迪士尼快閃黨

天氣實在太好, 令我忍唔住想去戶外玩, 但老公腰骨痛唔肯陪我癲, 我係佢耳邊依依哦哦左好耐, 連小慈都問我咩事?

我: "我叫緊爸爸去迪士尼呀!"

小慈: "迪士尼?!  好喎!!"

我: "不過爸爸腰骨痛話唔去"

小慈: "咁咪留係屋企休息囉!"

我: "咁乖?  你唔想去迪士尼咩?"

小慈: "唔係我呀!  叫爸爸係屋企休息, 唔係講我自己呀!"  (仲要反我白眼)

真係.... 等我仲以為佢咁孝順, 為左爸爸係屋企休息連迪士尼都唔去添!  Anyway, 阿女一出聲, 又幫爸爸揼下骨鍊左兩下, 又話自己好乖唔會要我地抱, 完左崇拜返埋團契就出發!  飛車去到迪士尼都已經 5:15 pm, 快呀!  最後一場 Golden Mickey 就黎開始喇~~

跑到弟弟差 d 跌親

呢個哥哥彈 Disney Songs 好厲害!!  我地跑緊聽到琴聲都停低欣賞

冇為意 3 月 11 日開始係貴賓日, 所有年票持有人都可以免費帶一個 guest 入場, 樂園超爆呀!!  泊車泊到去辛巴 No. 15 都冇位就知今日領野  X___X  食住爆谷排 30 分鐘隊唔覺既~~

小明近日一得閒就練 V 字手勢

平時睇完 Golden Mickey 後小小世界會大排長龍, 今次竟然冇人, 因 d 人去晒睇仙子亮燈, 益左我地玩 2 次都唔駛排隊, Yeah!

兩個小寶貝係度扮緊自己有條尾

原來 7:30 pm 後幻想世界所有遊戲都唔俾排隊, 可能怕煙花危險?!  小慈小明冇得玩灰姑娘旋轉木馬同埋咖啡杯, 好失望呢~

好在巴斯光年都仲有得玩

小慈玩得非常投入認真!  今日全日冇瞓過晏覺, 亦都好乖真係冇扭抱

今日快閃迪士尼, 5:15 pm 玩到 8:00 pm 樂園關門, 明顯地兩隻豬玩唔夠皮不過冇計啦!  就算 Skip 左晚餐都只係玩得 4 個 games, 晏左入黎再加上人多, 下次再黎過啦~~~