小慈學校中秋節慶祝會

而家做任何決定之前都要問過小慈小姐 --  今日著咩色襪呀?  紮唔紮辮呀?  返學帶月餅定帶生果呀?  於是, 小慈今日決定係要著白色襪, 唔紮辮, 一定帶月餅返學校請陳老師食!

不過小慈都係誤會左, 佢成日有一個錯覺認為一唔駛著校服返學個日, 爸爸媽媽就會同佢一齊 (對小慈黎講, 可能呢個唔係誤會而係主觀意願!)  所以當我好殘忍咁同佢講: 

"唔係呀, 媽媽今日要返工丫麻" 

小慈係即刻眼紅紅想喊 V__V  媽媽都想同你一齊參加 party 架, 不過老師都冇請爸爸媽媽去.... 云云....  好在小慈都受氹, 轉移下視線話佢聽個兔仔燈籠有碌可以同小慈一齊行返學就開心番,  而家大個女識講道理, 同埋佢知道扭計係冇用既, 媽媽話得就得, 唔得就唔得!  屋企都唔會有其他人支持佢扭計, 所以而家既小慈只係會問下, 探聽下!  俾人拒絕自己既要求梗係會唔開心架勒, 不過佢好快冇事咁解!  呢一種 "做父母既堅持" 係好難好難既課題, 總之一句到尾, 秘訣就係 "唔好一時一樣!", 小朋友會無所適從, 唔知你 d 大人想點就會次次都測試你既底線, 自己攞黎煩, 我零願捱左佢, 俾小慈知道爸爸媽媽說一不二!

講開呢個兔仔燈籠我真係好自豪, 因為我係 2007 年小慈 17 個月大時買既, 已經玩左 3 個中秋節架勒, 超級幾環保 ^^

小慈呢張相都未夠歲半

小朋友既記性有時好短暫, 收埋一排既野再攞番出黎佢會以為係新既, 之所以可以扼小慈 3 個中秋都唔駛買燈籠 XD

兩姐弟的站姿

不經不覺, 弟弟已經企得好好, 而家開飯時, 我地都會放弟弟係網床入面睇住我地食飯, 為食既弟弟一定會行埋飯枱邊問我地攞野食, 原來, 弟弟已經長高左好多!  某 d 角度同小慈家姐仲好似樣添, 真係好攪笑呀!

弟弟 9 個半月

小慈 8 個半月

弟弟 10 個月

小慈 8 個半月

弟弟 9 個半月

小慈 11 個月

弟弟 8 個半月

小慈 8 個月

弟弟 9 個月

小慈 8 個月

弟弟 10 個月

小慈 11 個月

名副其實兩姐弟 :D

郭氏家族出動摸蜆

今日好開心, 郭氏家族好耐冇一齊戶外活動, 舊年大住個肚摸過 2 次蜆, 真係好好玩, 好難忘, 今年梗係 encore 啦!  重遊我地熟悉既白石沙灘, 今日既潮退時間係 11 am - 1 pm, 我地一家 9 口浩浩蕩蕩咁 10:30 am 就到達現場

今日天氣好好, 冇太陽之餘仲有海風, 真係好舒服, 弟弟仲由上車訓到落車, 岸邊有樹林有大石, 我就抱住弟弟坐係度訓左半個幾鐘, 差 d 連我都訓埋, 有吊床係度就正喇~~~  

不過太陽伯伯好奸, 靜雞雞呢埋黎煨熟我地, 返到屋企先發覺曬到兩截色, 弟弟仲成塊面紅左!  天陰都要搽太陽油!!  成個沙灘得我地一家, 唔通其他人未訓醒?

掘蜆必備工具 -- 櫈仔, 膠筒, 泥犁, 帽 & 落水鞋

小慈徒手都摸到蜆, 成個沙灘自家人玩晒^^

沙灘上面仲有好多蟹, 兩表姊弟 "生葬" 緊佢地

童工

架生齊全, 大有收穫

掘左 2 個鐘頭幾有成績!

