BBQ

天氣轉涼, 姑媽相約我地今日一齊 BBQ, 因有小朋友在場, 揀 BBQ 既地方一定要夠大, 仲要殘廢咩都唔駛準備!  所以今次去左清水灣花卉自助任食 BBQ, 每人 $120 任食 4 小時都算抵!  地方非常乾淨企理, 食物供應充足味道亦唔錯, good choice 呀!  入場小慈擺個靚 pose 影相唔走光先~

一家人好耐冇一齊 BBQ 喇~~

小慈專心地燒緊蒜蓉牛油麵包

自己燒既特別好味

呢度地方都算大可以俾小朋友玩 bubbles

仲有地方玩遊戲 & 玩滑梯, 小朋友跑來跑去都唔會悶

小慈第一次洗牙

又到半年一次檢查牙齒既時間, 因為要就小慈返學只可以 book 星期六睇牙醫, 今次就近近地去屋企附近既牙醫診所, 呢個醫生連我都未見過, 只係知道係女醫生, 上次小慈要我攬住先肯一齊瞓係牙醫張椅, 今日心情唔錯, 希望小慈生生性性啦!  

小慈見到張椅都係有 d 驚想我攬佢, 但我話我係側邊陪住佢又 ok

牙醫姨姨好溫柔氹到小慈連電動牙擦都肯用, 非常有辦法, 超讚!!

大功告成, 自動漱口, very very good 小慈!!

牙醫問小慈識唔識擦牙想示範一次之際, 小慈竟然搶左支牙刷教番人地轉頭!  真係俾佢笑死

小慈 d 牙仔近乎 perfect!  反而係門牙後面有 d 蛀牙傾向, 要好小心處理!  果然係牙醫, 佢唔講我真係唔知呢!

弟弟第 1 個有意思既字

弟弟今日爆出左 2 樣野!!

第一, 佢對門牙終於肯出黎!!  早幾日仲擔心弟弟出側門牙先, 成個凹字咁漏左 2 個洞遲下去影 studio 好醜樣, 原來弟弟係 4 隻牙一齊爆呀!!  見咩咬咩連紗巾都係咁齒, 真係鄧佢辛苦!!!

第二, 弟弟終於講出佢人生第一個有意思既字, 就係 BYE BYE!!!

今日我同小慈出門口去睇牙醫, 弟弟同工人姐姐照常在門口送別, 我同弟弟 say bye bye, 弟弟開手合手做動作之餘仲有配合講埋 bye bye, 一共講左 6 次!!!!!! 

佢呀媽我聽到開心到想喊, 因為佢今次係真係有意識咁講!!!

 叻叻呀, 弟弟~~~  媽媽好開心差 D 唔想出去!

媽媽, 可唔可以幫我擦牙呀?

今朝飲完奶奶小慈就同我講: "媽媽, 可唔可以幫我擦牙呀?" 

咁積極?! 平時叫佢擦牙成日都話一陣先, 睇埋呢個電視先, 玩埋呢個玩具先..... 何解今朝眼都未睜開就想擦牙呢?

小慈話: "快 d 啦, 媽媽!  Pooh Pooh 等左我地好耐喇~~"

啊~~  我尋晚趁小慈用晒 d 可以吞得落肚既 BB牙膏, 就換過支獅王兒童果味牙膏俾佢, 順勢仲換埋支新既 Pooh Pooh 牙擦氹到小慈好開心, 於是記到今朝一起身就話要擦牙 :DDD

就係呢支果味牙膏 & Pooh Pooh 牙擦, 係唔係好靚先?

你睇小慈其實仲係好眼訓, 呢隻牙膏擦起有泡, 擦牙擦到好有成功感!

