伴讀 Day 3

Day 3 返學~~  今日係 last day 陪小慈一齊上堂了!  3 日既家長陪同眨下眼就過, 我就開始熟悉返學既程序, 希望小慈都一樣適應同埋投入啦!  尋日做所有野之前我都預先講俾小慈聽, 佢有心理準備就表現得好好多!

今日都好順利, 不過都係唔肯坐地墊點名, 凌空用腳仔撩我小腿要我擘開大脾俾佢坐, 仲大聲話:

"一陣先!  No 呀!!" 

唉~~ 咩事唔肯同小朋友一齊坐呢?  不過有進步肯去廁所洗手, 但行兩步會回頭搵我仲拖實我,  慌死我走左去咁!

小慈祈禱食生果個樣超爆笑, 咪晒眼但又想偷睇!

今日又係食橙, 小慈已經連續 3 日食清晒碟生果, 連老師都讚佢叻, 又肯收拾!

希望聽日冇我幫手都 ok 啦, 擔心佢食得論盡又食得慢... 不過呢 d 都係要佢自己學習

今日安排有少少唔同, 跳完熱身舞玩大肌肉時要開家長會, 陳老師過黎幫我氹小慈等我甩身, 佢話媽媽要去廁所我就閃入另一間課室!  不過唔夠 3 分鐘已經聽到小慈大喊,  大叫 NO~~~~~  原來小慈唔俾陳老師拖又唔俾佢抱, 要自己搵媽媽, 大喊住周圍搵, 搵唔到先返去陳老師度要佢抱, 抱住就唔喊.  之後第二個小朋友喊陳老師就放低左佢, 小慈收左聲就肯俾第二個老師拖住, 不過咩都唔肯玩 @.@  到我見番佢時, 小慈即刻用手箍住我條頸黐到實!  陳老師就話: "係咪呀?  媽媽返黎接小慈喇!  媽媽去左廁所丫麻!  唔駛喊架!"  我又 repeat 一次媽媽會接小慈返屋企, 頭先去廁所咁夾晒口供

陳老師話小慈懂事, 受安慰, 肯聽人講道理, 好叻!  仲叫我唔駛擔心, 小慈會好快適應學校生活!  小朋友一開始返學就喊係好事黎架, 代表佢識表達自己情緒, 最重要就係明白道理就最易教!  陳老師仲問小慈之前係唔係返過 playgroup?  有冇離開過我?  我話有呀, 做左好多準備工夫先返學架!  之前離開我都 ok 架, 突然又倒退唔知關唔關我大肚事?  不過係屋企佢扭計我地都係唔睬佢既, 由得佢喊一陣, 佢會識返轉頭同我講: I love you!  陳老師都笑, 佢對小慈好有信心, 佢話佢頭先都冇理小慈由得佢自己搵媽媽, 搵唔到就返去搵佢!  小慈就係咁, 大喊時氹佢佢係聽唔入耳既, 唔理佢一陣反而仲快收聲!  忽視法現階段係最有效既方法!

我都好驚唔知聽日點?  我點甩身要小慈自己上堂呢?  唔係次次握佢去廁所呀麻?  陳老師就話佢地有足夠人手氹, 但咁多小朋友一齊喊係好難攪架喎!  我有咩事前工夫可以做左先呢?  陳老師就教我同小慈講....

"小慈自己返學, 媽媽一陣間黎接你返屋企, 而家有老師有小朋友陪小慈一齊玩, 好開心架!  玩一陣媽媽就會黎接你!"

希望真係 work 啦!  將一切交托俾神

伴讀 Day 2

Day 2 返學喇~~

今朝 6:30am 就醒左, 好合作換衫著波鞋, 仲揹住個書包唔肯除添!  知道我同佢返學就好興奮, 又咁岩撞到同學仔一齊搭火車返學添!

今日連我都熟習學校程序, 教小慈係學校鞋架羅鞋換, 教佢先洗手再入課室放書包就可以玩玩具, 玩左一陣老師要點名, 小慈又係唔肯去仲爬上我大脾同老師講: "一陣先~~"  我同佢講數話坐一陣就要自己坐架喇!  小慈又話 ok  佢都係慢熱, 未掌握發生咩事前係一定唔會離開我既!  唔知冇我係度佢又會點呢?