炒埋有 2 大碟, 怕且有 4-5 斤

小朋友食白烚蜆, 好重海水味, 兩表姊弟食到停唔到手

小慈夜遊迪士尼

上星期同秋秋兩公婆去迪士尼拍拖視察環境, 發覺鬼屋小慈一定唔入得, 好多 6-7 歲既小朋友玩完出黎都喊, 不過夜光鬼魅巡遊就岩小慈睇, 無端端 d 人件衫會發光小慈應該覺得幾攪笑!  拜 Halloween 所賜, 全個迪士尼逢星期五六 11:00 pm 先關門, 煙花 9:00 pm 放, 所有機動遊戲繼續開到 11:00 pm, 真係正呀!  我地可以放工放學先去玩都得!  爽呀!!

一家三口玩自拍

夜光鬼魅巡遊小慈都睇到有 d 驚因為音樂實在太大聲喇!  好在小慈都有睇晒冇話走, 到 Mickey Donald 佢地出場, 仲有 Minnie 教跳舞小慈先開心笑咋~~

接小慈放學先同佢講去迪士尼, 小慈驚喜大叫!  成晚話: "我好開心"

又錫我隻手又攬爸爸大脾, 連去廁所都笑瞇瞇~~

Donald & Daisy 變身扮南瓜 & 蜘蛛, 笑死我喇~~

最衰截左人龍唔俾影相

秋秋幫我偷影佢地, 影得好靚, 開心死我!

睇完煙花, 小慈仲話要玩咖啡杯, 木馬, 小飛象, Winnie the Pooh 仲要玩 2 次!!  睇住小慈對眼開始紅晒想合埋都知佢眼訓係度死頂, 好在小慈都乖, 同佢講玩多 1 次 Pooh Pooh 就要返屋企下次再黎玩, 小慈有話 "好", 好合作, 抵錫!  

一路離開樂園行去羅車, 我地已經開左支奶抱住小慈叫佢飲, 去到大門口個廁所我地一家三口仲呢左入去幫小慈抹身抹面換睡衣著片除鞋, 果然出車未夠 2 分鐘, 小慈攬住枕頭仔即刻訓著, 返左一日學, 放學仲出夜街, 10:40 pm 真係小慈既極限黎架勒!

弟弟 10 個月大

弟弟 10 個月大喇~~  呢個月過得好快, 感覺上弟弟已經好大個, 可能佢自己成日周圍爬又扶住野四圍行已經唔似 bb 啦!

今個月有 21 磅 (75線), 頭仔 46.5 cm (70線), 身長 75 cm (80線), 腳仔 12.5 cm, 肚腩 19", 大脾 10"

心血來潮都幫小慈度下, 發覺小慈頭圍只係比弟弟大 2 cm, 腳仔長過弟弟 3 cm, 大脾粗過弟弟 1" , 肚腩大家都係 19"!  兩姊弟既褲真係可以交換著羅, 仲差 6 磅弟弟就同小慈一樣重喇!  果然係食無前後, 達者為先.....

弟弟呢個月又叻左, 性格開始出晒黎!  事實證明小朋友不論幾多歲都係識爭寵的, 就算未識咩叫寵, 點都識得爭取注意力!  近排我無論同小慈做緊咩都好, 弟弟都一定會不辭勞苦遠遠咁爬過黎參與埋一份, 就算係同小慈去廁所, 弟弟都會爬埋入黎, 小慈玩咩佢又要攞呢 d 就預左, 但惡死既弟弟俾佢渣得上手既野, 之後用任何方法整佢佢都唔會放手!!  試過小慈玩緊 marker, 一不留神弟弟已經攞左一支仲即刻想擺入口 @.@  我都眼明手快即時攞番, 但弟弟唔肯放手同我鬥搶, 拉扯下一野畫左落塊面度, 弟弟即時變左刀疤明!!  好在係水溶性 marker 咋.....

