遠近慈明: 小明12歲

顯示具有 小明12歲 標籤的文章。顯示所有文章

2021年5月19日星期三

一日假期

5 月中既一點紅, 就係呢日喇!! 今朝瞓到自然醒都係講緊 8:45 am, 叫做好架喇, 我有幾次放大假 7:00 am 就醒左幾唔抵呀 @.@ 天氣好熱, 又要俾時間小慈小明做功課, 於是我就做下自己野! 之前參加左教會傳道部常設佈道隊發起既關愛鄰舍抄寫信函事奉, 今日終於起筆, 小慈見我寫得咁起勁, 佢又做晒功課都想參加埋一份, 梗係好啦! 一齊傳福音!

真係好耐冇攞起支筆寫信, 寫一封已經手震, 盡量叫自己唔好寫到咁撩但都係龍飛鳳舞, 希望街坊睇得明啦 :P

趁有時間我仲執下櫃筒, 搵番 D 歷史文物出嚟! 呢度 D 利是全部都係賀我結婚 & 預祝小慈出世!

仲有小慈小明每年既利是錢, 我同秋秋都有寫祝福語! 直到近呢幾年小慈小明直接袋住我地俾既利是, 唔駛媽媽 keep 了~

最珍貴就係呢堆!! 我媽媽, 仲有我媽媽既媽媽, 即是我婆婆暨小慈小明太婆, 更加有世上最好既奶奶秋媽, 寫俾我地既祝福語, 真係要 keep 一世呢!

小慈小明做完功課, 終於都有時間出去行下街, 兩個都話波鞋唔岩著要買! 原來兩姐弟都要著 41 號鞋了 @.@ 有位小朋友接受緊家姐既服侍

試左好多對都係唔鍾意縛鞋帶, 要去番呀博士度先有魔術貼波鞋! 弟弟話見到有同學跑街時甩鞋帶跌親受傷, 所以真係唔想要縛帶波鞋喎....

最緊要你地舒服啦!! 滿載而歸~

2021年5月9日星期日

多謝錫我既老公早幾日已經問我想點樣慶祝母親節, 要唔要佢煮飯云云? 煮飯梗係好啦, 秋秋煮野咁好食, 不過我無以為報, 父親節我唔會煮番俾你食架, 我係無飯妻子黎架麻... :P 於是秋秋好豪咁一句 "得啦!" 就拍版! 小慈女都有問我對母親節會唔會有好大期望? 要唔要收禮物咁? 傻豬黎既, 你陪住媽媽, 俾我攬攬錫錫, 平日孝順緊要過母親節先至黎有表示啦! 於是, 小慈今朝好早起身炒隻靚蛋俾我食! 乖嘞! 乖嘞! 煮多幾次俾我仲好 :P

最估唔到工人姐姐送禮物俾我! 母親節收花呢 XD 教會都有心意送俾所有母親, 一包口罩同物輕情義重既散紙包, 唔返實體崇拜係冇架!

崇拜後食晏佢地問我想食咩? 比茶餐廳高級少少既, 我地去左食快靚正既十三郎, 巧遇阮牧師, 大家都係快食趕住返屋企網上團契

我地真係極速架, 由秋秋三扒兩撥食完先去街市買餸, 我地後來趕上! 爸爸負責買, 弟弟負責拎, 一次過用身體揹晒 D 膠袋, 笑死

正呀! 煮一味食一味, 保持新鮮熱辣辣 :P 頭盆係泰式酸辣無骨鳳爪, 仲有清酒煮蜆, 秋秋仲整熱兩杯清酒同我乾杯添~

弟弟非常欣賞呢碟蒜蓉炒椰菜苗, 半碟俾佢掃晒!

主角鮮胡椒蟹出場!! 蟹殼大過我塊面, 但係小慈小明已經大個, 識食, 兩隻蟹 4 個人有 D 唔夠分既感覺! 唔通以後要買 3 隻??? 好重皮.....

好味呀, 老公! 你快 D 教曉佢地煮啦, 母親節唔係老婆節呀, 父母親呢 D 時間應該要嘆架!

Thank you so much! Love you~

2021年4月30日星期五

做家務

弟弟食飯食得好慢好慢, 仲食包尾添呀~

係! 2 歲時係咁, 而家 12 歲都係咁 @.@ 開飯時如果有岩佢睇既節目, 佢係會完全停晒口咁觀賞! 要篤佢塊面豬又要講十萬八千次快 D 食!! 今晚把幾火要佢食包尾洗碗! 仲笑 .\ /.

由細細個開始間唔時都要佢幫手做家務, 不過請左工人姐姐真係冇咩機會俾佢發揮! 媽媽既名言: 就算 D 野唔駛你做都要識, 要有 sense!! 12 歲男子漢, 係時候要學識換燈泡呀, 維修家電, 通渠等等... 今日爸爸親身示範如何鑽牆

成功更換花曬座, 弟弟話要戴番隻安全眼睛

天台上面既植物都有幫手照顧, 我地個菠蘿 BB 生長得好好

姐姐生日, 慰勞佢辛勤工作生日就唔駛佢煮飯啦! 4 人限聚帶唔到佢出街食飯, 由我訂購 Pizza, 弟弟做外賣仔送貨!

姐姐同人氣姜濤同一日生日啊~

做男仔要有承擔! 平時俾你懶懶地, 志在養兵千日用在一朝 ^^

弟弟都好乖任勞任怨, 講野仲笑到我地死死下, 幽默的小明係冇改錯名架!

而家養到你肥肥白白, 將來爸爸媽媽行唔郁, 眼又矇就靠晒你架喇!

養兒防老, YEAH! 乖下!

2021年4月20日星期二

小慈 15 歲生日週@合味道紀念館

小慈乖女 15 歲喇!! 已經高過我有 162 cm, 條腿好長, 手手腳腳更大隻過我要著 39 號鞋, 頭髮呢幾個月波浪得好緊要, 我成日笑佢係八爪魚頭, 飛起晒 D 毛, 佢甩出黎 D 頭髮直情成條公仔麵咁, 攣得好誇張!! 除左個樣 baby face, 行為舉止仲係好 BB 之外, 15 歲真係大個女架喇! 適逢生日撞上統測第一日要溫習冇得預祝, 唯有將生日變成生日週令快樂延長, 氹乖女開心啦!! 一早起身眼都未擘大就收生日禮物係我地屋企既傳統, 不過小慈話眼腫腫唔好影相住 :D

小明弟弟今年有用自己零用錢買左兩支彩虹筆送俾小慈家姐, 又畫公仔仲寫左成大段野睇到小慈眼濕濕~

Touch Screen 手錶一隻, 估唔到小慈咁開心咁鍾意, 簡直雙眼發光! 佢話而家隻錶已經戴左 5 年, 唔明自己以前點解會鍾意粉紅色云云.... (即是嫌棄啦 -___- ) 新錶要叉電, 一放學就戴住出去補習, 係咁話好型呀! 又可以計心率, 計步數, 睡眠質素, WhatsApp, IG 訊息提示等等... 好多野玩超開心極滿意 ^^