幼潛已經最後一堂, 今堂最主要做評估, 張姨姨見弟弟狀態好 (今朝 7:00 am 起身, 9:30 am 我逼佢再瞓 1 個鐘頭, perfect) 於是即刻請佢做評估
測試一: 袋中取物... pass
今日小慈竟然要求同爸爸一齊上音樂班, 佢上個星期已經話要同爸爸一齊上架喇, 只係爸爸未返香港, 點知隔左成個星期小慈仲記得, 問佢點解唔要媽媽要爸爸? 小慈話:
"Please shake hand with me Dad, shake hand with me 要唱俾 Dad 聽架!"
呢首係其中一首 Miss 曾教既歌, 第一段係 shake hand with Mum, 第二段就係 shake hand with Dad, 呢個原因又好好喎! 終於可以令到 0 音樂細胞既爸爸推無可推, 面都青埋咁同小慈一齊上堂 :DDD 好在音樂班已經到尾聲, 仲有 4 堂就上完可以升班, 所以小慈已經上到熟晒, Miss 曾好多時都要求小朋友自己聽指示做, 唔駛家長幫手, 爸爸先幸免於難冇出醜 ^^
唔駛同小慈上堂, 我就帶弟弟周圍玩下, 小慈好快落堂, 弟弟一見到小慈, 個樣即刻唔同晒勁興奮開心!
今朝我個鬧鐘響左冇幾耐, 弟弟就推門入房, 見到我勁開心! 走埋黎個頭伏左係我張被度嗲我, 跟住太空話左一陣就舉手示意我抱佢上床玩, 一上到黎即刻爬去爸爸度錫左佢一啖 (衰仔, 唔錫我既?! 唔公平呀! 哼 ) 當我地張床係遊樂場咁左瞓右瞓, 爬高爬低, 跟住就走去攪我床頭個電話, 鬧鐘, 而家醒到識拆電芯, 叫佢俾番我就 "No" 仲擰歪面, 我要搵野同佢交換先肯俾番粒電我
弟弟今日 15 個月大, 呢個月真係覺得佢進步神速, 教咩識咩, 好似好聰明醒目仔咁!! 好耐冇同佢度過 3 圍, 不過佢唔肯合作, 一見我攞住把軟尺就雞飛狗走, 要我同爸爸震壓住先度到
重 10.9kg = 24 磅 (80線, 仲有 5 磅就追過小慈 @.@ )
頭仔 48.5cm (80線)
腳仔 12.5cm (2 個月冇長過, 唔係識行對腳大得好快架咩?! )
肚腩 21", 手臂 7", 大脾 10"
最難度既身長大約有 80cm (75線), 已經高過張餐枱
弟弟呢個月真係叻左好多, 已經識
- 識講恩明, apple, dog, clock, Elmo, 龍貓, 媽 (不過唔肯望住我叫), 摸, 羅, 擺, 弟弟, 姐, 燈, 奶奶, bye bye
- 自創搖 pat pat 舞 -- 我地一唱歌就跳, 聽到國歌跳得最勁! pat pat 大幅度左右搖擺, 仲會扶住個電視櫃好似借力咁快速伸直個身再 fing 個 pat 向後, 重覆十幾廿次, 好爆笑架!
- 話沖涼弟弟就會衝去廁所然後講 "拍 bubble"
- 學識左飲杯係咋弟飲仲識 "goo goo" 聲 , 教佢玩煮飯仔煲湯識攪攪攪又咋弟食, 仲趙到嗒嗒有聲
- 朝早識得開門搵我地, 識呱呱嘈要我抱佢上床玩, 弟弟就會第一時間爬去錫秋秋好似今朝咁 @.@
- 行路已經行得好似樣, 上個星期仲係雙手係腰間握拳咁行, 而家已經好自然咁雙手垂係身體兩側, 成個大人咁行喇!
最令我地開心既係弟弟好識表達自己, 又好明我地同佢講既野! 舉例如:
- 我唱兒歌 "Teddy Bear, Teddy Bear turn around~~" 弟弟二話不說就爬上 sofa 攞隻 teddy bear 俾我
- 我同弟弟講 "瞓覺喇 / good night / 早抖..." 弟弟就會 zZzzzZZZ 咁既聲
- 玩完氹氹轉會雙手摸住自己個頭搖黎搖去, 口講 "wu~~~ wu~~~" 示意好暈跟住瞓低咋死
- 講 "走喇走喇 / go go go" 弟弟會講 bye bye + 飛吻啜一聲
- 玩到一地玩具 / 跌左玩具要佢執番先, 擺靚靚, 弟弟係會跟住做既
- 飲奶興飲到尾尾一兩啖唔飲, 我試過擰住個奶樽係佢面前搖示意仲有奶奶未飲晒, 點知個衰仔望左我一眼就擰歪面, 我將個奶樽搖去東, 弟弟就望去西, 搖上佢就望下! 完全避開唔望我....