10 個月既弟弟而家又識揀人抱, 佢而家既 preference 係:

如果爸爸抱緊我路過, 弟弟係會雙手對住我伸直示意我抱; 如果我抱緊弟弟而工人姐姐路過, 弟弟係會即時擰向工人姐姐方向而飛身撲埋去!  初時唔知弟弟識揀人抱, 抱住佢時佢掙扎想飛走差 d 就跌鬼死佢, 弟弟揀工人姐姐唔揀我有冇唔開心?  冇呀, 我真係唔介意喎!  一來咁代表工人姐姐真係好錫弟弟, 二來小朋友係跟心機, 我既時間大部份都俾晒小慈, 我真係冇咩時間同弟弟玩, 所以弟弟揀工人姐姐係好正常架喎!  只要我返到屋企弟弟見到我仲係好興奮咁 fing 手 fing 腳歡迎我已經好開心!!!  講真, 小慈個時日抱夜抱訓左都放唔低成晚要攬住佢訓我真係怕怕!  笨左就要學精, 我又唔怕弟弟會唔知邊個係呀媽, 死攬住佢做咩先得架?  而家我真係放鬆左好多架, 反而弟弟就比小慈 bb 時開心, 又食得訓得成日笑, 真係退一步海闊天空, 適當時候要放手

10 個月既弟弟最鍾意扶住野行行企企, 身手敏捷, 我最鍾意睇住佢爬爬下個肥 pat 倒後變坐低, 好矯健架

好難先影到弟弟一張相係伸利的

整左個玩具箱俾弟弟自己揀玩具玩, 遲 d 就教佢玩完要收拾

小慈上音樂班

小休 2 個月, 今日又帶小慈上 Tom Lee 既 Music Wonderland, 上星期擺烏龍以為係第一堂, 點知去到先知改左下星期, 通利話佢地有通知但我冇收到羅, 鬧佢都冇用, 於是周圍同小慈玩下

小慈仲好記得 Mega Box, 又話好掛住 Miss May, 我同佢做定心理輔導, 同佢講 Miss May 去多倫多讀書要好耐好耐先返

而家呢個音樂班係 Miss 曾教, 小慈即刻好擔心咁話: "我要同媽媽一齊上音樂班!"

除左返學之外, 小慈真係好痴我, 星期六日去邊都問我係唔係一齊去?  

游水班後期開始扭計唔想上都係因為我唔落水同佢一齊游, 所以佢越游越冇心機, 有時我真係好羨慕其他小朋友好獨立 -- 自己學溜冰, 學跳舞, 學畫畫, 學完 30-45 分鐘大人先去接佢.... 但對住小慈我連提都唔敢提, 我未講完 "請你自己上堂之後我去接你" 都怕且已經眼紅紅想喊, 以為我又唔知 pat 佢去邊度離棄佢!  都唔駛諗住同佢報左名先局佢試下, 我同秋既底線就係返學就話冇辦法一定要自己去, 興趣班我地真係唔想要逼先去上, 佢都唔 enjoy 學左都唔吸收, 徙錢!  時間未到, 等佢大個 d 先算啦, 暫時我都 enjoy 同佢一齊上堂, 親子時間麻!  仲有知佢學左 d 咩都好, 可以同佢加強訓練溫故知新, 又可以同佢有 d 共鳴默契咁啦

呢個 Music Wonderland 真係非同凡響!  課程好有 system, 一去到已經要買書買 CD 仲有個書包!  上一堂音樂班要用幾本音樂書 -- 又橫書又直書又歌詞又貼紙簿咁!  學一首歌出動晒 3 本書 1 張紙, 一堂學 6-7 首歌, 又教得快, 大人都學到一頭煙唔怪得要家長陪同 @.@

希望只係第一堂我未習慣佢既模式遲 d 會慢慢適應啦!  不過小慈今日都開心既, 最 happy 係可以貼貼紙!  大大張貼紙成日問可以貼未?  貼邊度呀?  一聽到 Miss 曾請佢貼一架車既貼紙, 貼完就駕車去海洋公園聽住音樂響按, 開心度拍爛本書咁滯!  仲大大聲同 Miss 曾講佢要駕車去迪士尼樂園, 真係笑死我喇  :DDD 

最緊要寶貝女開心啦!  都係因為小慈對音樂有興趣, 鍾意唱歌, 我先幫佢報咁多音樂班, 希望真係培養出佢係呢方面既興趣!

