幼潛第 2 期第 8 堂

今日少爺仔瞓晏左, 所以去到已經完左第一個遊戲 @.@ 

遊戲一 -- 講故事

故事內容最好配合道具, 如果有大象出現, 就預備大象公仔, 有車就預備玩具車咁引起動機及提高趣味性, 17-19 個月既小朋友理解能力有限, 故事內容只需要圍繞 Hello, Bye Bye, 早晨, 謝謝, 同埋人物名稱已經足夠, 之後就可以加入自理能力及生活經驗, 如貓貓鍾意飲奶奶, 大象幫老鼠梳頭等等, 至於耐性方面, 比較建議家長同小朋友對坐, 好過要小朋友坐大脾, 一來你睇唔到佢表情反應, 二來小朋友正常會爭住揭書, 掛住揭就睇唔到書入面既內容!

遊戲二 -- 拆禮物

用大張既白紙好似藥材舖執藥咁包住一粒星星餅請小朋友拆開, 訓練空間概念 (左揭右揭), 解難既能力同埋 "延遲滿足", 通常小朋友都好心急, 明知紙入面有食物就會好想快 d 有得食, 會遞俾你叫你幫佢 or 會發脾氣大叫!  拆禮物既過程就係訓練小朋友有耐性, 屋企有乾淨盒仔, 拉錬袋都可以做到同一效果

遊戲三 -- 障礙賽

請小朋友行梅花莊, 低頭穿過大呼拉圈, 訓練小朋友空間感, 學習低頭強壯後頸肌肉, 小明未掌握到點頭鞠躬呢 d 動作, 佢寧願爬都誓不低頭過呼拉圈呀, 衰仔!

平時上完幼潛多數會即刻車佢地兩個返屋企瞓晏覺既, 但今日要參加生日會就帶兩隻豬仔返學校飲茶, 影左幾張相我覺得好靚!  小慈有街去就開心

影到大口仔出左大牙未出犬齒, 好好笑

見唔見到個 8 啖蚊爛呀?  仲未好番呀陰公!

大力水手

買左件大力水手夾衣俾弟弟, 真係快高長大呀佢, size 90 都係 just fit 咋! 唔知夾衣同其他衫一唔一樣計法呢?  小慈由 3 歲到而家都係著緊 size 90 既衫咋喎, 女真係抵養!  

弟弟係唔係好嬌俏呢?

今晚攞番 d 收埋左好耐既玩具出黎, 呢個其實係一個 3 合 1 既射波組合, 有足球 / 保齡球同手球玩, 只可惜我地想教弟弟玩既時候, 佢完全當左呢個係帳蓬, 成個人呢左入去

仲要不知幾自在完全唔打算出黎, 攪到小慈想玩都冇得玩, 就算用波掟佢, 弟弟都當我地同佢玩仲識得用個 cover 黎防禦, 吹到 bear bear 聲呀 @.@

最後用佢至愛既兩個足球先可以引蛇出洞, 都唔明 d BB 點解咁鍾意穿山洞!

本來今晚好開心, 不過俾我見到弟弟面上面有 2 粒大蚊爛!!!  跟住左手隔肋底再多 6 粒!!!!!  層層疊疊, 每粒都成個 1 毫子咁大, 我真係肉都赤埋, 嬲到我死!!!! @%&$%^$@

 

工人姐姐話係瞓晏覺時咬, 應該係同一隻蚊所為, 有咩理由開住風扇都吹唔走隻衰蚊架!!  激到我即刻開蚊機, 又倒左半支花露水去小慈小明 d 床舖被褥上面!!  

夏天都未正式黎 d 蚊已經咁猖獗, 可能要買蚊脹俾弟弟瞓覺至得!

戒指

每晚同小慈講完故事, 我都會陪佢爬上上格床瞓覺, 由初初佢一定要我瞓佢隔離, 到而家只要求我企係旁邊陪佢, 不過都會要我拖住佢, 好痴纏咁架!  今晚當佢拖住我時, 小慈摸到我隻戒指問我咩黎?

我: "呢隻係戒指黎架, 你大個女第時搵到個老公結婚, 好似媽媽叫爸爸做老公, 爸爸叫媽媽做老婆, 結左婚就可以戴戒指架喇"

小慈: "第時我個老公就會俾戒指我架喇?"

我: "係呀, 你同你老公就會一齊住, 有自己既屋企..."

小慈面色有變仲開始眼紅....

我: "做咩呀, 小慈?"

小慈: "我要好多人一齊...."

我: "咩野好多人一齊呀?"

小慈: "我要媽媽爸爸弟弟同埋姐姐...."

我: "啊~~ 你唔要同老公 2 個人住呀?  好啦, 將來我地一家人一齊住啦!"

小慈: "嗯~~"  

終於好滿意咁合埋眼瞓覺!  媽媽覺得你好可愛呀小慈 ^8^

傻妹, 你而家細個梗係唔想離開媽媽啦, 過多十年八年, 好快就同男朋友仔拍拖去街, 不過媽媽今晚聽到你咁講都好開心 ^^

慶祝母親節 @ 圓方

一年一度母親節, 小慈係學校整左好多禮物仔送俾我

 呢個係手飾盒, 前後都有小慈印畫, 仲有一條佢穿既手鍊

小慈話條海豚游水游到出汗

仲有畫左我個樣, 好好笑

我的兩個小寶貝!!  媽媽有你地已經係最好既禮物~~

今日約左爺爺嫲嫲姑媽姑丈昊昊一齊去圓方慶祝母親節, 去得圓方, 好記性既小慈又點會唔去溜冰?  一人一隻企鵝仔

弟弟冇得玩, 摸下隻企鵝已經好開心

睇住弟弟我都冇得玩, 不過小慈開心就得啦!

