弟弟第 2 個大型生日派對@九龍萬麗酒店

今日參加 BB 會第 2 個大型生日 party 喇!  後備 no.44 都仲有機會參加都算好彩, 山長水遠一家 4 口搭火車去尖沙咀萬麗酒店, 延開 30 席, 我都係第 1 次黎呢度

Ballroom 冇逸東咁大

主辦單位都好有心思設計場刊

總共有 120 個 BB 一齊慶祝 1 歲生日, 搵唔搵到弟弟呀?

弟弟由出屋企門口訓到入會場, 心情靚絕手指指

不過媽媽要抱住佢就冇啖好食, 大型生日會模式大同小異冇咩驚喜, 叫做參加過就算啦

未到 12月已經周圍都係聖誕樹 Santa Clause is coming to town! 小慈家姐今日都好開心

坐唔定既弟弟搭火車手指指示意要玩單槓

時間尚早天氣又好, 最岩係戶外活動, 帶兩姐弟去公園玩下先返屋企

弟弟去到公園好興奮, 即刻唔駛人抱要落地玩 

周圍爬既弟弟唔單止攪到小慈家姐同佢一齊爬, 公園仲有好多其他小朋友都跟住佢地爬呀, 笑死我地喇!!

小慈等左好耐終於等到弟弟識得同佢一齊玩滑梯

兩個 d 頭髮都飛起晒, 好攪笑

玩滑梯對弟弟黎講好刺激, 我估佢係有 d 驚不過冇喊喎~~

小慈有幫手照顧弟弟, 乖女

未識行既小朋友以為自己無所不能, 其實係爸爸扶住佢上上落落, 少 D 體力都攪唔掂

唔知望咩咁專心

等弟弟識行, 兩姐弟去公園玩你追我逐應該仲開心!

小慈 K1 上學期學校旅行

又到小慈 1 年 1 度既親子旅行!!  9:00 am 就要返到學校集合, 早到先參觀下小慈課室, 老師設計璧報好有心思

小慈公主 XD  顏色油得好靚, 冇出界啊!

呢個就係出晒名既晴雨表

因為爸爸要返工所以由嫲嫲頂上!  小慈周圍話俾人聽 "呢個係我既嫲嫲黎架!"

今次去粉嶺浸會園

環境好舒服, 宗教氣氛濃厚, 天氣又好, 好開心!

老師們設計左好多攤位遊戲, 小慈玩緊 "懷舊創意麵粉糰"

奇妙的鏡子

Big Ball 暢遊

閃避水桶

親子遊樂磁中尋, 小慈好投入

競技比賽

對腳板大左幾倍

最開心就係玩沙

玩到衫都除埋

呢度仲有好多遊樂設施

繩網玩左 5 次有多!

小慈既同學仔 -- 馬杰城, 殷渙然, 馮英倫

小慈今日表現好好,  殷渙然由工人姐姐帶去旅行, 但佢姐姐唔識廣東話, 老師問小慈幫手照顧殷渙然好唔好?  小慈二話不說一口應承, 跟住真係全日都同殷渙然一齊, 去邊都一齊玩, 廁所都一齊去, 成日都手拖手, 超乖呀!  兩個妹妹你叫我, 我叫你咁, 好 sweet sweet~~  

小慈真係好有大家姐風範, 斯文盡責, 真係我既好乖女!

上格床

經過我 2 個星期既悉心舖排, 我成功氹到小慈訓上格床勒 :)

我先係同小慈講定佢大個女, 而家瞓緊個張床開始細張, 好逼, 上格床好大張好闊落好舒服架喎, 遲 d 呢小慈大個女就可以瞓上面云云..... 講左好耐, 俾定晒心理準備 & 合理期望小慈

到小慈開始問我幾時大個女可以瞓上面既時候, 咁岩個日係星期六, 我就係佢面前執野 (原先上格床係用黎放衫, 放尿片... 好多雜物)  攪到小慈等左我好耐問我執完未?  佢近來成日話自己係好幫手, 咩都想幫我, 做咩都關佢事, 於是佢見我咁忙碌咁執呢樣又整個樣, 就問左我好多次可唔可以上黎上格床幫我手!  我抱左佢上去, 佢係咁話呢度好高, 跟住我就將好多小慈岩玩但弟弟有排都未識玩既玩具 (eg 積木, 穿珠, puzzle 等), 全部放晒上上格床既櫃度, 疊到上天花板咁滯, 場面非常壯觀!!  好多玩具平時放埋一邊已經唔記得左, 而家一盒一盒咁一目了然, 自然引到小慈非常恨上去玩!!  如是者係上格床玩左幾晚, 晚晚都玩到唔捨得返落黎~~