童言

每一日既朝早, 小慈都會問我今日駛唔駛返學?  咁我就教佢問今日係星期幾?  如果係星期一至五就要返學, 星期六日唔駛, 其實學校每日都有教小慈今日係 2009 年 9 月幾多日星期幾咁, 所以我再教佢時佢其實已經識, 於是, 小慈知道今日係星期日, 佢就問....

小慈: "今日係星期日係唔係呀?"

我: "係呀"

小慈: "咁星期日做咩野呀?"

我: "星期日係屋企休息羅"

小慈: "但係我想去迪士尼樂園喎!"

我: "點解你成日都想去迪士尼樂園既?"

小慈: "係呀, 因為我好掛住 Mickey 同埋 Minnie 呀!"

我: "不過今日唔去喇, 小慈, 今日好熱呀!  遲 d 先去啦好唔好?"

小慈(唔出聲一陣): "媽媽, 而家係唔係遲 d 呀?"

我: "...... " 

唉呀~~  真係唔可以耍佢添! 

*******

送小慈返學.....

小慈: "媽媽, 點解火車咁快架?"

我: "係呀, 火車司機渣得好快麻"

小慈: "火車司機係邊度呀? 我見唔到佢既?"

於是我就帶左小慈去月台車頭等火車慢駛埋站, 我指俾小慈睇火車司機坐邊度

小慈: "火車司機叔叔坐中間架!  仲有 2 個司機叔叔添!.... 呢架火車得 1 個司機叔叔既?"

我陪小慈睇左 3 架火車先返學差 d 遲到!!  我抱住小慈等佢高 d 可以望多 d, 點知小慈無端端用雙手圍住我條頸, 面貼面咁同我講:

"媽媽, 你帶我睇火車司機, 我好開心呀~~"

我當堂溶左  (8v8)

******

小慈返學我都會俾佢自己開櫃筒揀一對襪著, 小慈好開心架, 有時要紅色鴨仔, 有時又會要白色直條, 今朝就決定要黃色間襪, 跟手仲攞埋條手巾仔同我講....

小慈: "媽媽, 我想帶毛巾返學呀!"

我: "要黎做咩呀?"

小慈: "做完運動出汗呢, 要黎抹面面, 抹頸架!"

我: "啊~~ 好啦!  揀一條毛巾放係書包啦, 你話俾老師聽毛巾放係呢度喎!"

小慈: "唔係呀, 媽媽, 毛巾放係後面好似溫希倫咁呀!"

我: "哈~~ 小慈!  你鍾意毛巾攝係背脊後面呀?"

小慈: "係呀, 做完大肌肉好熱會出晒汗, 濕晒架!"

小慈真係好攪笑呀,  我好少會幫佢攝毛巾係背脊, 一來小慈唔係好大汗, 就算出汗都只係會成頭濕晒個隻, 如果個身濕左我就情願同佢換過件衫!  好在我之前貪得意買左幾條有動物款既汗巾諗住俾大汗既弟弟用, 而家岩晒,  小慈揀左條熊貓即場攝背脊, 真係好攪笑~~

******

近期小慈都講好多學校既野俾我聽....

"我係大個女 K1 郭恩慈, 彩虹組"

"仲有太陽組, 月亮組同埋星星組, 不過冇雲姐姐喎!"

"返學要 doot 咭架"

"乖~~ 俾個貼紙你, 唔好撕左佢呀!"

