小慈 6 個月大已經上興趣班, 原因一係當年我係網上識到一班媽咪, 大家成日約出黎玩, 有咩 playgroup 又一齊包班上; 原因二係小慈作為我地第一個 BB, 有時真係唔識湊佢, 又唔知應該咩年齡教佢咩好, 於是上堂學下點樣教女都好!
跟住到小明出世, 一來冇時間, 二來都覺得自己好有經驗, 於是幫弟弟報既興趣班就大幅減少, 不過, 以公平為原則, 經濟情況同埋時間許可的話, 我都盡量報番小慈當年報過既 course 俾弟弟
除左之前上既幼潛, 我亦都有報通利既 Music Toddlers, 咁岩佢係屋企附近又開得成班, 於是弟弟一夠 2 歲就上堂! 可能我實在太心急, 我唔應該係弟弟岩岩適應返學時加多個興趣班要佢適應, 又唔應該第一次上堂時搵左同佢唔係太熟既爸爸陪佢 @.@ 果然第一堂就狂喊到 Miss Shirley 想請佢出課室!!!!
第二堂弟弟咁岩又病左發燒返唔到, 第三堂先由我陪佢去上, 大家一定估唔到, 小明由出門口喊到入班房, 我抱住佢都一路行一路喊, 係咁要搵工人姐姐, 想返屋企云云..... 我用左好多方法氹佢收聲, 不過佢諗諗下又喊, 諗諗下又喊, 我真係好後悔咁早幫佢報, 小慈當年都係 2 歲 4 個月先上架 @.@
不過, 永不放棄係我既宗旨, 到第四堂, 小明聽到話要換衫搵 Miss Shirley 已經喊到九彩, 又係一路行一路喊鬼死咁可憐, 不過係雞蛋仔同芝士條既誘惑下, 弟弟喊左兩條街就收左聲, 不停自我安慰話:
"Bye Bye Miss Shirley 就買芝士條, 媽媽同我一齊....."
叻仔左一陣, 入到課室又係想喊, 氹下氹下都會安靜不過就成日要我抱住
課室入面都幾靚, 應該吸引到小朋友
當我攪掂我個仔上堂唔喊既時候, 我真係後悔報左呢個 course (真係好後悔所以重覆講咁多次!!) 我自問都投入左好多時間金錢係通利, 由小慈 1 歲 4 個月開始已經上網報名, 排隊等左成年先夠年齡又有位開班, 跟住冇間斷過, 一直 keep 住讀通利既 Music Course 就係覺得佢有質素先讀咁耐, 一堂都唔平架! 而家輪到小明, 見過咁多個老師我都算好有經驗, 不過真係完全冇估到師資既差異原來可以咁大!!!
當年小慈上 Music Toddlers 我大住肚都同佢上, 幾開心架, 小慈會成日唱住 Miss May 教佢唱既歌, 所以一完左 12 堂佢地開 Advance Course 我第一時間報名! 冇比較冇傷害, 一比之下原來 Miss May 真係好好, 我上左 Miss Shirley 2 堂, 同老公傾開原來佢都覺得上堂好悶, 不過佢唔識音樂不便批評同我講開先講, 於是我忍唔住打去通利 Head Office 了解下
我未見過一個老師上音樂堂咁沉悶, 真係大人都想瞓~~ 冇備課, 上堂要睇 notes, 唱歌唔識歌詞, 又走音, 課堂冇組織, 明明係音樂班, 因咩事要小朋友認顏色呢? 之後又唔係有首 colour song 跟尾鞏固學習喎, 咁你認顏色黎做咩呢? 又徙時間要小朋友 line up, 一個跟一個排隊攞樂器, 得個幾個小朋友, 圍圓圈遂個派都唔係花你好多時間姐?!
我做左呀媽咁耐都未試過投訴老師!!! 我之所以打呢個電話都只係想問通利 2 歲音樂班有冇課程? 其實知唔知個老師教咩? 會唔會有指引? 請老師既時候佢地有冇受過 training? 識唔識教書?
呢個 whiteboard 係我唔覺意影既, 我冇諗過一個音樂老師會唔識唱 Jingle Bells, 唔識唱唔應該搵首純音樂, 有人唱你咪嘴都唔覺麻! 甚至唔教呢首歌都冇人會怪你, 自暴其短咁傻都有??
真係好想放棄唔再上呢個 course, 但我一次過俾晒 12 堂錢, 佢地又唔接受我轉班, 於是死頂咁頂埋佢, 再上多幾堂, 我發覺佢唔係冇備課, 而事實係佢真係唔識教書, 更加唔識教音樂!! 呢班得 6 個小朋友, 平均上堂既只係 3 - 4 個, 佢都可以唔記得小朋友既名, 真係好難令小朋友投入架喎!
Miss Shirley 又好另類, 佢教小朋友唱既歌並唔係耳熟能詳既歌, 一首 The Wheels on the Bus / Twinkle Twinkle Little Star / I can tap my knees 佢都可以搵到首超慢板既出黎, 悶到呢...... Fingers Song 佢可以諗唔起 finger number 1 叫 Thumbs 啞左唔識唱要我提佢.... 所以最後我再冇投訴, 唔係因為佢有改善, 而係佢真係唔係教書既材料, 徙氣徙口水徙心機!
上音樂班上到玩 bubbles 都係第一次見, 但冇目的架喎, 純粹是但開 d 音樂, 小朋友蜂擁而上勁 high 但只係拍 1 分鐘 bubbles 就收埋, 小朋友泡泡都未知拍唔拍到就冇得玩....
最低能係有一次開左首 goodbye song 黎拍 bubbles, 拍完同 d 小朋友講 : "走得喇你地!"
小朋友全部呆左唔識反應, Miss Shirley 仲話: "你地開心得滯唔想走呀?" 終於要 d 小朋友坐定定再唱多一次 goodbye song
"It's time to say goodbye, we'll see you all next time"
唱完小朋友就一齊起身出門口著鞋, 個一刻我真係好想話佢聽, 如果想小朋友有規矩, 上堂係要有程序有步驟小朋友先會知幾時做咩, 先會同你合作, 你成日都一時一樣真係連大人都唔知你想點
終於捱到畢業喇!!
今堂係最後一堂, 實在太開心!! 脫苦海~~~~~~
最後一堂頒證書 + 大合照都可以話係通利既傳統 , 之前上興趣班既老師, 冇一個畢業時唔肯上鏡架, Miss Shirley 講到明唔肯影相, 幫我地影合照就得喎, 唔通佢怕家長通緝佢冇面見人?! 傻既, 一早影左你相啦! 醫番都徙藥費投訴你都徙口水, 希望你有自知之名唔好再教書誤人子弟
呢張證書絕對係用 "沉悶" 黎換番黎, 真係自己教小明唱歌都冇咁嬲呀!
對唔住弟弟! 我真係以為 Tom Lee 出品必屬佳品架 -_____- 媽媽返屋企再教過你下, 呢 12 堂你 delete 左佢啦