- 手指指要攞野, 攞錯左俾佢, 弟弟係會好大反應咁講 "NO" 然後擰歪面擰到個下巴掂到一邊膊頭!
- 扭抱喊, 我唔睬佢係都要佢收聲先抱, 收左聲問佢係唔係要抱, 佢會舉一隻手, 再問佢抱抱? 佢就兩隻手都舉晒, 非常熱切要抱 :D 有時係攬住我大脾扭抱喊, 我望住佢, 佢會喊喊下突然收聲舉手, 好爆笑, 完全知道點做先有人睬佢, 真係好醒!!
另外, 我地仲搵到弟弟既死穴!! 弟弟都算好少喊 (扭眼瞓除外), 有幾次發現弟弟突然大喊係因為
- 開吸塵機
- 鑽牆聲 (不輪隔幾多層樓佢都聽到)
- 睇芝麻街一見到隻長眼睫毛 sniffy 出場唱 "on top of my spaghetti" @.@
- 睇森林公主個衰媽媽跌落泥氹 "呀~~" 一聲, 弟弟就會即刻大喊
而家仲知道我地一著鞋而佢冇份就係留低佢係屋企, 即刻飛奔黎我度攬實我大脾喊, 扭我抱, 唔俾我走, 朝朝出門口送小慈返學都係咁, 七國咁亂, 忍心唔理佢講 bye bye 照走, 弟弟會喊到死去活來, 工人姐姐抱住都係咁喊, 又唔俾姐姐關門, 隔住個鐵閘望住我淚流滿面, 仲會伸手攪個鎖企圖自己開門出黎, 好凄涼, 攪到我心都實晒!
連小慈都話: "弟弟唔捨得我地呀! 雖然我地唔係度, 見唔到, 但係我地個心會好掛住弟弟架麻! 係唔係呀媽媽?"
梗係啦! 爸爸媽媽返工見唔到呢兩個小寶貝, 我地係會好掛住架!
秋秋既早機去晚機返日本之旅話咁快就結束, 尋晚班機 delay 攪到成 1:00 am 先返到屋企, 今朝就已經要返工, 小慈亦都要返學, 當小慈換好衫入房搵我既時候發現爸爸, 碌大對眼擘大個口話
"爸爸原來已經返左黎喇, 媽媽!!" (佢好似當我唔知咁羅)
即刻爬上床話掛住爸爸, 仲起勢咁摸秋秋個頭, 弟弟都俾左個好燦爛既笑容爸爸, 仲舉手要抱, 不過俾秋抱一陣就要落地, 放佢落地個時就乘勢啜左爸爸一啖, 當堂霖晒~~
至憎 shopping 既秋秋竟然買左好多手信返黎, 仲買得好岩我心水添! 估都估唔到佢 hand carry 左 4 個最出名既青森蘋果俾我, 第 5 個蘋果係日本當地為慶祝青森機場首班國際航機抵達, 每個乘客送一個蘋果, 有記者採訪, 秋秋有 d 同事被訪問添! 買咁多野返黎, 真係好難得!
Welcome back, 爸爸 ^8^
不經不覺幼潛已經上到第 9 堂, 弟弟今日瞓到 9:00 am, 精神超級飽滿, 狀態 good fit!!
遊戲一
-- 傳波波請小朋友將手上既波傳俾隔離既小朋友, 聽落好簡單實質唔容易, 小明係都唔肯俾個波人地, 如果 meet 開佢 d 手指仔叫佢放開個波, 佢係會一拍兩散咁掉左個波, 好衰呀
遊戲二
-- 點點畫請小朋友用蠟筆在畫紙上面 "篤篤篤" 咁點上顏色, 無耐性又精力旺盛既弟弟畫兩下就走左去, 同佢講 bye bye 筆筆, 弟弟竟然將支蠟筆運到老遠咁掉落垃圾桶 @.@
遊戲三
-- 天台遊樂場! 張姨姨話今日天氣好, 請小朋友上天台玩大肌肉活動, 正呀!!
好玩!
尋日同小慈去 Mega Box 睇公主與青蛙再全日街開心到佢飛起, 今朝天都未光秋秋就早機去晚機返咁跟公司去日本仙台旅行, 而我出門口返工時兩隻 b 都未起身, 根本冇機會知會小慈爸爸去左旅行! 去 4 日應該冇問題掛? 而家大左應該唔會好似 BB 時係又喊唔係又喊喇掛?