點名又識舉手應人喎, 全班 20 人點完名齊齊去洗手小慈又唔肯喇, 要我抱, 同佢講數洗完手有 banana 食先肯去, 老師想拖佢行衰妹仲 fing 開老師叫媽媽添!  惡惡呀!!  好在老師冇介意咋!   茶點前祈禱, 小慈知喇, 仲識同我講: "未食得住要等一陣先, 祈禱先有得食!"

我今日醒目呀, 有錄影段禱文遲 d 就可以係屋企又同小慈祈下等佢多 d 歸屬感麻!   香蕉小慈好鍾意食, 不過太心急連蕉皮都一齊咬埋!  又食得慢, 所有小朋友出去交晒碟小慈都仲食緊, 攪到我忍唔住餵佢飲水等佢可以快少少

大肌肉活動前跳熱身舞, 小慈今日好開心有跟住跳!  最叻係蹲低摸 pat pat 模仿得最似!  錄影佢既可愛樣 ^^  今日肯踏單車同埋自己爬上滑梯, 叻左!  但投訴小朋友推佢, 好大聲同人講:

"唔推小慈架!  小慈痛痛, 小朋友曳曳小慈唔睬!"

話到個小朋友飛起我要即刻輔導佢話個小朋友唔小心, 冇事冇事..... 先平息到小慈公主既怒氣!!  睇黎佢都係八妹仔一名, 但識表達自己既情緒係一件好事

話放學就最開心, 識得去鞋架羅自己對波鞋, 得佢一個著紅色波鞋所以好易認!  一出學校門口就要抱, 佢個樣好眼訓啊~~~  好啦, 抱一陣啦!  我淨係話係學校唔抱之麻, 所以一出門口就識要求啦, 衰妹!  不過佢都乖既, 知道我籮咁大個肚真係唔抱得佢幾耐, 同佢講抱一陣要自己行佢又 ok, 事先聲明小慈有心理準備佢係會講道理既

今日表現有進步, 我都好開心

開學日

開學了~~~ 小慈返學了~~~  小慈人生中第一日返學啊~~~

8:30am 小慈已經醒左飲完奶奶, 我仲有時間幫佢執書包影下相, 仲錄影佢第一次著校服既情形添!  小慈心情好好, 知道我會陪佢返學識講:

"爸爸返工, 媽媽唔駛!"

我都好緊張呀, 學校只係俾家長陪 3 日, 真係唔知之後會點.....  見招拆招啦!

見證歷史時刻

書包大過人仔, 不過好輕架咋

要搭一個站馬鐵返學

返到學校要換波鞋, 又要洗手, 忙碌一輪先入到課室, 好多小朋友已經返到, 由出屋企門口一直都係自己揹書包, 人仔細細揹住個書包淨係見到佢兩隻腳真係好攪笑, 好似不勝負荷好辛苦咁, 揹住大大個龜殼!!  學校書包櫃貼住小慈張相 -- 郭恩慈西瓜組 ^^ 

而家先肯除書包放係櫃入面, 之前我話幫佢都話唔駛, 仲同我講: "小慈架!"

入角聽郭老師講故事, 小慈見到成班同學除鞋坐地墊竟然唔肯去要媽媽抱!  我唔肯抱佢就移動個 pat 坐我大脾!  Oh No~~~  點解又好似返豆芽組咁呀?!  絕對有小朋友排排坐恐懼症.....

講完故事郭老師請小朋友洗手食茶點, 小慈發爛渣箍住我唔肯去!  我同佢講媽媽係學校唔抱小慈, 仲話我對手污漕要去洗佢先尾隨我去, 但行 2 步又要我抱, 堅持唔抱佢就由廁所喊住返課室 @.@ 

最後係見到碟橙先肯收聲, 話: " orange 喎~~  小慈 blue 碟碟!  小朋友 yellow"  食茶點前要祈禱, 小慈好合作咁雙手合十咪曬眼, 跟住用叉仔食晒 4 片橙就開心番, 連水都飲晒 !  食完幫手收杯碟又好合作, 不過之後就唔肯玩大肌肉活動, 只肯企係我旁邊聽住音樂跳舞, 仲笑添!  有歌聽心情就好好

