唔係出疹

影完相, 弟弟又燒番 38.2 度!!  成個人炆爭, 扭計仲玩絕食!!  @.@  全日只係飲左 120 ml 奶 + 6 匙粥仔, 疹又唔見, 反而有勁多痰 + 間唔中乞嚏鼻水.... 好費解啊??!!!  於是又去睇醫生問個明白

醫生話弟弟肺好清, 不過喉嚨紅腫發炎, 反覆咁發燒已經係第 5 日, 燒下停下燒下並唔係好事!  而家已經唔係出疹, 因為病徵已經出晒黎喇, 弟弟患左咽喉炎, 可能係同小慈同一隻菌!  小慈都發燒, 去到弟弟度佢咁細個就更加嚴重咁解 V___V   醫生要弟弟食抗生素, 怕佢病到落肺, 落氣管咁就好麻煩!  而家好明顯係佢自己攪唔掂, 一定要食抗生素先幫到佢, 絕食問題要靠食藥等佢好番 d 先有得攪, 而家喉嚨咁紅咁痛, 俾你都唔想食野吞野, 盡量開凍 d 奶, 煮稀粥, 慢慢氹佢食.... 唉~~ 陰公呀!  生日過得咁辛苦, 媽媽好心痛呀  >.<

好在過左兩日抗生素真係幫到佢, 心情已經好番好多, 肯笑, 肯飲奶, 感謝主!!  不過一好番, 弟弟就開始攪攪震, 只係 1 歲人仔, 我地已經感受到仔同女既分別, 弟弟真係冇時停, 對手永遠都有野渣住, pat pat 唔會痴住地下 1 分鐘  @.@

今日仲驚呀!  弟弟無端端就爬左上枱, 好在佢係慢動作, 仲識望一望我, 嚇到我即刻抱番佢落黎!  佢玩第二次我就影佢相記錄佢 D 百厭野!  你睇佢, 慢慢移近目標

仲識回眸一笑!?!

輕而易舉準備爬上枱!

遲 d 真係識行仲更加要看實佢呀!