小明識踩單車了

小慈 7 歲 8 個月學識踩兩輪單車, 比起我同爸爸細個 5、6 歲就自己學識踩單車當然係遲啦, 但因小慈囡比較膽小, 我同爸爸都隨遇而安冇咩所謂, 有心學一定學得識!  反而爸爸對小明有期望, 覺得男仔對機械操作會較好, 應該比小慈更快學識踩單車, 仲俾埋小慈架車俾佢試踩, 點知..... 弟弟比小慈更細膽, 仲衰到試左一次就唔肯再試, 怕跌, 淨係肯踩自己架四驅車, 激到爸爸 c c 下, 將佢對輔助碌升到有咁高得咁高, 造就到佢其實係已經識踩單車, 對輔助碌形同虛設

泊街既唔好處就係受盡風吹雨打, 弟弟架四驅車生鏽, 唔怪得佢成日龜速啦!  於是我地就用買新車黎利誘弟弟踩兩輪單車, 學識就買架新車俾佢!  趁住今日天氣好, 係進行戶外活動既好時間, 弟弟終於鼓起勇氣學踩單車~~

在爸爸耐心指導下, 弟弟半個鐘就學識, 7 歲 2 個月終於識踩單車喇, YEAH!!!

好乖既小慈讓左自己架單車俾弟弟踩, 自己就玩滑板車, 好抵錫  ^3^

單車場附近原來有石春路, 不過小慈超級怕痛, 慘叫連連, 一路行一路要攬住欄杆爬過去, 真係俾佢笑死 :)

單車師傅教完弟弟踩單車之後虛脫, 休息時發現附近有健身設施, 點知呢位肩周炎患者不舉.... 隻手, 狀甚痛苦, 但佢個表情真係笑到我碌地  :D

兩位男丁做完大量運動後要先行回家休息, 但天氣實在太好, 有陽光有微風又溫暖, 好想享受好天氣唔捨得返屋企, 愛媽媽既小慈即刻話留低陪我 ^^

沿河邊散步真係好舒服, 好舒服!  舒服到好想席地而睡 :)

天空海闊, 生命依然有其精彩的地方, 多謝天父創造既一切!