放學老師派小禮物同埋貼紙, 而家先識笑!  真係唔知係小慈慢熱定係安排太快呢?  好似岩岩先適應入角聽故事就要轉地方去洗手, 坐係課室一陣又話又去大肌肉.... 希望聽日好 d 啦, 老師都話最差唔係喊, 坐大脾攬住唔放先難攪啊~~~

迎新日

今日係基督教宣道會沙田幼兒學校既迎新日, 係學校特別安排小朋友先適應校園生活, 星期六同爸爸媽媽一齊返學留下好印象

小慈今朝好早起身, 輕易調較到佢早睡早起, very good!  見到我地換衫出街好興奮, 拖住我地好乖咁去搭火車, 仲羅埋我地張八達通去嘟, 又識企定定搭扶手電梯, 識講 "火車黎喇~~", 月台見到個大鐘又識講 "clock 黎架喎!"  好可愛跳下彈下咁就返到學校, 今次已經係小慈第 3 次黎呢度 --  第 1 次就係 interview, 第 2 次係尋日黎學校買書, 我專登請假帶埋小慈同工人姐姐一齊黎學校認下路, 所以今日迎新日已經係第 3 次喇!

入門口老師俾名牌小慈, 多得開心豆芽組既操練, 小慈對 "牌牌" 一 d 都唔陌生, 跟住一齊唱熱身歌, 做 warm up exercise, 小慈都好投入呀, 唱歌係佢既強項麻!  跟住又有得玩砌大 lego 同玩滑梯, 但唔知點解唔肯坐車仔, 排隊去洗手間又肯去, 俾老師拖入廁所好耐都未返出黎!?  原來老師要小慈坐廁所去小便, 小慈又肯坐喎!  片片濕左老師仲同佢換埋片添!  估唔到老師又唔怕麻煩同佢除鞋除褲, 更估唔到小慈唔怕三保咁合作

入課室玩玩具, 同我一樣大肚中既郭老師安排小慈自己坐, 俾左一份夾夾餵馬騮食香蕉既玩具小慈玩, 我同爸爸離遠觀察, 小慈好叻呀!  夾夾收放自如手勢正宗!  十幾條香蕉由個筒夾去 monkey 個口, 小慈夾得好快, 攪到我忍唔住埋去影佢, 成枱家長睇住佢表演!  老師都話小慈小肌肉控制好叻!  咁咪好快識渣筷子!?! 

玩第二份玩具仲攪笑, 係 d 動物公仔配對遊戲, 每隻動物個頭同身體係分開要自己配對番, 最鍾意小動物既小慈已經好興奮, 又攬又錫愛不惜手, 係咁同 d 動物講: "你好呀~~~"  又監隻企鵝同長頸鹿鞠躬, 又要佢地排隊真係好好笑

玩到頭都甩埋

開開心心就過左一個鐘頭, 9:30-10:30am 放學了! 

今日小慈表現唔錯, 希望佢對學校既印象唔差啦!  臨走時老師送左張豬仔咭俾小慈, 小慈竟然話: "多謝區老師~~"  之前返得多開心豆芽組, 小慈當左 "區老師" 係所有老師既代表!  其他郭老師, 陳老師, 張老師對佢黎講都係等如區老師呢 ^^

今日仲認識左一個原來住係我地樓上既同學仔添!  上次係公園見過一次, 同學仔叫林樂瑤, 佢媽媽問小慈幾大讀邊間學校就係咁傾左幾句, 佢媽媽又真係聽我講即刻轉左校做同學仔啊!!  大家互相照顧啦~~

小慈 2 歲 4 個月既語言能力

- 識唱 "熊人熊人快樂笑"

- 識倒後行

- 學識用 "唔~" 黎應我

- to my bed (自己入房上床訓覺)

- bed 濕晒 (漏尿)

- 媽媽換衫啦, 去啦!  去啦! (推我入房)

- 姐姐係入面喎

- 小慈自己羅野先

- 媽媽渣住呀!  渣住唔好跌呀!

- 媽媽唔訓覺!  媽媽唔屙屎屎!

