小慈做功課

升上 K1 之後, 最大轉變既唔係小慈, 而係我, 上次開完家長會, 老師話學校會....

1. 行 project approach, 會訓練小朋友創意想像力, 需要家長配合預備材料

2. 要小朋友學執書包, 訓練小朋友獨立, 有責任感

3. 要剪報紙做新聞分享, 訓練小朋友站出來面對群眾, 有自信心及表達能力

4. 每一日都有親子功課需要家長協助完成

而家有壓力個個係我啊 @.@  每晚我都一定要記住記住 check 小慈功課袋睇下有咩功課要做, 如果我夜返屋企小慈已經訓左, 第二日我就一定要早起身同小慈一齊做親子功課!  每日都要睇報紙, 如果見到有趣味性既新聞岩小慈講既就要剪起佢, 無理由要小慈同小朋友分享撞車 / 打風落雨 / 跳樓遇溺....  不過個 D 有趣 / 有價值 / 有警惕作用既新聞真係可遇不可求呢!

又要同小慈一齊 check 書包, 老師話每一日都會檢查書包入面有冇 口罩 / 體溫卡 / 外套 / 乾淨既衫以便替換, 如果做齊老師就會貼一張貼紙係課室入面既統計表上, 集齊唔知幾多張貼紙就有獎!  老師真係好落力教導小朋友, 所以我都要盡力配合, 真係有壓力同 N1 真係好唔同, 我都需要時間適應 @.@

上星期主題係 "上學去", 今個星期又有新主題 "我的衣服", 派左一張工作紙要小慈訪問弟弟有咩種類既衫, 有既就係工作紙上貼一粒星星, 於是帶左小慈入房睇弟弟既衣櫃, 小慈一眼望到弟弟頂西瓜帽就戴住, 估唔到仲岩戴, 小慈個頭真係好細 :DDD

小慈總共有 3 本活動冊, 會因應主題內容及進度而派發, 自己做得到既事就用顏色筆填滿個心, 小慈好俾心機油顏色不過都有少少油出界問我點算?  我梗係安慰佢唔緊要啦咁小事, 我一定唔會幫佢擦, 小慈已經好奄尖成日嫌三嫌四我地更加唔應該認同鼓勵佢

終於完成呢張工作紙, 小慈返學校仲要 present 架!

順便記錄下小慈語錄, 我每日對住小慈小明既時間真係唔算好長, 放工返到屋企都 7:00 pm, 食完飯兩隻衰 B 又早訓 9:00 pm 就上晒床, 有時真係同佢地冇咩兩句!  不過親子時間重質不重量, 我地成晚都會充滿笑聲咁既  :)  以下係其中一部份, 真係幾攪笑架~~

小慈扮吱我, 用 d 手指仔扮蟻仔係我塊面上面行.....

小慈: "係唔係好痕呀?  媽媽你話....依~~~ 唔好行啦, 好肉酸呀~~.... 咁丫!"

*************************************************

我教訓小慈唔好學弟弟講野, 弟弟唔識講野應該係我地教佢.....

小慈: "弟弟識講野架!  佢識講打打打打架!"  轉頭再同弟弟講:

"弟弟, 你係咪 Monkey 黎架?  識唔識 wu wu ah ah 呀?"

**************************************************

我好鍾意吱弟弟, 因為弟弟怕吱既笑聲好可愛, 每次我地同弟弟做完咩都好, 跟手小慈就會要求我地做番一模一樣, 於是吱完弟弟就要吱小慈....

小慈: "唔得喇~~  哈哈哈~~ 我唔得喇~~ 唔好吱我喇~~ 我投降喇~~  哈哈~~"

***************************************************

我同弟弟玩緊數手指, 數腳趾, 點虫虫.....

小慈: "媽媽, 你畫我隻腳板我會好開心架~~ 你畫完到我畫你隻腳板架勒喎, 你唔好郁黎郁去喎!"

****************************************************

小慈係度跳黎跳去, 我吩咐佢唔好整親爬緊既弟弟....

小慈: "我好犀利架!  我唔會踩到弟弟, 又唔會踩到你肚腩架...."

邊講邊跳過正在訓係地下做人肉 cusion 圍住弟弟既我, 即場示範左一次