣, 但無奈驗眼肥佬就要配足 D 冇辦法!

而家再驗清楚, 右眼 575 近視, 50 度散光, 左眼 575 度近視, 75 度散光

一時冇為意要放低個新眼鏡俾舖頭配鏡, 冇帶副舊鏡出黎, 於是小明就好似盲左咁跟住我, 我立時變左導盲犬 @.@ 不過我真心覺得弟弟唔戴眼鏡靚仔 D

買埋外賣返屋企食茶點就開心晒! 豪大大雞塊既香辣脆骨真係好好食!

錫晒呢隻嗲 B ^8^

2021年7月16日星期五

學期完

中一中三最後一日返學喇!! 今日散學禮及派成績表, 好緊張呀!

矛事矛事!! 升到班呀!! 兩個都有優點添! 班主任評語都唔錯, 左邊係小明, 右邊係小慈既, 成績兩個都係中間

唔知係唔係中三既關係, 小慈仲有派學生學習概欖, 記錄晒小慈三年來係學校做過既野, 都唔錯呀, 小慈學校生活多姿多彩

呢個 Ms Wong 屬於經典中既經典, 由佢 day 1 叫同學仔講自己個名, 小明話佢叫 Young Man, Ms Wong 竟然唔接受仲要弟弟改過個名第二日再同佢講, 攪到弟弟對住我喊咁口!! 嬲得我打左段字叫弟弟 copy and paste 去 chat box (學期初仲係上網課), 唔知係咪 Ms Wong 唔服氣, 之後既一段時間都係叫弟弟做 1D20 (1D 班 20號) @.@ 好! 我忍! 忍到家長日派成績表我就投訴你! 可惜家長日都係網上舉行, 每人 5 分鐘見得一個班主任, 不過我都有講英文科老師考試溫習期間要求同學 2 日內騰 4 篇文, 又要寫作文大綱, 浪費晒所有寶貴既溫書時間, 點解唔放在長假期先做云云.... 我地對呢個 Ms Wong 印象真係好差! 小慈個時遇到既老師好好 (明太是我媽!) 仲推薦小慈入英文班添架! 真係同 Form 1 唔同命! 不過遇到唔係好人既老師都係對自己既一種鍛鍊, 提升 EQ! 做好自己就幾時都唔怕人插!!

當我見到弟弟收到呢張由 Ms Wong 俾佢咁高評價既字咭仔, 真係好想訪問下 Ms Wong 係咪叫做對 1D20 另眼相看?! 終於肯叫佢 Young Man?!!

鼓勵環節 -- 小慈英文同商業英語考得最好, PE & 電腦 A 足全年, 又揀到自己既心水學科升中四 (History, Geography & 旅遊與款待), 於是同佢行下街買野獎勵佢

成個商場都係 Mirror 呀! 不過小慈冇揀

反而見到 Among Us 貼紙雙眼發光!! 係咁話呢個係我黎架, 仲有隻太陽蛋 :)

小明因為未知升唔升得番上精英班, 佢份禮物下回分解

2021年7月7日星期三

全方位海洋公園

考完試當然超級開心啦! 我細個最鍾意既日子就係聖誕節同埋放暑假架喇 :) 小明渡過左佢第一年既中一生涯, 完全可以用 "消失" 黎形容, 咩都冇舉辦過! 不過估唔到臨尾竟然有驚喜, 學校安排中一去海洋公園! 係海洋公園呀!! 仲要包車包食飯包一個特別活動! 正都痺! 中四亦可以去迪士尼, 奈何中三的小慈學習既地方係禮堂.... 差 D 喊左出黎! 好在後尾佢都話係禮堂學理財打工賺錢完成任務都好好玩

今日就係弟弟出發去海洋公園既日子, 可以著自己波鞋真係開心呀! 尋日仲一號風球落大雨落足全日添! 學校講到明今朝 6:30 如果三號風球紅雨黑雨都會取消活動, 就算唔取消天氣差都會停晒機動遊戲山頂纜車..... 好擔心既時候可以點呀? 落力祈禱, 不斷禱告!! 係! 天父一直都好愛好愛小朋友, 今日海洋公園好好天, 一滴雨都冇落過!!

超開心既弟弟音訊全無左半日, 係下晝先 send 左一大堆動物相俾我.... 人呢?

4 個至 friend 既同班同學一組, 柏苗媽要求柏苗影張相黎睇下, 就是但影左呢張 XD 終於都見到我個仔!

仲有張即影即有, 好在

被同學偷拍, 弟弟話太大風合埋眼, 俾 D 同學話佢嚇到暈左 XDDDD

超開心啦! 玩左 the Flash, 動感快車, 激流竟然冇濕, 見到超多動物鯊魚水母, 返屋企講到唔停嘴 XDDD

2021年7月1日星期四

踩單車

終於都考完試喇!!! 相信小慈小明間學校都算係最遲考完既一間, 由 11/6 考到 28/6, 仲要 28/6 黑雨冇得返學, 幾醃悶呀! 就算多一日溫書都完全冇心機只係想快快考完...

試後活動第一擊 -- 踩單車! 本來都冇咁既打算, 全因弟弟約左班同學星期日由沙田踩去大尾篤, 阿媽我真係好唔放心, 冇踩單車已經一年有多, 仲係幾個男仔去玩冇大人 @.@ 我當然唔會掃慶唔俾佢去, 但又點樣令自己放心好呢? 於是我出絕招趁今日公眾假期天氣又唔錯, 我地預先踩一次, recall 下 D 記憶, 俾弟弟又認下路, 加上小慈又想踩, 好! 起行!!

食埋個 brunch 有氣有力先出發, 今日租單車踩到 7:00 pm, 3 架車盛惠 $200