卡通片

我一直都係一個卡通迷, 真係好鍾意睇卡通片架我!  細個最有印象 / 最鍾意就係睇小露寶, 我係小忌廉, 藍精靈, IQ 博士, Touch 等等....  唔知點解而家 d 卡通片好似冇以前咁好睇既呢?  大個之後就轉移入場睇電影, 最錯既一次係唔小心買左 2:30 pm 既戲飛睇獅子王粵語版, 我仲記得係普慶戲院, 成套戲我同秋秋就被小朋友既  "點解呀?"  "媽咪, 佢地做咩呀?"  "做咩獅子要打交呀?".... 童聲掩蓋一切.... 仲因為係粵語版, Lion King 既所有歌佢都唱廣東話, 一個字都聽唔到唔知佢唱咩又唔出字幕, 非常難捱既一次!  激鬼氣佢一出碟我就買然後睇番 n 咁多次!  亦都開始左我儲卡通 vcd / dvd 既嗜好 :D  我唔係隻隻都儲 (我想架!)  不過我並非家財萬貫, 屋企亦都冇咁多地方, 只係儲左 40-50 隻, 好少架咋!  有時都會諗自己儲黎做咩?  哈~~  隨著小慈小明既出世, 我既卡通片終於物有所值 :)  我仲有一個櫃咁多既益智遊戲等緊小慈小明 4 歲以上同我一齊玩 ^^

3 歲半既小慈語言理解能力突飛猛進, 係時候睇卡通片, 不過都一定要家長指引, 有時 d 劇情真係太深!  而家逢星期六日屋企就化身迷你戲院, 準時 10:00 am 開早場, 小慈已經睇左....

1. 白雪公主 

-- 公主唱歌好好聽, 佢識唱 ha ha ha ha ha 架, 小矮人唱 hai ho, 巫婆手指好尖, 公主食完蘋果暈左

2. 史迪仔

-- 妮路好曳同小朋友打交冇人鍾意佢, 史迪仔 d 爪好尖成日都整爛 d 野, 我都有把槍同史迪仔一樣架

3. 史力加

-- 史力加係妖怪, 不過佢係乖既妖怪唔駛驚既, 公主天黑都會變妖怪好醜樣, ginger bread man 俾國王整斷左隻腳, donkey 廬仔識講野

4. Toy Story 1

-- 巴斯光年係 belly button 度禁個制就有對翼彈出黎架, 有個好曳既小朋友成日整爛晒 d 玩具, 有個 3 隻眼睛既綠色人同迪士尼入面一樣, 佢會 "Wu~~~" 咁樣講野架

5. Toy Story 2

--  Woody 隻手爛左, 伯伯幫佢維修好似爸爸咁樣幫我維修 d 玩具, 壞人 Zurg 成日射巴斯光年, 我地用槍射佢, 佢係壞人黎架!

6. 怪獸公司

-- 小妹妹好鍾意怪獸毛毛, d 怪獸好乖架唔駛驚佢地, d 小朋友開心笑呀

7. 超能特工隊 

-- 媽媽隻手伸到好長識渣飛機, 哥哥跑得好快, 姐姐 d 頭髮好長遮住左眼睛

暫時小慈最鍾意睇白雪公主, 可能劇情夠晒簡單!  從小慈既角度看世界真係好攪笑, 估唔到佢既著眼點係呢 d, 真係好可愛~~

洗白白

弟弟習慣中午洗白白, 一來天氣和暖 d, 二來係唔會同放學返黎要洗白白既小慈家姐爭廁所, 由弟弟 9 個月大坐得穩陣開始, 我已經教弟弟坐沖涼盆, 然後用花灑同佢沖涼洗頭!

記得第一次用花灑淋佢頭仔, 我係等弟弟玩玩具玩到興高采烈之際, 用微弱既花灑由弟弟既後腦開始淋佢, 動作極之緩慢, 弟弟既反應係有 d 愕然望住我, 跟住本能反應就係用雙手抹面, 兩隻眼紅紅地咁對住我笑然後再玩水, Yeah!  叻仔!  同小慈家姐一樣爛玩唔怕水!!  經過 2 個月既訓練, 而家係可以用 "癲" 黎形容弟弟鍾意沖涼既程度, 一同弟弟講 "洗白白" 佢已經識聽跟住你去廁所等沖涼!! 你睇佢個心急樣, 手仔招攬叫人放水佢沖涼

玩到癲晒

一抱佢上水就知道沖完, 狂喊, 好凄涼......

