鬼馬小明子

弟弟由細到大都帶俾我地好多歡樂, 古靈精怪轉數勁快真係唔夠佢黎!  等我耐唔耐就輯錄下佢 D 攪笑野啦!

好似係電視講緊身體柔軟度, 呢位年輕人一野就示範俾我睇佢仲可以同自己講電話

不經不覺變晒大腳八!!  爸爸著 42 號鞋, 小慈小明已經著 41 號直逼爸爸!!  

爸爸表示好高興, 跳晒舞

叫醒佢地返學, 點知轉個頭唔見左人!  搵均全間屋原來係我張床度瞓翻.....

同鄰居既貓依然好 friend

乖既主日學學生有布甸食

乖既仔都有媽媽換隻至愛碟俾你

見佢 IG like 既 page 有時真係笑死我

沖涼時勇救鹽蛇 BB

弟弟話見到佢俾水沖到翻肚已經立即撈起, 都唔知佢幾時跌落水!  好在呆一陣就冇事

可能細得滯未識甩尾, 唔係咁驚嚇甩左九世

Jimmy  話我都俾水浸親快 D 救我

話咁快中一生涯已經接近尾聲, 好在班主任都肯攪下活動俾佢地增進友誼!  專登搵兩日既下午返學校玩躲避盤, 集體攻擊阿 sir 開心到不得了!

班照

醒目仔會企前排踎低

仲有好同學朝朝一齊搭巴士, 一齊行返學, 雞啄唔斷

今日仲碌番張細個相出黎, 真係超級可愛!!!  兩歲已經識單手插袋 XDDD

太愛佢, 一個眼神一個動作一句說話都覺得佢好得意!!  不捨得佢長大

送機

姑媽一家今晚飛走了!  本來都冇諗住送機, 點知姑媽指明要秋幫手搬行李, 弟弟又話好耐冇去過機場, 原先考試期間唔想佢地出街分心, 況且我今晚又要上網課就打算秋去送機做代表就 OK, 點知我一晚瞓醒個心就充斥住一句 "要盡諸般的義"!  我上網課可以掛一陣機, 弟弟考試亦都可以預早溫習, 係小慈今晚要補習無法出席, 好啦!  家姐得一個, 走左都唔知幾時再可相見!  就去送機啦!

真係好耐冇來過機場

大大既機場人流好少

疫情下苦了航空及旅遊業, 某間航空公司仲一夜間解散添...

係淨番米字國既櫃位比較熱鬧

空蕩蕩既機場感覺真係好怪

我地搵最近既地方等姑媽

Hello Hong Kong!

11:30 pm 機姑媽及時趕到!!  

弟弟由細到大都鍾意玩行李車, 喜歡人地推佢添

3 個大人6件大行李, 再加身後呢堆 hand carry, 移民真係唔講得笑

時間無多, 要入閘了

坐穩機呀!  見你地個口罩都幾舒適, 夜機既好處係上機就瞓時間過得快 D

Bye bye!   Bye bye!!  

為你地禱告順利適應彼邦生活!  展開人生新一頁!

我信他日必能重聚!

筒浸

話咁快就係 6 月13日, 今日有親愛既姊妹寶玲作見證!  聽佢講患癌 8 年既經歷, 完全忍唔到眼淚, 我喊到口罩都濕晒... 每個人既人生都不一樣, 但我相信神會背起我地走最艱辛既路!  寶玲, 加油!!

提摩太團契送左扎花俾寶玲以示支持!  繼續用禱告撐住你地一家!

路是難走, 但恩典一定夠用!

馬不停蹄, 快食個 lunch 就返黎整埋份浸禮禮物 

完成!!  係唔係好靚呢?

疫情下浸禮都延期一年, 今次我地歷史性地棄用牧師身後講台下既浸池, 移師天台進行浸禮

實行 "一人一筒" 浸禮, 現場直播減少人流!  牧師及所有天台既工作人員全部都打晒兩針疫苗 / 72 小時內持陰性檢測報告, 確保大家安全!  真係別開生面!  無論以甚麼形式浸入基督, 天父都是喜悅的 :)

受浸者連同牧師傳道執事會佐們大合照!  我地份禮物真係好搶眼呀!

歡迎加入城潮浸大家庭!

製作小禮物

我地教會有好多團契, 每次浸禮都由不同團契負責, 今年終於輪到提摩太團!!  如果唔係因為疫情延期, 12月已經浸左, 唔講唔知, 我地對上一次整浸禮禮物已經係 9 年前架喇!  呢張相真係經典, 小朋友們應該都唔可以再坐大脾  >v<

9 年後既今日, 我地都係整相架

相架既襯花要靠自己自由發揮

排好之後要用熱融膠固定

師母整得又快又靚, 好厲害

我同小慈既作品

半個鐘已經整完, 就等受浸日影埋相入相架就大功告成!  路過將於 6月27日啟用既宋皇臺站, 好快就多一個選擇返教會, 正!

而家只可以等巴士返屋企, 送車尾造就佢地入去公園玩下, 已經大個晒, 腳太長玩盪鞦韆會擦地 XD  小慈依然好錫好錫弟弟, 仲會走去推佢盪高 D, 場面溫馨~

6月13日浸禮, 當日亦有我地團契姊妹寶玲為大家作見證, 佢一次又一次癌症復發, 一次又一次死過翻生, 但天父總給予佢夠用既恩典!!  超級奇妙

歡迎大家參加!!