小慈睇醫生

尋晚臨訓時發現小慈額頭熱熱地, 一探果然就係發燒,  小朋友真係話燒就燒冇任何病徵, 見佢只係乾咳兩聲成晚都好精靈仲全屋跳!?  為穩陣計都係食左退燒藥先訓免得半夜高燒!  點知都係守唔住, 一早起身小慈已經燒到 39 度!!  連佢都識同我講:

"媽媽, 我好唔舒服唔可以返學喇, 我想戴口罩同埋睇醫生...."

唉~~  睇醫生唔緊要呀, 唔知咩事發燒先驚麻!  而家最怕就係 H1N1, 身邊好多人都中左招!  渡秒如年咁等醫生開門, 9:00 am 掛號要排到 10:00 am 先有醫生睇, 真係好多人病!  好在小慈還算精神, 我放半日假陪住佢不知幾開心, 拉我玩呢樣玩個樣之後, 我同小慈手拖手漫步去診所

今日天氣真好, 有太陽, 微風吹, 樹底下遍地黃葉飛舞, 好美啊~~  

小慈問我: "咩黎架, 媽媽?" 

我答: "秋天到, 樹葉會由綠色變成黃色, 大風吹就會跌落地下" 

於是小慈要求執一塊樹葉話要一陣俾醫生睇, 小心翼翼咁將塊仲係綠色既樹葉放係自己個裙袋, 一見到醫生就羅塊樹葉出黎同醫生講:

小慈: "醫生, 我頭先執到塊樹葉呀!  你睇下!"

醫生: "塊樹葉好靚喎, 咩色架?"

小慈: "佢係綠色, 有 d 葉呢會變左黃色然後俾風吹落地下架!"

醫生: "你見唔見到呢塊葉有 2 隻色呀?  兩隻綠色唔同樣架喎, 知唔知點解呀?"

小慈: "我唔知呀"

醫生: "好似你曬太陽咁, 呢邊葉面向住太陽, 俾佢曬燶左, 所以佢深色 d, 後面冇俾太陽曬所以佢白淨 d, 好似你手臂都唔同色咁!"

小慈明 d 唔明 d 就轉移醫生視線: "醫生, 你有玻璃喎!"

醫生: "係呀, 玻璃裝住維他命同餅仔送俾小朋友, 送 2 包俾你啦!"

小慈: "多謝醫生!  醫生你要好小心, 玻璃會打爛架!"

醫生: "係呀, 唔係玩具黎架, 唔俾得小朋友玩架!  見你咁乖送張貼紙俾你添啦, 你識唔識佢呀?"

小慈: "呢個係史迪仔貼紙黎架喎!  史迪仔佢好曳架!  佢成日同人打交架!"

醫生: "你有冇去迪士尼同史迪仔傾計呀?"

小慈: "有呀!  迪士尼巡遊個度呢有好多壞人會捉左我去架!"

醫生幫小慈檢查完之後話小慈係感親, 發燒係頭盆, 好似去飲咁一道道菜咁上, 聽日就可能有鼻水, 跟住咳, 病徵會慢慢咁出晒黎, 而家所有藥都係開定, 有需要先食, 喉嚨冇紅冇腫冇發炎, 唔算太嚴重, 飲多 d 水休息多 d, 轉天氣一早一晚涼, 晏晝熱係好易攝一攝就病, 盡量唔好開冷氣, 一出一入要攝毛巾係背脊吸汗, 最好換多幾件衫!  講解完病情之後, 醫生竟然同我講叫我好好栽培小慈, 話小慈好聰明!!!  佢見過咁多小朋友佢識分, 醫生話小慈講野好叻, 講野叻既小朋友一定係聰明既!  小慈仲要係主動講野個類小朋友, 主動, 肯分享, 講野有條理, 有紋有路, 呢 d 小朋友一定係叻!  唔望小慈個樣, 淨係聽佢講野會以為佢好大個, 吩咐我唔好徙左佢, 教佢多 d 野.....

嘩~~ 醫生!  我估唔到你講 d 咁既野, 我受寵若驚啊~~  小慈每次係醫生面前都有 "好表現", 因為個衰妹真係好鍾意睇醫生!  正如小慈鍾意返學, 對住老師都好多野講一樣!  邊個家長唔想聽到自己既仔女俾人讚丫, 所以我一路聽一路飄飄然緊 :D  講真, 我都冇咩點栽培小慈, 亦都唔知點栽培, 只係多 d 同小慈玩, 見到咩都同佢講下, 生活教育多 d 咁咋!  我既信念係只要親子關係好, 小朋友知道你愛佢, 同你一齊開心, 佢必定愛親近你, 聽你話, 咁你教佢咩講咩佢都聽, 對小朋友咁有影響力, 自然就會事半功倍啦!!

之後食左藥好番 D, 小慈又露兩手俾我睇, 背學校既 "來上課" 俾我聽:

來上課 來來來, 來上課. 來遊戲, 來唱歌, 上學樂趣多!

小慈仲唱左首 "歡迎歌"  我好感動呀!!  以前返教會, 如果係第一次返去, 所有弟兄姊妹都會埋黎同你握手唱歡迎歌歡迎你返教會!  佢地既熱情有時會令到初初返既人既尷尬又難忘!  估唔到咁多年後會係小慈度再聽番呢首歌, 莫名其妙感動了!!  

歡迎歌

我們歡迎你, 真歡迎你, 在主裡誠心歡迎, 哈利路亞,我們歡迎你, 真歡迎你, 在主裡誠心歡迎~~

神呀!! 多謝你!!  讓小慈在你既恩典下成長, 就是到老也不偏離!