基督女少年軍一年一度宿營

一次生兩次熟, 舊年第一次參加宿營, 我仲好記得小慈憂憂愁愁叫我通告填不願意, 極唔想去宿營個樣, 今年已經日日數住幾時出發啦!  冬天去宿營既唔好處就係行李好論盡, 幾件冬天厚衫已經塞爆左個背包, 制服都要帶晒兩套, 小心謹慎既小慈應該唔會唔見野.  本來想幫佢換埋衫 casual look 咁入 camp, 點知立願禮要攪成個鐘, 家長先行告退, 自己揹兩對鞋入營喇, 萬事小心, 唔好冷親, enjoy~

可惜天氣唔好, 落雨夜晚冇得 BBQ, 成班妹妹煮晒 D 燒烤包黎食仲話好好味!  話營舍好白雪雪, 好大好靚, 3 間大房, 每間房 8 張碌架床, 佢瞓上格, 玩左天才表演, 小慈 A 組 8 個妹妹做話劇, 穿上神全副軍裝自己設計服飾, 贏左包 M & M 好開心!  天氣凍小慈冇沖涼, 打電話返屋企報平安, 嫌 D 同學仔嘈呢左入廁所同我傾電話, 當然掛住屋企啦!  我係怕小慈凍親, 佢話有珊瑚絨被再加一張厚毯所以好溫暖 ^^

最好笑係弟弟, 一放學返屋企已經話好掛住小慈家姐, 又話係學校冇機會見佢就走左!  於是俾佢兩個傾電話啦, 小慈話應承同佢講 30 秒, 弟弟已經等左成晚, 一聽到屋企電話響即刻爭住聽, 弟弟話:

「你做咩唔同我 Bye Bye 就走左架?」
「依~~  你講呢 D, 你隔離有冇人架?」
「你收線啦, 我唔收呀, 我唔捨得呀! 你收啦」
「媽媽, 小慈家姐真係收左線喎!」

梗係要收線啦, 小慈借老師個電話, 每個學生講 3 分鐘咋!  你地傾左 5 分鐘有多啦!  我問弟弟, 你地頭先講咩講到依~~~ 咁大聲?  弟弟話小慈家姐吩咐佢夜晚記得去廁所唔好賴尿...... 哈哈哈哈哈哈!  好 sweet 的兩姐弟 ^^

星期六, 掛念小慈家姐既弟弟跟埋一齊接放學, 見佢兩個攬到實一實, 小慈又攞呢樣攞個樣咁同弟弟分享佢入 camp 點滴, fing 左我俾佢用做緊急基金既 $50 買左個 $35 既日本晴天布公仔風鈴, $10 買左 2 樽種子俾爸爸, 財散人安樂, 買得極度開心

同班同學韋美樺, 呢個妹妹由一年級開始同小慈同班, 年年考第一, 又乖又叻又謙虛又親切, 係一個好好既學習對象 ^^  尋晚佢兩個孖舖一齊瞓上格床, 太開心 9:00 pm 碌到 10:00 pm 先瞓得著, 亦都關一個立志全晚唔瞓既師姐事, 小慈話佢好嘈 :D

辛苦晒兩位劉老師同藍老師, 帶住班妹妹 2 日 1 夜真係唔容易, 冬日訓練營既學習自我照顧, 亦體驗群體生活, 非常好的經驗, 老師 keep 住攪呀!!

期待老師們影既靚相