企鵝仔真係好幫手, 爸爸完全唔駛扶住小慈

比起上次大膽左, 小慈自信心強左好多

兩位小朋友都好勇敢, 唔要隻企鵝都可以自己滑前三四步

小慈同昊昊玩左 50 分鐘, 弟弟周圍跑下又玩上樓梯都好 high

今日件衫仔係咪好靚呢?  媽媽最鍾意同弟弟著夾衣

等位食飯時, 爺爺同弟弟玩 fing 轉圈

今晚食泰國菜, 弟弟見我地食咩佢都要, 連咖哩蟹都唔放過, 同佢講 "辣辣" "熱熱" 都係要食

你睇佢幾忙

圓方真係好大

呢幾舊石令到 3 位小朋友玩到樂不可支

弟弟非常自在, 行緊都笑

要捉住弟弟先可以合照

同嫲嫲玩緊

攻頂了!

爛玩弟弟, 小慈做咩佢又做咩

祝嫲嫲母親節快樂, 身體健康~~

We love you ^8^

幼潛第 2 期第 7 堂

今日已經係幼潛第 7 堂了, 基本上除左弟弟例必要跑圈之外, 佢已經好習慣幼潛既模式:  

上堂要坐靚點名, 舉手叫 "到" 將貼紙貼上身, 埋位唱歡迎歌, 左手換右手搖樂器, 同其他小朋友交換樂器, 上堂前後玩完玩具要收拾佢全部都做得到, 做得好!

遊戲一 -- 唱兒歌 

"跟我做"請你跟我拍拍手 / 摸摸頭 / 指指鼻 / 伸伸手...... 讓小朋友學習摸仿, 聽指令做動作, 緊記唱歌要慢, 指令要清楚及要重覆 3 次, 通常小朋友第 1 次係睇, 第 2 次係學, 第 3 次先會跟住做

遊戲二 -- 慶祝母親節整大糖及母親節咭

用玻璃紙包廁紙筒整粒大糖, 教小朋友學習用手仔推, 拉及用手指扭, 跟住貼貼紙上母親節咭做裝飾, 訓練前二手指

呢幅係小明既作品

呢幅係小慈既, 將 d 貼紙貼晒上面, 笑死我喇

遊戲三 -- 踢波

用保齡球樽做目標吸引小朋友踢波, 17-19 個月既小朋友已經可以踢波 1-2 尺, 小明識講 kick the ball, 但要佢企定定將小腿拉後再向前踢先叫真係踢波, 一邊行一邊踢到波仔係唔算識踢

小慈 K1 下學期學校旅行

尋日落狗屎落到冇晒心機, 於是夜晚同小慈一齊祈禱希望天父收埋 d 雨雲俾番個太陽伯伯我地, 嘩~~~  真係神蹟呀!  今朝一起身真係天朗氣清, 多謝天父!!  於是我地一家 5 口齊齊出發了 ^^

小慈話一定要帶埋爸爸, 弟弟同埋工人姐姐去旅行, 今日既目的地係元朗

搭車必定瞓覺既弟弟, 瞓左都緊握扶手, 幾乖

今次旅行交左俾旅遊公司負責會去好多景點

第一站就係去參觀恆香老婆餅廠

新鮮熱辣老婆餅, 小慈話都係鍾意菠蘿包多 d

第二站 -- 錦田鄉村俱樂部

一入去小慈已經俾檔金魚吸引左

錫到佢燶既爸爸點會唔俾佢玩

弟弟苦等小慈不果, 終於係要出去搵家姐

小慈都撈到好多條, 不過我地摸完一輪抽晒水, 就會將 d 金魚俾番魚檔

引晒成班同學仔一齊摸金魚

又要驚又要摸開心到飛起

玩完金魚就周圍行下, 呢度好大, 好耐冇見過荷花池

叫弟弟摸下個大樹菠蘿

衰仔摸摸下錫左個菠蘿一啖!!

雖然呢度叫鄉村俱樂部, 但我覺得呢度好似農場, 去賓尼兔樂園餵兔仔先~~

呢隻松鼠唔 show 人仲要跑得超快, 弟弟紥晒馬咁餵佢, 好攪笑呀!

山羊仔, 弟弟好鍾意佢

望到眼甘甘

弟弟好大膽, 佢又想埋去錫隻山羊, 好在隻山羊避開左 @.@  老師都俾佢嚇親, 話佢其實係唔識死

向大草地進發!!

唔記得帶個波俾小明踢下添, 佢識講 kick the ball 架!

小慈最鍾意玩 Bouncy Castle

$20 / 10 分鐘, 不過小慈應該玩左半個鐘以上

跳到成身汗底衫都濕晒連辮都甩埋

唔好話跳, 弟弟係草地散步都出晒汗!  今日真係好熱

創舉!!!  小慈俾左個驚喜我地, 導遊姨姨請小朋友出去唱歌, 小慈竟然舉手出去唱 Happy birthday to you, 真係估唔到佢會咁做!

第三站 -- 荃灣熊貓酒店食 buffet

不過我地太攰, 弟弟又開始扭眼瞓, 所以我地冇去第四站既嶺南之風公園, 提早結束行程返屋企瞓覺~~

呢個係小慈班主任郭老師, 校長話如無意外而家呢兩位老師都會跟到小慈畢業, 太好了 ^^