小慈成績平平, 主要係中、英、數比較弱, 但其他科目差不多全部 A 晒架! 可惜現今計分法, 中、英、數係乘大 9 倍, 就算其他科目叻都只係乘 2 乘 3, 小慈科數長期處於合格與不合格之間已經拉低排名, 我一度好擔心佢會跌落 band 3 添, 好在上次家長日班主任話小慈距離 band 3 好遠我先放心咋! 直資我只係報左一間, 因為真係好近屋企可以行番學, 但申請時中學要求夾埋 4、5 年級張成績表就出事, 有紅色就唔靚啦, 果然連 interview 都冇 (V_V) 咁都好, 疊埋心水讀政府學校, 不過又要玩大抽獎呢個非常煎熬既遊戲......
申請自行派位揀兩間自己最鍾意既中學, 全港 18 區任揀, 膽粗粗同小慈試間跨網女校, 佢都話想讀女校架, 呢間女校好近我地教會成日都經過, 教會入面亦有好多姐姐讀緊/畢左業, 聽完簡介會之後我更加鍾意就唔理咁多同小慈申請左先! 另外一間穩陣 D 揀番沙田區, 大抽獎可以一條心揀多一次麻, 點知呢兩間竟然同一日 interview, 仲要都係上午!!! 咁點算? 於是我同天父祈禱, 我唔想放棄第二間, 可唔可以安排一間 9:00 am 一間 11:00 am 呀? 咁我飛的士都仲趕得切麻!
嘩! 天父真係好好, 好錫小慈, 真係一間 9:xx am , 另一間 11:xx am!! 今日就係 interview 既大日子, 我地已經包左部「的士」出發喇 ^^
排隊登記貼名牌, 今日真係好多人呢~~~
準備跟大姐姐上課室 interview, 我同小慈講要放輕鬆, 當同老師傾偈就得架喇!
面試過程非常順利, 小慈話佢一 D 都唔緊張, 老師個個都好好人, 佢好有信心! 佢頭先用左 10 分鐘預備讀一篇中文文章, 再用4個字創作一個小故事, 然後又朗讀一篇英文文章, 有 D 生字唔識, 最後係問左一條處境題同一 D 個人問題, 完全冇小組討論佢非常開心 ^^
飛的士, 我地又去第二間學校喇~~
我都係第一次入黎呢間學校, 小慈嘩嘩聲話原來中學校舍係咁大既, 佢好開心, 如果真係入到就好喇~~
女子籃球隊練波中, 小慈好想參加 :D
最開心係見到十字架 ^^
弟弟陪小慈家姐登記中
有攤位遊戲玩
1 分鐘內串 5 個英文生字, 非常簡單, 兩姐弟都係串晒 D 3 個字既動物名, 擺明握糖食 :D
面試過程又係好順利, 不用朗讀文章, 但要用 3 分鐘 book sharing, 小慈一早預備左, 佢自覺讀得幾好, 問既問題同之前個間差不多, 唯一分別係有一題類似議論題, 要你講一樣野既好處同壞處, 佢自問發揮得幾好!
一考完一支箭標返屋企, 因為有份大禮物等緊佢啦! 爸爸一早買黎獎勵佢今次呈三有 4 條 A, 但要完左今日 interview 先可以拆, 所以咁心急返屋企啦!
話咁快砌完, 今日天氣好好兩姐弟玩左成個下晝
We do our best, God will do the rest! 雖然可能幾百人爭 35 個位, 天父一定會為小慈預備最適合佢既中學既!!