"搭校車呢, 要自己一個人坐架喎, 唔駛喊架! 媽媽爸爸好快就黎接我架勒"

"望呀望, 望呀望, 睇下邊個坐得最靚?"

"打乞嚏同埋咳呢要戴口罩架"

"合埋口!  吞晒先講野!"

"快 d 合埋眼睛, 訓覺唔可以偷睇架!"

"1 隻手指畫直線, 2 隻手指兔仔跳, 3 隻手指喵喵叫, 4 隻手指彈鋼琴, 5 隻手指吱吱笑"

"我今日好叻返學校冇喊呀!"

"陳老師係我個拳頭同埋手指度油顏色然後印呀!  好似吸印仔咁!"

"原來盧偉僖去左新學校呀!  又有其他學校 d 小朋友返學呀, 我地要歡迎佢"

"小朋友喊呢, 請糖糖佢食就唔喊架勒, 可能佢想要媽咪呀"

"Miss Sandra 話 Are you a boy?  我話 No, I'm a girl."

"Ba Ba Ba Ball~~  Bo Bo Bo Boy~~"

"有小朋友個眼鏡好圓架!"

"今日呢, 我同妙姐同埋陳老師入廚房睇雪櫃呀!" 

"陳老師話要做功課喎, 屋企有雪櫃呢, 要用筆圈住佢"

聽完就知道晒小慈係學校發生咩事 ^^

絕技

經過 9 個半月既訓練, 弟弟已經身懷絕技, 真係唔可以睇少佢,  身手敏捷之餘仲極度有性格, 舉例俾大家睇下啦!

絕技(一) 

罷食近期飲奶話停就停, 次次都係飲剩 20-30ml 就會推開奶樽唔飲!  食粥食糊仔又係, 食到尾尾就開始周身郁, 攪呢樣攪個樣又擰轉身別轉頭, 仲學識埋封嘴唔擘大口添, 總之一飽左就唔食架勒!  以為佢食飽咩, 轉頭俾佢見到我地食野, 佢又嘈之巴閉咁唔理我地食咩佢都要食, 真係頂佢唔住!

絕技(二) 眯眼伸利

真係好嬲佢食剩晒 d 野, 明明弟弟好為食想谷佢做肥仔架麻, 耐唔耐就玩罷食, 嬲佢!  點知個衰仔知人嬲, 近期學識左無端端望住你眯眼, 嘩~~ 真係可愛到不得了!!   佢又出左兩隻門牙仔, 成日羅條利去頂佢, 頂頂下伸埋條小肥利出黎... 呢 d 不經意既表情, 真係殺死左佢呀媽我羅~~  次次都俾佢電暈左影唔切相!

絕技(三) 穿山洞

弟弟已經表現出佢既探險精神, 越黑越窄既地方佢就越鍾意去!  至 like 既地方就係網床底同埋小慈家姐既枱底, 有 d 咩跌左落去佢都可以搵番出黎

絕技(四) 企

原本弟弟爬緊, 同一時間我又同小慈玩緊, 我一擰番轉頭就見到弟弟企到咁四正, 即刻去搵相機影佢!  好有型呀~~~

絕技(五) 心口碎地板

弟弟學識左爬之後, 而家仲識爬爬下撐高晒手腳, hold 住一陣, 再突然鬆開手, 合埋雙眼咁將佢壯闊既胸膛 '達' 落地下, 表演心口碎地板.... 有時睇見都鄧佢痛, 佢又唔喊喎!

絕技(六) 哭不出聲

弟弟都算係一個唔爛喊既小朋友, 不過佢一喊就好恐怖, 仲唔知由幾時開始, 弟弟既哭聲係一下, 跟住停左, 擘大口冇聲, 再大喊咁!  我地數過架勒, 弟弟既哭不出聲最長係有 15 秒架......