放工, 我返黎鞋都未除小慈就問我:
小慈: "爸爸係唔係去 2 日旅行呀?"
我: "依? 你點知爸爸去旅行既? 姐姐同你講架?"
小慈: "係呀! 今朝我起身唔見左你地丫麻, 姐姐咪話你要返工, 爸爸去左旅行攞"
我: "岩呀, 爸爸係去旅行, 佢去左日本, 不過唔係去 2 日, 係去 4 日, 星期日晚先返"
小慈: "點解爸爸成日都去旅行架?!"
我: "爸爸去玩下, 輕鬆下麻, 你係唔係好掛住爸爸呀?"
小慈: "有架, 下次呢, 我地同埋弟弟同埋姐姐一齊去旅行咯! 留低佢地好唔開心架!"
本來秋公司旅行可以攜眷, 好在我冇跟埋佢一齊去, 咁樣走法, 小慈一起身唔見晒我地兩個喊死佢都似 :P
秋秋去左旅行, 司機既重任就落左係我身上, 今日要車小慈小姐去 Mega Box 上音樂班, 上完堂要做快閃黨因為趕住去接琳琳返屋企食飯, 去到 10 樓客戶服務處做泊車優惠, 搵均全身都搵唔到張出閘咭! 唔通漏左係架車度?! 點知搵埋架車都唔見, 開始驚, 連小慈都 feel 到我驚, 不停安慰我
"媽媽, 唔駛驚啦, 我幫你手搵番張咭下"
冇啦呀女, 真係搵唔到啊!! 唔通插咭入閘個時跌左? 除左上堂我都冇去過第 2 度, 死死地氣又去番 10 樓搵客戶服務主任求救, 又要俾人罰錢.... 唉.... 我一去到表明來意, 個客戶服務主任問我車牌幾多號又俾左張表我填, 填完表我已經攞定銀包出黎準備交罰款之際, 佢竟然同我講有人執左我張咭交左番黎 10 樓, 請我對下張咭既名就 ok?! 有人執左我張咭?!!! 係邊度呀? 佢話就係跌左係我架車隔離, 即係我落車時攞住太多野跌左落地都唔知, 張咭咁輕又冇聲
嘩~~~~~ 個一刻我簡直開心到想喊!!! 即刻拉住小慈一齊講:
"多謝天父~~~~"
真係難以置信!! 我入閘個張其實係信用咭黎架, 唔見左除左係出唔到閘要罰錢之外, 我仲要打去 card center 報失, 唔知有冇人趁我上緊堂時碌爆左我張咭架麻, 所以其實係好大劑, 估唔到呢個世界上仲有人路不拾遺, 我真係好感恩!! 祝福呢個非常好心既人, 多謝你, 祝福你!
多謝天父!! 多謝你包容我既過失, 呢個真係神蹟!! 感謝神!!
仲有, 當我地離開客戶服務處時, 小慈好擔心我會再跌左張咭, 竟然叫我將張咭交俾佢由佢渣住! 超乖! Sorry 呀小慈乖女, 媽媽唔會再要你擔心架勒 ^8^
之後就飛車去接琳琳, 約左佢返屋企打邊爐, 天氣凍到離晒譜得 7.7 度, 烚下烚下就成身暖晒, 而屋企就係最好招呼朋友既地方
恩典!
新年對於我地屋企黎講算係好清閒, 大年初一去姑婆屋企團拜, 初二休息, 今日初三秋秋既舊公司同事上黎團拜, 連埋我地 5 家人總共有 11 個大人 2 個 bb 4 個小朋友!! 屋企好耐冇試過招呼咁多人, 而大家上黎既目的只係得 1 個 -- 秋秋水餃!!
大年初三, 仲以為香港係一個全年無休既城市, 點知原來街市係冇水餃皮賣攞, 我同秋秋行晒沙田 5 個出名既街市, d 舖頭唔係冇開門就係冇貨, 話最快要到初七先會返水餃皮, 好失望呀!! 點算呀? 點招呼人呀? 盆菜都訂唔切, 打邊爐我屋企又唔夠爐, 真係企左係度 @.@ 無辦法之中既辦法係樓下酒樓訂位先啦, 真係失禮! 好在大家都係志在聚舊, 唯有過左年再原班人馬上黎食餐飽! 小慈最鍾意人地上黎我地屋企, 佢同瑤瑤玩得好開心呀
花絮:
今朝朋友仔未到時, 小慈小明兩個自己玩, 屋頭追屋尾笑到卡卡聲, 我同秋秋樂得清閒攤左係梳化睇電視, 突然聽到小慈大喝一聲
"你諗都唔好諗呀!!"