沖咁耐會皺皮啦!

聽指令做動作

弟弟 8 個半月既時候已經學識 bye bye, 但個時係佢自己鍾意 bye 就 bye!  今時唔同往日, 11 個月大既弟弟俾左好多驚喜我!!  先係終於學識用膝頭哥爬

到喇!  到喇!!  到寶座喇!

終於肯聽指示做動作:  拜拜丫, 弟弟, 拜拜!!   媽媽好感動又開心!!

最鍾意弟弟個側面, 有勁大個面珠 DUN 同雙下巴 ^8^

一直以來弟弟都好為食, 無論你隻手渣住 d 咩佢都會過黎睇, 如果俾佢知道你食緊野, 佢會拉手拉腳甚至爬上你心口問你羅野食!!  近來仲學識 bu 口水同埋 lur 野!!   嫌我地手腳太慢餵得唔夠快弟弟就會 bu 口水, 仲要 bu 到好大聲以示不滿 @.@   食物唔岩口味仲會即刻 lur 番出黎!!  真係好難服侍呀!!!

早幾日係玩具店買左個足球連籃球架俾小慈小明, 趁今日放假攞出黎玩, 真係估唔到弟弟一教就曉,  我只係捉住佢對手示範左 3 次, 弟弟就識自己黎, 當然係要品嚐下個波先啦~~ 

一入籃小慈家姐就勁衝埋去啜佢又摔佢個頭!  好叻叻呀, 弟弟!

弟弟 11 個月大

弟弟 11 個月大!  眨下眼仲有 1 個月就 1歲, 大個仔 ^^

今個月都仲係 21 磅 (60線), 頭仔 47.5 cm (80線), 身長 76 cm (75線), 腳仔 12.5 cm, 肚腩 19.5", 大脾 10" 數字上冇咩太大增長, 不過我同爸爸都覺得弟弟聚手左, 都係個句啦, 健康就得! 

弟弟呢個月爆出左 2 隻側門齒, 而家有 4 隻牙仔!  無錯, 係出側門齒即係犬齒, 並唔係門牙, 大家想像到個樣有幾怪未呀?  有漏洞呀, 出牙出到成個凹字咁, 下個月仲 book 左 studio 同弟弟影相, 呢個冇牙公......

練習左個幾月弟弟終於肯用膝頭哥好標準咁一步一步爬, 可能經常扶住野企, 又站崗站得多腳仔開始有力爬得好左, 佢又歡喜人地拖住佢行, 而家拖住佢單手都識慢慢向前行, 唔知佢對扇形大腳掌會唔會幫到佢 1 歲前曉行呢?  有時佢都可以自己無端端唔駛扶野企定定 1-2 秒, 弟弟, 加油呀!!

近來又不停咁講太空話, ge le gwa la 一大串仲講到自己笑到卡卡聲真係好攪鬼, 佢都似有意識咁叫我 "媽~~~"  每次當我拖住小慈去廁所, 弟弟就會係後面窮追不捨, 一邊 "媽呀~~~~~" 

用毛巾將玩具收埋, 弟弟又識搵番出黎, 放入杯 / 袋既玩具都會伸手入去羅, 跟手就掉左佢, 執番俾佢又掉過, 重覆幾次測試你既反應同埋掉野落地既聲音!  唔見左野佢又會搵, 俾新野佢又識掉左原本手中個件舊既先, 手部動作都幾靈活, 已經識用手指公同食指羅起粒粒餅, 不過好奇怪地唔會食, 反而平時用手執咩都會放入口, 淨係粒粒餅要我地餵先食 @.@  識聽指令做動作, 叫佢拜拜就會手指向自己咁拜; 同佢講抱抱識張開雙手; 同佢講 NO 會停低佢做緊既動作望一望你, 我地仲有 d 擔心弟弟有左撇子既傾向, 俾咩佢都用左手羅, 唔通似爸爸?!  知道自己今日 11 個月大要羅汽球慶祝嗎?

