每年春分就係我既生日喇!! 近呢兩個月應該係我工作生涯中最辛苦既日子, 日日 OT 都算, 最唔開心係面對人性醜惡, 做到心灰意冷...... 於是, 排除萬難爭取一日假俾自己休息!!
一早送兩隻豬仔返學! 自從老公改左返工時間, 我要搭巴士返工早左出門口, 送返學既責任就交左俾工人姐姐, 趁今日放假就由我送佢地返學啦~ 小慈小明開心到不得了 ^^
不過弟弟誤會左以為我同佢一齊返學, 所以當我幫佢換完鞋仔同佢 say bye bye 時, 佢喊到七彩 @.@ 好在老師們爭住抱佢, 連小慈都依依不捨, goodbye kiss 完仲要行兩步返轉頭攬我大脾!! 嘩~~ 此地不宜久留!! 留多陣怕且小慈都會喊..... 閃!!!
跟住同老公去圓方嘆午餐, 有 8 個鐘 free parking 真係行到天黑都仲得!! 今日星期二仲有特價飛, 全間戲院夾埋我地先得 15 個人, 包廳一樣! 我直情當張椅係梳化咁瞓係度睇戲, 隔離位擺手袋, 爽到不得了!!! The King's Speech 好好睇, 故事簡單但演技出色!! 不過我真係唔鍾意佢個中名譯名, downgrade 晒套戲 :P
由於太掛住 d 長腳蟹, 我地再去尖沙咀麗景酒店咖啡亭食 buffet! 保持水準不過貴左五十幾元! 我同秋秋食野既口味最夾, 大家都鍾意食海鮮, 爽呀!
賣飛弗長腳蟹!!! 2 隻手指咁粗真係唔講得笑
生蠔今晚得紐西蘭同愛爾蘭, 兩款選擇
Parma Ham 好味, 食晒呢幾樣野已經回本 ^^
甜品我不嬲都麻麻地, 但今日俾佢個甜品櫃同埋熱情既廚師融化左
廚師推薦我食木槺布甸 and 鮮果蛋白餅, 嘩~~ 真係好好味呀, 我 encore 左!
唔怪得知我 d 朋友咁鍾意整甜品
今晚係地中海之夜, 右上角既法式海鹽焦糖都好特別, 係咸既朱古力黎架!
食飽飽就返屋企切生日蛋糕, yeah!
兩個小寶貝等左成晚頂住唔肯瞓, 就係為左唱生日歌俾我聽 :)
簡簡單單, 開開心心, 已極好!
最美麗仍然是愛~~
我既生日禮物!! 呢個蛋白蛋糕係老細送架, 真係好驚喜! 佢已經請左我食飯, 仲送埋呢幾隻 Elmo 碟俾我話我一定鍾意, 似乎我呢兩個月既 OT 應該感動左佢
今日同秋 shopping 既戰績
即沖即飲德國花茶, 今晚我沖左士多啤梨奇異果, 滿室清香
看似簡單既生日, 行街睇戲食飯, 但有老公陪住又有仔女仲有老細錫我, 我真係好開心, 好滿足!!!
Happy Birthday to ME ^^
沒有留言:
張貼留言