- 中英對照 cover / 蓋蓋, coughing / 咳咳, turn off the light / 熄燈

- nice shoes / 靚靚鞋鞋, all fall down / 跌跌, heavy / 好重呀

- where are you going?  返黎呀!  唔好去呀!  爸爸訓覺呀!

- 小慈 chopping the food, bb 食飯喇~~-

- 小慈唔食粥粥呀!  No 呀食粥粥

凸肚臍

Oh No~~~~ 

22 weeks 5 days, 我個肚臍失守了!!

著件薄 tee, 好明顯有一點向外凸出!!

果然人地話陀女肚圓, 陀仔肚尖, 尖到凸左出黎 @.@

連小慈都見到我個 belly button, 忍唔住埋黎摸我時仲俾弟弟踢左一下添  :DDD

可能弟弟都唔鍾意我地笑佢呀~~~

080808

今日係一個好特別既日子 -- 2008 年 8 月 8 日北京奧運開幕!!  好睇到全世界目瞪口呆, 第一次自豪地覺得我是中國人

我同秋秋冇睇到直播, 因為我地去左撐枱腳慶祝我地拍拖 15 年既大日子 ^^ 

15 年喇....  我地由拖友變夫妻再變成父母, 真係要大叫一聲 :

"我們都是這樣長大的!"

寶貝女小慈已經 2 歲 3 個月了~~  影張相跟住出去食大餐, yeah!

揀左去好有浪漫氣氛既 YAMM 食 buffet, 因為佢地有我最愛既長腳蟹, 即開生蠔, Prama Ham + 哈蜜瓜, 仲有 main course, 同埋不停供應既日式炸物同刺身, 非常岩我同秋秋既口味, 超正!  掛住食, 我已經唔記得左呢碟係咩東東, 不過每碟既 display 都好靚~~

呢個巨肚絕對唔係飽到咁.... 哈~~ 事實上, 已經陀住弟弟 5 個月喇

秋秋, 多謝你追我, 揀我做老婆, 我又肯嫁俾你, 你又再令我做兩子之母... 好幸福呀!!

多謝天父一直同在保守看顧!

弟弟照結構性超聲波

懷孕 20 周 6

今日 2:45pm 同秋秋一齊去威爾斯 7E 照結構性超聲波, 好耐冇返黎 7E 呢度喇, 個時規定見紅穿水入院生 BB 要黎呢度, 我陀小慈時有妊娠糖尿更加要返黎呢度住 2 日 1 夜食足 8 餐營養餐 + 每餐篤手指 & 抽血驗血糖, 好在住得近可以 "回家渡假" 返屋企訓覺咋! 

今次我好有信心自己係冇妊娠糖尿既, 只要我唔好飲完糖水走去訓根本就唔會超標!  不過健康院都唔放過我, 一般都認為第一次有妊娠糖尿第二次都一定有, 所以要我 11 周 1 次, 27 周 1 次咁, 飲足 2 次糖水黎測試我係唔係真係冇妊娠糖尿 @.@  我真係係一個好例外既例子

今日弟弟非常合作!!!  醫生想照邊度, 照咩野, 好快就照到晒仲要位置好靚!  身體比例仲要好好完全可以做 demonstration 示範俾 2 個醫科學生睇添!  醫生好開心, 佢影左好多張 4D 相俾我留念, 猛話我個仔好乖, 好乖!  唔係個個 B 都咁合作架, 有 d 攪成個鐘位置唔好咩都睇唔清楚! 

醫生好攪笑, 佢影到一張弟弟既大頭相, 係一個側面睇得好清楚, 醫生可能覺得好靚, 於是佢影多張白底黑影俾我添!   多謝~~ 多謝~~

不過醫生要求我 30 周 6 返黎再照多一次結構性超聲波, 10 周做一個比較喎!  咁得意?  通常一個孕婦只係照 1 次 4D 架咋, 因為政府資源有限丫麻!  Anyway, 佢肯照我又冇咩所謂既, 當多一次產驗羅!  醫生話弟弟一切正常, 係中大碼 BB 添!

見到弟弟個靚仔樣, 好開心!  秋秋話弟弟個樣好似佢細個呀!