11 個月大既弟弟尤其痴身, 除非佢瞓左否則真係冇可能賣甩佢, 一唔見人就喊, 去邊都跟住你, 不論遠近都會爬去你度, 但佢唔係要你抱, 只係要求你陪住佢坐係佢隔離!  而家喊得最大聲係小慈放學返屋企沖涼時, 因為要留低佢一個人係出面坐學行車, 所以而家唔肯坐啦, 未上車已經大喊, 攪到而家小慈沖涼要俾佢爬埋入廁所, 企係浴缸邊望住小慈沖涼先開心! 

弟弟大鬧冒險樂園

男仔果然係天生就識渣車

小慈家姐示範俾弟弟睇點樣玩遊戲機

小慈 3 歲半

小慈小姐 3 歲半喇~~~  

今朝預備返學時, 小慈話自己大個女要紥辮返學校俾陳老師睇, 點知紥起 d 頭髮仲短左更加似男仔 @.@  不過我唔理, 點都要捱過呢段唔長唔短既尷尬時間, 蝴蝶都係由醜樣既毛虫變出黎架啦!

笑容可掬

小慈 D 頭毛真係好少, 條馬尾紥起得手指尾咁幼咋~~

小慈真係好男仔樣 @.@  女生男相, 將來可能係靚女!!

小慈知道有得切蛋糕開心到飛起, 笑到瞇晒眼, 一個人食晒蛋糕上面既朱古力!

I Love You!!

瑤瑤姐姐生日

今日有街去, 通常出發之前我都會預告俾小慈聽去邊度等佢有心理準備, 於是我同佢講....

我: "小慈, 爸爸媽媽今日帶你去參加生日會呀!"

小慈: "係呀? 邊個生日呀?"

我: "呢, 跳水好叻個個呢?"

小慈: "海豚!!"

:DDDDDD  我真係俾佢笑到肚攣標眼水!!!  小慈見我笑成咁, 即刻好尷尬咁答我: 

"瑤瑤姐姐..."  跟住又問我: "爸爸媽媽都可唔可以同我一齊去生日會呀?"

近期同佢睇左本圖書叫 "交朋友", 故事內容就係話個小朋友去生日會, 去到人地屋企一個人都唔識, 又唔敢同人地玩坐埋一邊, 講故事個時小慈已經問我小朋友個爸爸媽媽去左邊架勒, 估唔到小慈咁入腦!  所以當我答佢 "可以" 既時候, 小慈係好開心架~~ 

瑤瑤姐姐 6 歲生日, 祝你身體健康, 聰明伶俐!!

今日有好多小朋友一齊玩

小慈表現比以往有進步, 雖然都係唔肯出去玩遊戲, 但肯笑住影大合照同埋排隊羅禮物!  以前一定要坐我大脾係都要我攬住佢, 仲要人地一撩佢就想喊, 性格慢熱既佢晚晚同佢睇故事書代入各種情景真係有幫助!  你睇小慈而家幾開心 ^^

小明今日都有出席, 易話為既佢俾 D 野佢揸住, 望到其他小朋友笑佢就好興奮

麥當當早餐

每個星期日朝早約 10:00 am 小慈都會叫肚餓, 應該係習慣左學校呢個時間食早點!  小慈問得好攪笑, 佢係同我講: "我食咩野呀?" 

有時我會整野俾佢食, 有時我會問佢想食咩?  不過問得佢想食咩, 9 成 9 都會答我食麥當當!  早晨全餐係小慈既至愛, 佢最鍾意搽麵包, 食薯餅, 飲橙汁

弟弟見小慈家姐開餐, 為食既佢又痴埋去, 真係小慈去到邊跟到邊架!