上格床一直都俾左一個非常開心愉快既印象俾小慈, 但我最厲害既殺手簡係..... Elmo 被單 :DDD 

成套床單枕袋被被就成功氹到小慈好夢正酣, 好開心呀!  成功喇~~

唔係出疹

影完相, 弟弟又燒番 38.2 度!!  成個人炆爭, 扭計仲玩絕食!!  @.@  全日只係飲左 120 ml 奶 + 6 匙粥仔, 疹又唔見, 反而有勁多痰 + 間唔中乞嚏鼻水.... 好費解啊??!!!  於是又去睇醫生問個明白

醫生話弟弟肺好清, 不過喉嚨紅腫發炎, 反覆咁發燒已經係第 5 日, 燒下停下燒下並唔係好事!  而家已經唔係出疹, 因為病徵已經出晒黎喇, 弟弟患左咽喉炎, 可能係同小慈同一隻菌!  小慈都發燒, 去到弟弟度佢咁細個就更加嚴重咁解 V___V   醫生要弟弟食抗生素, 怕佢病到落肺, 落氣管咁就好麻煩!  而家好明顯係佢自己攪唔掂, 一定要食抗生素先幫到佢, 絕食問題要靠食藥等佢好番 d 先有得攪, 而家喉嚨咁紅咁痛, 俾你都唔想食野吞野, 盡量開凍 d 奶, 煮稀粥, 慢慢氹佢食.... 唉~~ 陰公呀!  生日過得咁辛苦, 媽媽好心痛呀  >.<

好在過左兩日抗生素真係幫到佢, 心情已經好番好多, 肯笑, 肯飲奶, 感謝主!!  不過一好番, 弟弟就開始攪攪震, 只係 1 歲人仔, 我地已經感受到仔同女既分別, 弟弟真係冇時停, 對手永遠都有野渣住, pat pat 唔會痴住地下 1 分鐘  @.@

今日仲驚呀!  弟弟無端端就爬左上枱, 好在佢係慢動作, 仲識望一望我, 嚇到我即刻抱番佢落黎!  佢玩第二次我就影佢相記錄佢 D 百厭野!  你睇佢, 慢慢移近目標

仲識回眸一笑!?!

輕而易舉準備爬上枱!

遲 d 真係識行仲更加要看實佢呀!

弟弟 1 歲喇~

郭恩明先生今日 1 歲喇!!  高燒左 3 日, 今朝起身已經冇燒, 不過弟弟個樣好攰無里神氣, 惹人憐愛既樣, 媽媽錫番下 ^8^

坐到樣樣衰衰, 完全冇胃口, 今餐只係食左平時一半既份量咋!

好在洗白白都仲好興奮, 識笑

呢張相有錯覺弟弟識企 :P

瞓醒一覺又開心少少, 手指指

今日我地為弟弟安排左一連串精彩既節目賀生辰!!

首先約左個姐姐上黎幫弟弟做手印腳印留為紀念,  我地只係做 2 次, 第 1 次係滿月時整, 第 2 次就係 1 歲正日, 小慈家姐當年都有做, 1 年間 BB 對手仔腳仔已經大左 1 倍有多, 比例好可愛架!

弟弟唔鍾意我地捉住佢, 極力掙扎都郁唔到就發爛渣大喊

媽媽抱都喊到好凄涼.....

整埋腳仔就得架喇阿仔! 

估唔到呢 4 舊泥膠可以做出精緻既手腳印, 好神奇啊~~

跟住我地過海同弟弟影 studio 相, 呢間 studio 好巴閉, 約期已經約到出年既 1月, 仲要係日日都 full book 個隻, 幾經艱辛先 book 到!  弟弟今日冇發燒又未出疹可以影到相, 不過佢心情都係麻麻, 係初初影有新鮮感肯自己爬下坐下, 之後全程就好似隻樹熊咁要我抱住先肯影, 不過都有笑, 後尾仲訓著左, 要全 team 人等佢訓醒再繼續 :DDD 

弟弟唔影就益左小慈羅, 估唔到女大真係 18 變, 小慈勁合作, 又同 d 哥哥玩到卡卡笑, 同以前既 cool 慈真係好唔同啊!  要遲 D 先有相睇, 希望 d 相效果好啦, 如果係靚既, 我唔介意買晒佢架!!  

最後影左 3個幾鐘, 巴閉 studio 真係蝕晒俾我地, 不過佢地真係好專業, 我好耐冇試過影相有一 team 人服侍我地 -- 1 個攝影師, 2 個陪笑員, 仲有 1 個錄影師, 我覺得真係威咯  :)

趕去攞埋個雪糕蛋糕就返屋企同弟弟一齊吹蠟燭!  Happy Birthday to Young Man~~~  開心到喊?

呢個雪糕蛋糕叫 "大力士 BB", 好岩你呀弟弟!

祝你身體健康, 快高長大, 聽聽話話, 同小慈家姐相親相愛! 

Happy 1st Birthday, and many more!!  We love you very very much!!!!