咩事? 只見小慈擘大手腳加埋支花市買既火箭槍欄住廚房門口唔俾弟弟入, 而弟弟就決定硬闖, 於是小慈就對佢大叫: "你諗都唔好諗呀!!"
真係笑死我喇! 小慈呢個家姐角色係做得好好, 非常盡責咁管住弟弟, 簡直係我既翻版, 我點樣同弟弟講野, 教弟弟做咩玩咩, 小慈都學到十足十!! 佢係一個好幫手, 好管家, 不過, 我冇教過小慈講呢句 "你諗都唔好諗" 喎! 於是我問小慈:
我: "邊個教你講諗都唔好諗架?"
小慈: "呀 Ro 攞"
我: "邊個呀 Ro 呀?"
小慈: "Barbie 公主入面個個呀 Ro 呀!"
Oh My God! 小慈既卡通片癮似乎中毒已深, 呢套 Barbie 係 Connie 姨姨極力推介小慈睇, 話入面 d 歌好好聽, 內容好正面, 肥妹姐姐日睇夜睇云云..... 我一直好抗拒俾小慈學跳芭蕾舞呀, 玩 Barbie 公仔呀, 好怕 d 粉紅色既野, 更加怕小慈嬌滴滴有公主病! 我唔係一個好女仔既女仔, 太 lady 既野會嚇親我, 識我既朋友都知我從未買過一件粉紅色既野俾小慈, 女仔有 d 男仔性格好 d 既, 爽快 d 爽朗 d, 當然我唔會太極權, 小慈將來自己話鍾意我都會俾佢, 但我唔會強化亦都唔會鼓勵佢用 "粉紅色"
講遠左, 返番黎先, 係, 於是我即刻開番呀 Ro 黎睇, 係 Barbie 系列之森林公主, 套片當年似乎係一個大製作, 有潘芳芳配音, 唔開由自可, 一開不得了, 小慈已經識唱晒入面既歌, 又真係幾好聽喎 ^^
故事話呢個 Barbie 因為沉船意外, 好細個就沖左去荒島仲失左憶但俾動物救左, 係隨身物品入面搵到一個爛左一半既名牌寫住 "Ro" 先知自己個名, 有一日, 一個愛冒險既王子去左呢個荒島探險, 差錯腳跌左落鱷魚湖, 長大左仲學識各種動物語言既 Ro 出現就係同鱷魚講 "你地諗都唔好諗, 一啖都唔可以咬王子呀!"
真係幾好睇喎, Barbie 心地善良又靚又溫柔, 唱歌又一流, 真係人見人愛, Connie 姨姨冇介紹錯!
臨近新年, 我已經教識左弟弟請請, 大家記得俾多封利是獎勵佢喎! 呢幾日仲好多聲氣, 包括:
- 爸爸爸爸叫唔停但我發現弟弟叫爸爸其實係叫埋我 @.@
- 拍手掌而家拍到有掌聲
- 飲完水識 "hah~~~" 一聲
- 食野識 "um~~" 一聲
- 錫人錫到啜一聲
- 識講Bye Bye
- 一條利仔識 "嗒 嗒 嗒"
- 話瞓覺識講 "ZzZZZzzzzzZZ"
- 擦牙識講埋 "eeee~~" "ah~~~~~"
- 識講 "擺" "摸" "攞"
- 做錯事會自己 NO 埋一份, 有時叫佢錫我都會識拒絕叫 NO
- 動物既叫聲已經由獅子 wa 增多左 elephant 嗚~ 狗狗 wow~ 牛牛 moo~
- 識唱 Madam Marika 既 Oui, oui, oui, oui, oui, oui.
講一大堆太空話, 弟弟仲識用牙開蓋!! 為左食, 真係無所不用其極!
前 2 日, 小慈放學返黎問我: "媽媽, 2010 年係老虎年黎架, 係唔係有花市呀? 仲有大人係唔係會俾紅色個 d 利是小朋友架?"
唔駛問梗係老師教佢新年到啦, 趁今日天晴溫暖竟然有 26.9 度, 仲係年廿八咁好日子, 就一家人去行下花市! 近近地去沙田, 呢個花市我都係第 1 次黎, 好少攤位, 不過小慈小明已經好興奮!! 一去到小慈已經話要買 balloon, 個人覺得 balloon 係最無謂既, 雖然我細個既時間我老豆都係每年每人買 1 個 balloon 俾我同細佬, 當時都係開心到不得了 :p
小慈係一個好堅持既小朋友, 佢決定左要 balloon, 就算我話買其他野俾佢都唔會要, 好啦, 就買一個俾你啦, 小慈 23 個月大時買左佢人生第 1 個 Elmo balloon, 今次係第 2 個
滿載而歸