一手羅左小慈家姐半個麵包, 開心得佢丫

食到瞇晒眼, 好抵死!

弟弟個 2 隻牙仔真係俾佢 '妹' 到 1/3 個包 :)

騎膊馬

今日爸爸心血來潮同 10 個月大既弟弟第一次玩騎膊馬

小慈 8 個月

大家都係第一次騎, 小慈個時雖然玩得開心, 但佢係死扯住爸爸 d 頭髮慌死跌個隻!  由此可見小慈屬於小心謹慎, 穩穩陣陣型

相反弟弟就騎得相當淡定, 可見佢性格平和, 處事淡然

果然性格係天生架~~  

奄尖小姐

由 2 歲開始小慈既表達能力已經與日俱增, 由詞語變短句再變句子!  3 歲之後用詞語氣更加同我一模一樣, 有時連爸爸都分唔到句說話係我講定小慈講, 呢個女好明顯係會以媽媽為佢既學習對象!

似我, 當然開心啦, 但我近來發覺小慈有 d 野已經 '超越' 左我, 更有過之而無不及!!  例子:

- 做貼紙功課有時會貼歪左, 會堅持撕開張貼紙再貼過

- 油顏色油出界, 會要求我地幫手擦走再油過

- 食飯倒瀉湯 / 痴左飯粒係衫褲度會話好唔舒服即刻要求換衫

- 肯用手食雞翼, 但食一隻雞翼會要求洗手一次

- 個嘴 / 手指有少少污漕會要求用濕棉花 / 濕紙巾抹, 紙巾都話抹唔乾淨

- 著長褲褲管一定唔可以扯起

- 瞓覺蓋被一定要蓋過腳趾

- 指甲長 1 mm 都要求要剪

- 講野大聲少少都會話人冇禮貌

又喜歡指揮, 今晚小慈家姐教大家打電話, 佢唔將玩具電話一字排開都唔察覺原來我地屋企竟然有 4 個唔同型號既玩具電話!  小慈安排爸爸, 媽媽, 弟弟一人一機, 媽媽非常幸運被分配到最新型號既室內無線電話, 爸爸就可憐 d, 佢隻電話聽筒得手指尾咁細, 小慈仲一定要佢用 5 隻手指渣實, 真係笑死我喇!  Calling 小慈.... "媽媽你好心急想打電話呀?  等一陣啦, 好快就可以打架勒....."

電話接通, 小慈係咁講既: "喂?................. Bye Bye!"  XDDDD

真係唔知幾時開始小慈會變左奄尖小姐!!  對自己有要求其實係好事, 但我地真係覺得小慈已經走火入魔!!  好奇怪, 我地其實冇助長過小慈有呢 d 行為, 完美主義者都需要有人認同先會不斷有相對既行為出現!  好在係我地不斷努力薰陶 & 灌輸小慈 

"唔緊要啦"  "冇所謂呀"  "已經好靚 / 好乾淨" .... 等等, 次次都幫佢洗腦, 撥亂反正, 而家奄尖既情況都尚算受到控制!

小慈, 愛乾淨整齊唔一定要變成潔癖啊~~ 

爛訓弟弟下集

弟弟又有新招!  繼上次頭尾掉轉瞓之後, 今朝仲激, 弟弟終於學識趴轉瞓, 終於踢晒 d 被 @.@

呢條褲係我買架, 係唔係好攪笑呀?! 好想打佢個 pat

爛瞓開係有條路, 弟弟爬爬下.... 瞓左.....

只係早上既 8:40 am, 弟弟已經瞓到塊面起格仔, 一定係飯氣攻心

為免病緊既小慈再冷親, 弟弟又反瞓, 都係一人一件睡袋著住瞓覺啦~

好袋鼠 feel 呀 ^^