靚仔來了~~~  ^8^

小慈 2 歲 3 個月既語言能力

- 識唱太陽伯伯

- 識唱 ABC song (MNOP 個句差少少, W 都識)

- 識分 你 / 我, 高 / 低, 大 / 細, long / short, 熱 / 凍

- 識倒數 3, 2, 1

- 突然高 8 度講野

- 能辨別物件屬於邊個既 eg 對鞋係爸爸既, 個袋係媽媽既, 小慈架!

- 有觀察力 eg 睇到我載戒指, 姨姨喊呀 (電視入面)

- 做錯野 / 扭完計 / 知我嬲會講 "I love you~~"

- 我鬧佢會話 "媽媽細細聲!"

- 咩都問 "咩黎架?"

- 爸爸, 凍凍呀 (原來想飲爸爸個包凍檸茶)

- 小慈食包包, 小慈飲茶茶, 飲唔到呀

- 爸爸訓醒, 爸爸食飯喇

- 爸爸玩泥膠, 玩呼拉圈, 玩睇醫生.... 非常有要求

- 行雷呀!  閃電呀!

- 叫自己做 "郭恩慈"

- 好大風~~ fly away~~~- 媽媽, 腳仔要擺靚靚, 唔岩呀你!

- 媽媽攰, 爸爸唔攰, 爸爸抱!

- 爸爸唔攬住媽媽

- 行喇, 行喇!  去媽媽度

- 問佢 "弟弟呢?"  小慈會摸我個肚, 有時仲錫一啖

- 如果弟弟岩岩踢佢, 小慈會話 "曳曳!  唔岩!"

我: "咬小慈得唔得呀?"  小慈: "唔岩呀!  小慈痛痛呀!"

弟弟踢我喇~~

今晚夜闌人靜係床度睇緊書之際, 突然肚皮郁左 2 下!!   我即刻坐高少少摸下個肚問弟弟:

"係唔係你踢我呀?"

 弟弟即刻連環 4 腳咁踢多我一次 ^^

16 weeks 4 days 弟弟踢我了~~~~~ 

同小慈家姐一樣都係 16 weeks 識踢人!  弟弟仲比小慈家姐更加孔武有力呢!

好 man 呀  :)

我而家重 50.8KG = 重左 6 磅半, 弟弟都有 11.4cm 長了! 

一切正常!  Very Good!

大肚住 Disneyland Hotel 慶祝結婚 5 周年

Connie 姨姨有年票住迪士尼酒店有 65 折優惠, 於是約埋我地一齊入去玩番晚順道慶祝結婚 5 周年紀念 ^^ 

世事往往就係咁, 出發之前小慈有微燒, book 左又唔可以 cancel, 唯有睇醫生羅定藥入去 Disney 啦, 已經有 d 掃興, 果然唔舒服既小慈好扭計, 成日要抱住咩都發脾四, 心情好差, 本來諗住 check in 後去 Disneyland Hotel 既室內泳池游水, 點知小慈訓左.....

等小慈小姐訓醒都已經天黑, 於是係酒店搵食!  Disneyland Hotel 係好靚, 不過太 grand 好似冇咩野岩小朋友玩, 小慈又想食薯條, 為左氹寶貝女開心唯有搭 shuttle bus 去 Hollywood Hotel 既 playroom 玩下同埋食野啦~~

食完野, 心情惡劣既小慈連煙花都唔想睇, 於是返酒店房一家三口係超大按摩池沖涼玩水開心一下!   好早就訓, 咁就結束左我地既 Day 1....  故事未完, 簡直禍不單行 @.@  小慈成晚訓得好差左碌右碌, 為免一家三口一齊冇得訓, 我訓係中間隔住小慈, 我攬住佢訓好過佢踢埋秋秋!  半夜小慈訓到又坐低又趴轉, 我岩岩想扶佢訓番好佢又岩岩想企起身定想訓底, 電光火石間我都唔知發生咩事就俾小慈一個後腦撞埋我隻犬齒!!!!!!!   XY 佢個 Z 痛到我想爆粗星巴佢 *^(^&*%&^*$#$^*&)&%*  撞爆左我個嘴成口血不特止仲痛到我暈暈地......  冇辦法之下搖醒秋秋係雪櫃羅罐可樂俾我冰敷!!  我都唔知自己有冇訓, 真係貼錢買難受 V_V  下次小慈病就算買左飛機票我都唔會出門.....