第 2 隻牙已經爆出左, 而家一擘大口就見到佢兩粒牙好可愛~~  呢幾日已經順利轉晒飲森永大仔, 岩岩好係 9 個月大時飲晒所有細仔奶粉, 一罐都冇多!!  勁!!  唔知係唔係大仔奶粉好味 d 呢?  弟弟而家飲奶 5 分鐘就飲晒 8 安 (240ml) 仲係飲清個隻!  之前飲到剩番 20-30 ml 就推奶樽既情景已經成為歷史!!  

鑒於弟弟食粥仔只係一般, 於是決定落重料俾佢 -- 開始食肉 + 2 種菜!  暫時試左節瓜蛋黃瘦肉粥, 紅蘿蔔粟米瘦肉粥 & 薯仔蕃茄魚肉粥, 真係肯食左喎!  又見佢食到一半開始眼訓, 於是再早 d 俾佢開餐, 咁弟弟就真係會係眼訓前食晒碗粥~~~

希望弟弟唔好學小慈家姐咁食野含住唔吞, 我就一萬個感恩勒!!

上學途中既對話

今朝係屋企準備出門口送小慈返學, 我仲係掛萬漏一咁又要俾錢工人姐姐買送, 又要同小慈量體溫寫體溫表, 又要同弟弟 good bye kiss......

小慈: "媽媽, 快 d 啦!  我著左波鞋架喇!  我等左你好耐喇!"

*************************************************

終於出到門口......

小慈: "點解地下濕晒架?"

我: "可能今朝落雨黎啦"

小慈: "我唔鍾意落雨呀!"

我: "唔係丫, 落雨都幾好呀! 涼涼地冇咁熱麻"

小慈: "係喎~~ 唔會熱到溶左!

"我: "哈! 你又記得好似天氣先生咁熱到溶左?!"

***********************************************

每日小慈都會係火車站度幫我問派免費報紙既姨姨攞報紙, 尋日姨姨送左包糖俾佢....

小慈: "姨姨早晨!  唔該晒!"

姨姨: "妹妹好乖喎~~ 返學呀?  Bye Bye~~"

小慈冇 bye bye, 係咁望住姨姨企係度唔走, 我埋去拖佢....

小慈: "點解冇糖既?!"

我(恍然大悟): "傻妹, 姨姨唔係日日都有糖架, 可能佢派晒啦"

小慈: "我想要糖呀! 我要返學校請周老師食呀!"

我: "咁姨姨派晒都冇辦法啦, 唔緊要啦, 小慈!"

**********************************************************

小慈: "媽媽抱~~ 我好攰呀~~"

我: "點解你會好攰既?"

小慈: "係呀, 因為我係細懶豬黎架!"

我: "咁邊個係大懶豬呀?"

小慈: "爸爸羅! 佢仲係屋企訓緊覺呀!"

*********************************************************

小慈: "媽媽, 痕唔痕呀?" (小慈吱緊我手臂)

我: "痕喎~~"

小慈: "我都好痕呀!"

我: "係? 邊個吱你呀?"

小慈: "我自己吱自己隔肋底好痕架!"

*********************************************************

我: "小慈尋日係學校係唔係有唱詩歌祈禱呀?"

小慈: "有呀!  梁老師有教我唱哈利路亞呀!"

我: "點樣唱架?"

小慈: "um.... 哈利路亞... 哈利路亞.... 咁羅, 媽媽你教我唱啦!"

我: "媽媽未聽過唔識唱喎!"

小慈: "唔緊要啦, 唔駛唔開心架, 知唔知? 我叫梁老師教你唱啦好唔好? 錫番你啦~~ 我好錫你架, 媽媽!  我好鍾意你架!"  