Day 2, 好在第二朝小慈訓醒心情好番 d, 不過我就慘喇, 個嘴腫晒開始有瘀傷 @.@  Connie 姨姨話知我地係恩愛夫妻咋, 我咁既樣有理由懷疑我俾老公打!!! 

苦中作樂, 一場黎到就 enjoy 埋佢啦!  訂左酒店早餐, 好貴, 因為價錢包括迪士尼朋友埋黎同你影相,  小慈公主終於識笑喇~~~ 好在好在!! 

遮遮掩掩影相唔係好覺我嘴角既瘀傷, 見唔見到我 4 個月既身紀呀?  弟弟係入面呀 :)

高飛好高, 同小朋友玩一定要蹲低

高飛好鍾意攪小慈頂帽對耳仔, 因為同佢一樣丫麻

我地純粹嘆早餐, 食左好耐, 估唔到 d 大公仔係會返轉頭架喎!  影完又影

Daisy 好熱情, 見唔到 Donald Duck 有 d 失望.... 好在之前都影過相咋

Daisy 拖小慈埋黎錫佢一啖, 佢個鴨嘴錫到小慈面都歪埋

開心晒既小慈~~~

11am check out 了~~返酒店房執埋 d 野, 好在有呢個床欄, 否則小慈咁訓法唔跌落床就奇!

小慈極度鍾意呢把傘

放低行李周圍參觀呢間咁靚既酒店, 好出名既米奇迷宮, 不過呢兩日都落雨冇得玩

我地就係住呢間 Disneyland Hotel 了

雷暴警告生效, 室內室外泳池都有緣無份

Bye Bye Disneyland Hotel~~  兩間酒店都住過應該唔會再 encore

上車又訓覺既小慈真係好唔舒服啦~~  肯坐 car seat 我地幾感動呀!  我個肚開始大唔可以再攬住佢坐後座架喇

眼睫毛非常之長既小慈似秋秋, 令媽媽好羨慕呢~~

非常難忘既結婚 5 周年紀念 >.<

小慈 2 歲 2 個月既語言能力

- 媽媽 stand up

- 唔, 好丫, ok, 啊~~ (學我講電話)

- Oh no!  What happen?!

- Pee-Ka-Poo

- Hello everyone

- come on, come here

- arrow up arrow down (睇 lift 上落)

- where are you?  what are you doing?

- 識唱 London bridge is falling down

- 識唱 up up up in the air / what's inside, can you guess?

- 唔識分 tiger / lion, violin / guitar, drum / tambourine

小慈呢個樣真係超似我細個 ^^

8 成估係仔!

好多人生 BB 啊~~~  所有 booking 都好難 book 呢!  今日返威爾斯照 Oscar, 12 weeks 6 days 先 book 到, 差 d 就冇得照架勒! 

抽血同埋照超聲波, 見到弟弟係我個肚度彈下彈下, 好似俾人地歡呼拋高再跌番落黎咁既款, 好活潑呀佢!!  差 d 彈到度唔到頸皮, 要我用手摸下肚皮安撫下佢先定番, 可能弟弟太興奮俾我見到佢^^ 

今日竟然撞番上次照小慈個個女醫生, 2 年半前佢仲係實習醫生, 而家已經獨當一面!!  我認得佢佢都好開心, 問我想唔想知 BB 性別?  我梗係想知啦.... da la~~~ 估 7 成係仔! 

冇驚喜啦, 一有左我都知自己陀仔, 正如有左小慈我已經好有信心係陀女一樣, 直覺係冇得解釋既!  雖然有少少失望, 因我其實係好想要 2 個女, 兩姐妹可以一齊 shopping 又可以一齊傾心事開心好多架麻!  不過一子一女係好多人求之不得既事, 子女係神所賜既產業, 有男有女都係蒙福的!  感謝主!

5:10pm 第 2 次睇余啟文, 我已經重左 1.2kg = 2.6 磅, 弟弟都肥仔左, 胎 size 有 7.08cm, 余醫生都開估 8 成係仔, 冇走雞啦~~

小慈好快就做家姐, 恭喜你有個細佬陪你呀!