半月灣

因為下星期六開始小慈要上音樂班, 於是今堂就係最後一堂游水班!  呢 6 堂游水班, 小慈學識左游水一定要戴泳鏡, 用口吹波波, 鼻鼻掂到水都唔怕, 但就點都唔肯浸個頭落水執石仔, 反而學識掉舊石落水然後點唔怕水既搴搴同瑤瑤姐姐執番俾佢,  "呢度呀! 呢度呀!" 真係俾佢吹漲 @.@  我決定下年由佢跟教練游會好 d, 始終我在場小慈都好依賴, 尤其係有一堂爸爸同佢落過水之後就次次都扭計要同爸爸一齊游,  進度太慢喇.... 不過小慈都仲係好細個, 今年叫俾佢試過下就算, 出年先再繼續!

Last 一堂盡慶 d, 我地一班游水友相約一齊黎個 farewell beach party, 出發去半月灣!  今日天公造美, 教練又無端端改上堂時間 2:00 pm 就落堂, 我地沖一沖身就即刻出車去西貢, 坐船仔去半月灣時剛剛 4:00 pm, good timing!  好耐冇坐過魚船, 有海風好舒服

左擁右抱既秋秋

呢度就係我地要去既半月灣, 原來個沙灘好細架咋!  忙碌既小朋友唔得閒影相

小慈最鍾意玩沙

今日好開心, 盡慶而歸!

自取其辱的烏鴉

放工返到屋企小慈仲睇緊電視, 與其話佢睇電視不如話佢 '聽' 電視, 佢其實係玩緊玩具對眼都冇望住電視機!  於是我同佢講:

我: "小慈, 到媽媽睇電視喇...."

小慈: "未得呀!  我仲想聽埋 Twins 姐姐講故事先到你睇電視, 好唔好?"

唔好都唔得啦寶貝女!  Twins 姐姐今日講既故事係叫 "自取其辱的烏鴉", 話隻烏鴉嫌自己 d 羽毛灰灰黑黑唔靚, 於是係河邊攞左其他雀仔唔要既羽毛黎裝飾自己, 希望可以傲視同儕, 點知俾其他雀仔發現就攞番走屬於佢地自己既羽毛將烏鴉打回原形.......  其實今時今日呢個故事既寓意可能會唔同左, 至少我覺得隻烏鴉有創意, 又識廢物利用咁添!

飯後我地又玩到攬埋一舊, 小慈可能受我影響都好鍾意攬攬錫錫扭扭抱抱, 今晚佢就無端端大叫一聲 "媽媽~~~"  然後飛身撲埋黎我度!!  好在我接得住佢, 兩隻手岩岩好兜住佢個 pat pat 仔, 真係我見尤憐, 小慈個 pat 係一 d 肉都冇既, 於是我話佢:

 "邊個個 pat pat 咁細個?!"

點知小慈反應好快, 答我:

 "媽媽個 pat pat 咁大個!"  @.@  

秋秋當堂爆笑!!!  我簡直係做左 "自取其辱的媽媽"......

同場加映弟弟一聽到小慈家姐唱歌就會極度開心跳晒舞

弟弟個側面好似卡通人物好可愛啊~

開心笑飯團

早前係網上發現一間專賣蛋糕材料舖頭入面同時亦都有賣飯團模!  間舖頭係火炭好近, 於是某日放工就同秋秋去 shopping 買可愛既飯模, 紫菜機, 小工具等, 希望 d 飯餸靚小慈肯食多 d 食快 d 啦!

今日放假入廚煮餐飯仔俾小慈, 之前湊住弟弟周身唔得閒, 而家工人姐姐返黎, 我就可以放假做番自己野~   是日晚餐蒸矮瓜, 馬蹄肉餅 & 開心笑飯團, 係唔係睇見都想食呢?

小慈好驚喜, 佢見到 d 飯團開心得好緊要, 一啖就食左個飯團落肚 (原來太大舊, 下次我會整細一半架勒)

淨番最後一粒開心笑飯團, 小慈話佢對住佢笑於是錫左佢一啖, 超級可愛呀小慈!

小慈實在太開心, 呢餐飯出奇地只係食左 30 分鐘破晒紀錄, 仲要係食清隻碟! 

我好感動呀~~ 乖女!